ທ່ານ ສີຈິ້ນຜິງ ຊີ້ໃຫ້ເຫັນວ່າ: ການຊຸກຍູ້ສາຍພົວພັນລະຫວ່າງຈີນ-ຣັດເຊຍໃຫ້ຂະຫຍາຍຕົວຢ່າງຍາວນານ, ປອດໃສ, ໝັ້ນທ່ຽງ ແລະ ມີຄຸນນະພາບສູງຢ່າງເດັດດ່ຽວ ແມ່ນການຄັດເລືອກທາງຍຸດທະສາດຂອງສອງຝ່າຍເພື່ອສຸມໃສ່ຜົນປະໂຫຍດພື້ນຖານຂອງສອງປະເທດ ແລະ ທ່າອ່ຽງລວມແຫ່ງການພັດທະນາຂອງໂລກ.
ນັບແຕ່ປີ 2013 ເປັນຕົ້ນມາ, ທ່ານ ສີຈິ້ນຜິງ ໄດ້ພົບປະກັບທ່ານ ປູຕິນ ຫຼາຍກວ່າ 40 ເທື່ອ, ໄດ້ນຳພາສາຍພົວພັນສອງຝ່າຍຂະຫຍາຍຕົວກ້າວໄປໄກຢ່າງໝັ້ນທ່ຽງ. ໃນການພົບປະກັນຄັ້ງນີ້, ປະມຸກລັດສອງປະເທດໄດ້ປຶກສາຫາລືກັນທາງຍຸດທະສາດກ່ຽວກັບບັນຫາສຳຄັນຕ່າງໆ ຊຶ່ງໄດ້ສະແດງໃຫ້ເຫັນຢ່າງເຕັມສ່ວນເຖິງຄວາມຕັ້ງໃຈອັນແນ່ວແນ່ຂອງສອງຝ່າຍທີ່ຈະພັດທະນາການພົວພັນສອງປະເທດຢ່າງຕໍ່ເນື່ອງໂດຍສຸມໃສ່ອະນາຄົດອັນຍາວໄກ. ປະມຸກລັດສອງປະເທດໄດ້ຮ່ວມກັນປະກາດການຕໍ່ອາຍຸ “ສັນຍາມິດຕະພາບ ແລະ ການຮ່ວມມືຖານບ້ານໃກ້ເຮືອນຄຽງຈີນ-ຣັດເຊຍ” ຂະຫຍາຍໄປຕື່ມອີກ, ທັງໄດ້ລົງນາມ ແລະ ເຜີຍແຜ່ຖະແຫຼງການຮ່ວມກ່ຽວກັບການເພີ່ມທະວີການປະສານງານຍຸດທະສາດຮອບດ້ານ ແລະ ລົງເລິກການຮ່ວມມືແບບມິດຕະພາບຖານບ້ານໃກ້ເຮືອນຄຽງຕື່ມອີກ. ພາຍຫຼັງການພົບປະເຈລະຈາ, ໃນຂະນະທີ່ຮ່ວມກັນພົບປະກັບນັກຂ່າວ, ທ່ານ ສີຈິ້ນຜິງ ໄດ້ເນັ້ນໜັກວ່າ: “ຕ້ອງສ້າງຄວາມໄວ້ເນື້ອເຊື່ອໃຈກັນທາງການເມືອງທີ່ມີຄຸນນະພາບສູງກວ່າເກົ່າ, ຢຶດໝັ້ນສະໜັບສະໜູນທາງຍຸດທະສາດຊຶ່ງກັນ ແລະ ກັນ”, ພ້ອມກັນນັ້ນກໍໄດ້ຊີ້ໃຫ້ເຫັນວ່າ: “ຄວາມໄວ້ເນື້ອເຊື່ອໃຈກັນທາງການເມືອງແມ່ນລັກສະນະພົ້ນເດັ່ນທີ່ສຸດຂອງການພົວພັນຈີນ-ຣັດເຊຍ”, ໄດ້ສົ່ງສັນຍານອັນຕັ້ງໜ້າໃນການຮັດແໜ້ນຄວາມໄວ້ເນື້ອເຊື່ອໃຈກັນທາງການເມືອງລະຫວ່າງຈີນ-ຣັດເຊຍໃຫ້ແກ່ທົ່ວໂລກ.
ຈາກການແລກປ່ຽນດ້ານວັດທະນະທຳຮອດການໄປມາຫາສູ່ກັນທາງດ້ານເສດຖະກິດການຄ້າ, ການຮ່ວມມືລະຫວ່າງຈີນ-ຣັດເຊຍໃນຂົງເຂດຕ່າງໆໄດ້ຂະຫຍາຍຕົວເຂົ້າສູ່ລວງເລິກໃຫ້ເປັນຮູບປະທຳຢ່າງບໍ່ຢຸດຢັ້ງ. ມູນຄ່າການຄ້າລະຫວ່າງສອງປະເທດໄດ້ລື່ນກາຍ 200 ຕື້ໂດລາເປັນເວລາ 3 ປີລຽນຕິດ ຊຶ່ງໄດ້ຢືນຢັນໃຫ້ເຫັນວ່າການຮ່ວມມືລະຫວ່າງສອງຝ່າຍມີພື້ນຖານອັນໜັກແໜ້ນ ແລະ ກຳລັງບົ່ມຊ້ອນຢ່າງໃຫຍ່ຫຼວງ. ຕະຫຼອດຫຼາຍປີຜ່ານມາ, ສອງປະເທດໄດ້ຢຶດໝັ້ນການປະຕິບັດຕໍ່ກັນຢ່າງສະເໝີພາບ, ເຄົາລົບນັບຖືຊຶ່ງກັນ ແລະ ກັນ, ມີຄວາມສັດຊື່ ແລະ ປະຕິບັດຕາມສິນທຳ, ຕ່າງຝ່າຍຕ່າງໄດ້ຮັບຜົນປະໂຫຍດ, ໄດ້ປະກອບສ່ວນອັນສຳຄັນເຂົ້າໃນການປົກປັກຮັກສາຄວາມຍຸຕິທຳ ແລະ ຄວາມເປັນທຳໃນສາກົນ ກໍຄືຊຸກຍູ້ການສ້າງການພົວພັນສາກົນແບບໃໝ່, ໄດ້ກາຍເປັນກຳລັງສ້າງຄວາມໝັ້ນທ່ຽງອັນສຳຄັນທ່າມກາງສະພາບການປ່ຽນແປງໃຫຍ່ໃນຮອບຮ້ອຍປີ. ນອກຈາກນີ້, ສອງຝ່າຍຍັງໄດ້ຮ່ວມກັນເຜີຍແຜ່ຖະແຫຼງການຮ່ວມກ່ຽວກັບການສົ່ງເສີມໃຫ້ໂລກຫັນເປັນຫຼາຍຂົ້ວ ແລະ ການພົວພັນສາກົນແບບໃໝ່, ໄດ້ເພີ່ມຄວາມໝັ້ນທ່ຽງ ແລະ ຄວາມແນ່ນອນອັນລ້ຳຄ່າໃຫ້ແກ່ໂລກທີ່ເຕັມໄປດ້ວຍການປ່ຽນແປງ ແລະ ຄວາມວຸ້ນຍາຍ.
ຄໍາເຫັນ