 |
ທ່ານ ນາງ ຄຳແຜ່ນ ຖາວອນ ເລຂາຄະນະບໍລິຫານງານຊາວໜຸ່ມ ດ່ານສາກົນຂົວມິດຕະພາບ 1 ນວ ໄດ້ກ່າວວ່າ: ໂດຍໄດ້ຮັບການມອບໝາຍຈາກຄະນະພັກ-ຄະນະຄຸ້ມຄອງດ່ານສາກົນຂົວມິດຕະພາບ 1 ນວ ໃຫ້ 3ອົງການຈັດຕັ້ງມະຫາຊົນຄື: ຊາວໜຸ່ມ-ແມ່ຍິງ-ກຳມະບານ ເປັນເຈົ້າການຮັບຜິດຊອບຈັດກິດຈະກຳປູກຕົ້ນໄມ້ ຂຶ້ນທີ່ດ່ານສາກົນຂົວມິດຕະພາບ 1 ນວ ເພື່ອສ້າງຂະບວນການຮອບດ້ານ ສະເຫຼີມສະຫຼອງວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ 2026 ຄົບຮອບ 46 ປີ ຕິດພັນກັບວັນເດັກນ້ອຍສາກົນ ແລະ ວັນສິ່ງແວດລ້ອມໂລກວັນທີ 5 ມິຖຸນາ 2026 ຄົບຮອບ 53 ປີ ແລະ ວັນສິ່ງແວດລ້ອມແຫ່ງຊາດ ຄົບຮອບ 27 ປີ ທີ່ໄດ້ໝູນວຽນມາບັນຈົບຄົບຮອບອີກວາລະໜຶ່ງ.
ຄືດັ່ງພວກທ່ານໄດ້ຮູ້ນຳກັນແລ້ວວ່າ: ປະເທດພວກເຮົາມີພູຜາປ່າໄມ້ອັນສວຍສົດງົດງາມ ແລະ ອຸດົມສົມ ບູນ ໃນການດຳລົງຊີວິດຂອງປວງຊົນທັງຫຼາຍໄດ້ຕິດພັນກັບປ່າໄມ້ ແລະ ບໍ່ສາມາດແຍກອອກຈາກກັນໄດ້ ແຕ່ກໍເປັນໜ້າເສຍດາຍໃນໄລຍະຜ່ານມາປ່າໄມ້ ແມ່ນຖືກທຳລາຍດ້ວຍຫຼາຍຮູບຫຼາຍແບບທີ່ແຕກຕ່າງກັນໄປ ເຮັດໃຫ້ເນື້ອທີ່ປ່າໄມ້ຫຼຸດໜ້ອຍຖອຍລົງ ລະບົບນິເວດວິທະຍາບໍ່ສົມດູນ ພາໃຫ້ເກີດມີໄພທຳມະຊາດຕ່າງໆເຊັ່ນ: ຝົນຕົກບໍ່ຖືກຕາມລະດູການ, ເກີດໄພນໍ້າຖ້ວມ, ໄພແຫ້ງແລ້ງ ແລະ ອື່ນໆ. ດ້ວຍເຫດຜົນດັ່ງກ່າວ, ອີງໃສ່ທິດຊີ້ນຳຂອງຄະນະພັກຂັ້ນເທິງ ກໍຄືແຜນການປູກຕົ້ນໄມ້ປະຈຳປີ 2026, ຄະນະພັກ-ຄະນະຄຸ້ມຄອງດ່ານສາກົນຂົວມິດຕະພາບ 1 ນວ ຈຶ່ງໄດ້ເຫັນດີຈັດກິດຈະກໍາປູກຕົ້ນໄມ້ຂຶ້ນທີ່ສະຖານທີ່ແຫ່ງນີ້, ເພື່ອເປັນການປູກຈິດສຳນຶກໃຫ້ຄະນະພັກ,ຄະນະນຳ, ພະນັກງານ-ລັດຖະກອນ ຕະຫຼອດຮອດບັນດາຫົວໜ່ວຍທຸລະກິດ, ຫ້າງຮ້ານຕ່າງໆ ເຫັນໄດ້ຄວາມສຳຄັນຂອງວັນດັ່ງກ່າວ. ນອກຈາກນັ້ນ, ຍັງເປັນການຍູ້ແຮງນະໂຍບາຍ 6 ສ ໂດຍສະເພາະ ສ ສີຂຽວ ແລະ ທີ່ສຳຄັນຍັງເປັນການສ້າງເຂດສີຂຽວ, ສ້າງຄວາມສວຍງາມ, ອາກາດສົດຊື່ນ ນັບແຕ່ປະຕູໂຂງທາງເຂົ້າຈົນຮອດຕຶກອາຄານດ່ານສາກົນຂົວມິດຕະພາບ 1 ນວ.
 |
ສຳລັບຂະບວນການປູກຕົ້ນໄມ້ໃນທົ່ວ ນວ, ຍັງຈະສືບຕໍ່ປູກຕໍ່ໆໄປຢ່າງເປັນຂະບວນຟົດຟື້ນ. ສະນັ້ນ ຮຽກຮ້ອງມາຍັງບັນດາທ່ານ ຊ່ວຍປຸກລະດົມພະນັກງານ ຕະຫຼອດຮອດຄອບຄົວໃນຂອບເຂດຕົນເອງຮັບຜິດຊອບຈົ່ງຊ່ວຍກັນປູກຕົ້ນໄມ້ ແລະ ບົວລະບັດປົກປັກຮັກສາເພື່ອໃຫ້ເປັນຮົ່ມ ເປັນເຂດສີຂຽວ ເຮັດໃຫ້ອາກາດສົດຊື່ນ ແລະ ໃຫ້ໄດ້ຊົມໃຊ້ໃນຕໍ່ໜ້າ. ດັ່ງຄຳຂວັນທີ່ວ່າ: ຈົ່ງຊ່ວຍກັນປູກຕົ້ນໄມ້ໃຫ້ເປັນປ່າ ເພື່ອເປັນສິນຄ້າ ແລະ ປະ ກອບສ່ວນໃນການປົກປັກຮັກສາສິ່ງແວດລ້ອມ ຫຼຸດຜ່ອນມົນລະພິດທາງອາກາດ.
ຂ່າວ: ສົມສະຫວັນ
ຄໍາເຫັນ