 |
ໃນພິທີ, ທ່ານ ພົທ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີກະຊວງ ປກສ ຮອງປະທານຄະນະກຳມະການແກ້ໄຂບັນຫາຢາເສບຕິດລະດັບຊາດ ໄດ້ລາຍງານສະພາບການແກ້ໄຂບັນຫາຢາເສບຕິດຢູ່ ສປປ ລາວ ໃນ 1 ປີຜ່ານມາໃຫ້ຮູ້ວ່າ: ສະພາບການແຜ່ລະບາດຂອງຢາເສບຕິດຢູ່ໃນໂລກ ແລະ ພາກພື້ນໄດ້ຂະຫຍາຍເປັນວົງກວ້າງໃນທົ່ວທຸກມູມໂລກ ໄດ້ເພີ່ມທະວີຄວາມຮຸນແຮງເປັນອັນຕະລາຍກາຍເປັນໄພຂົ່ມຂູ່ຕໍ່ສະພາບການພັດທະນາເສດຖະກິດ, ວັດທະນາທໍາ-ສັງຄົມ ກໍຄືສະຖຽນລະພາບທາງດ້ານການເມືອງ ແລະ ຄວາມໝັ້ນຄົງຂອງບັນດາປະຊາຊາດຢູ່ໃນໂລກ.
 |
ສຳລັບປະເທດລາວກໍແມ່ນປະເທດໜຶ່ງ ທີ່ພວມປະເຊີນໜ້າຕໍ່ກັບໄພຂົ່ມຂູ່ຈາກບັນຫາຢາເສບຕິດດ້ວຍເຫດນັ້ນ: ພັກ-ລັດຖະບານ, ກະຊວງປ້ອງກັນຄວາມສະຫງົບ, ບັນດາກະຊວງ, ອົງການ, ອໍານາດການປົກຄອງທ້ອງຖິ່ນໄດ້ຖືເອົາການແກ້ໄຂບັນຫາຢາເສບຕິດເປັນວຽກງານບຸລິມະສິດທີ່ສຳຄັນໂດຍໄດ້ສົມທົບກັບຫຼາຍພາກສ່ວນ ພ້ອມທັງກຳນົດຫຼາຍມາດຕາການເພື່ອແກ້ໄຂບັນຫາດັ່ງກ່າວເຊັ່ນ: ໄດ້ເອົາໃຈໃສ່ເຮັດວຽກງານສ້າງຄວາມຮັບຮູ້ທົ່ວສັງຄົມເປັນຕົ້ນໄດ້ເອົາໃຈໃສ່ໂຄສະນາສຶກສາອົບຮົມເຜີຍແຜ່ກົດໝາຍ, ຜົນຮ້າຍໄພອັນຕະລາຍຂອງຢາເສບຕິດ, ໄດ້ອອກໃບຢັ້ງຢືນຮັບຮອງບໍລິສັດເຂົ້າຮ່ວມໂຄງການປູກພືດທົດແທນການປູກຝິ່ນ ຢູ່ແຂວງພາກເໜືອ ມີປະຊາຊົນໄດ້ຮັບຜົນປະໂຫຍດ 58,185 ຄອບຄົວ, ຕໍ່ກັບເປົ້າໝາຍຜູ້ເສບຢາເສບຕິດ (ຜູ້ຖືກເຄາະຮ້າຍ) ໄດ້ນໍາເຂົ້າສູນບໍາບັດ-ປິ່ນປົວ, ຟື້ນຟູສຸຂະພາບທີ່ມີໃນທົ່ວປະເທດ 14 ສູນ; ໃນປີ 2024 ມີທັງໝົດ 8,476 ຄົນ ຍິງ 392 ຄົນ (ໃນນັ້ນ, ປິ່ນປົວດີແລ້ວ ກັບຄືນສູ້ຄອບຄົວມີ 5,427 ຄົນ ຍິງ 276 ຄົນ, ສືບຕໍ່ປິ່ນປົວ 3,049 ຄົນ ຍິງ 96 ຄົນ); ສາມາດສ້າງບ້ານປອດຢາເສບຕິດໄດ້ 3,222 ບ້ານ; ສ້າງບ້ານປອດຄະດີໄດ້ 2,899 ບ້ານ; ສ້າງໂຮງຮຽນ, ສະຖາບັນການສຶກສາປອດຢາເສບຕິດໄດ້ 5,917 ແຫ່ງ; ສ້າງສຳນັກງານອົງການ, ກໍາລັງປະກອບອາວຸດປອດຢາເສບຕິດມີຈໍານວນເພີ່ມຂຶ້ນໃນແຕ່ລະໄລຍະ; ໄດ້ມີການພົວພັນຮ່ວມມືກັບບັນດາປະເທດເພື່ອນມິດ, ອົງການຈັດຕັ້ງສາກົນ, ບັນດາປະເທດທີ່ມີຊາຍແດນຕິດຈອດ ເພື່ອຮ່ວມກັນຄົ້ນຄວ້າປຶກສາຫາລື, ປ້ອງກັນເຮັດວຽກງານຄວບຄຸມສະກັດກັ້ນ ແລະ ຕ້ານຢາເສບຕິດ.
 |
ໄປຄຽງຄູ່ກັນນັ້ນໄດ້ປະຕິບັດມາດຕະການທາງດ້ານກົດໝາຍສາມາດແກ້ໄຂ - ມ້າງລາຍຄະດີຢາເສບຕິດ ໄດ້ທັງໝົດ 4,158 ເລື່ອງ, ຈັບຜູ້ຖືກຫາໄດ້ 6,297 ຄົນ ຍິງ 608 ຄົນ; ສາມາດຢຶດຢາເສບຕິດ, ພາຫະນະ ແລະ ຊັບສິນອື່ນໆເປັນຈຳນວນຫຼວງຫຼາຍ.
ສ່ວນຢາເສບຕິດທີ່ນຳມາຈູດທໍາລາຍໃນຄັ້ງນີ້ ແມ່ນຢາເສບຕິດຈາກຄະດີທີ່ສານໄດ້ຕັດສິນເດັດຂາດແລ້ວຊຶ່ງປະກອບມີ: ເຮໂລອິນ, ຢາໄອສ, ຢາບ້າ ແລະ ຢາເສບຕິດອື່ນໆ.
(ຂ່າວ: ປກສ, ພາບ: ວັນເພັງ)
ຄໍາເຫັນ