 |
ທ່ານ ພູຊະນະ ໄຊໂກສີ ຫົວໜ້າຄະນະຄຸ້ມຄອງດ່ານສາກົນຂົວມິດຕະພາບ 3ລາຍງານວ່າ: ໃນໄລຍະ 09 ເດືອນຂອງປີ2026ສາມາດເກັບລາຍຮັບໄດ້1,085,127,000,000 ກີບ ເທົ່າກັບ 84% ຂອງແຜນການປີ, ສະເພາະການປະຕິບັດລາຍຮັບໃນໄລຍະເດືອນ 09/ 2026 ປະຕິບັດໄດ້ 104 ຕື້ກີບ,ເທົ່າກັບ154% ຂອງແຜນການເດືອນ, ຜົນການຈັດເກັບລາຍຮັບໃນງວດ 3/2026 ປະຕິບັດໄດ້ 337 ຕື້ກວ່າກີບ ເທົ່າກັບ196% ຂອງແຜນງວດ, ເພີ້ມຂຶ້ນ 32.97% ເມື່ອທຽບໃສ່ກັບໄລຍະດຽວກັນຂອງປີ 2025 .
ທ່ານ ຫົວໜ້າຄະນະຄຸ້ມຄອງດ່ານສາກົນຂົວມິດຕະພາບ 3 ຍັງໄດ້ສະເໜີແນວທາງແກ້ໄຂການຍ້າຍຈຸດບໍລິການ, ສະເໜີປັບປຸງມາດຕະການອັດຊ່ອງວ່າງ ແລະ ໃຫ້ລົດຂົນສົ່ງສິນຄ້າທຸກປະເພດຂາເຂົ້າໄປໃຊ້ບໍລິການພາຫະນະ,ຄົນຢູ່ທ່າບົກທ່າແຂກເລີ້ມແຕ່ວັນທີ 01 ມັງກອນ 2027 ເປັນຕົ້ນໄປ.
ໂອກາດດັ່ງກ່າວ, ຂະແໜງການປິ່ນອ້ອມພາຍໃນດ່ານລວມເຖິງຜູ້ປະກອບການທີ່ກ່ຽວຂ້ອງໄດ້ມີການປະກອບຄໍາເຫັນ ແລະ ສະເໜີວິທີການແກ້ໄຂເພື່ອອັດຊ່ອງວ່າງ ຄືຕ້ອງສ້າງຄວາມເປັນເອກະພາບດ້ານການຄຸ້ມຄອງ, ສະເໜີໃຫ້ການນໍາຂອງແຂວງຊຸກຍູ້ໃຫ້ຂະແໜງການປະຈໍາດ່ານເຂົ້າໃຈຢ່າງຈະແຈ້ງ ແລະ ປະຕິບັດຕາມດໍາລັດ 643 /ລບ ແລະ ຂໍ້ຕົກລົງເລກທີ 240 / ລບ ຢ່າງເຂັ້ມງວດ, ສະເໜີໃຫ້ແຂວງຊ່ວຍພິຈາລະນາອະນຸມັດງົບປະມານໃນການຕິດຕັ້ງຈໍ LCD ໃສ່ຫ້ອງປະຊຸມຂົວມິດຕະພາບ 3 ,ນອກນັ້ນຍັງສະເໜີແກ້ໄຂບັນຫາພື້ນຖານໂຄງລ່າງພາຍໃນດ່ານ.
ທ່ານ ໝັ້ນຍືນ ຄິນສະໝອນ ໄດ້ຊີ້ນໍາໃຫ້ຄະນະຄຸ້ມຄອງດ່ານສາກົນຂົວມິດຕະພາບ 3 ກໍານົດຄືນຈໍານວນພະນັກງານພາຍໃນດ່ານເພື່ອຕອບສະໜອງໃຫ້ພຽງພໍ ແລະ ແທດເໝາະກັບສະພາບຄວາມເປັນຈິງຂອງໜ້າທີ່ວຽກງານ ເປັນຕົ້ນແມ່ນໃຫ້ມີການກໍານົດຕໍາແໜ່ງງານຂອງແຕ່ລະຂະແໜງການຄືນໃໝ່, ພ້ອມກັນນັ້ນຕ້ອງໄດ້ມີການຍົກລະດັບ, ບໍາລຸງສ້າງພະນັກງານໃຫ້ມີຄວາມຮູ້-ຄວາມສາມາດ,ມີຄວາມຊໍານານງານ, ໃຫ້ມີການປັບປຸງແບບແຜນວິທີເຮັດວຽກ, ກົນໄກການປະສານງານ, ພາລະບົດບາດ, ຂອບເຂດ, ສິດ, ໜ້າທີ່ ແລະ ມອບໃຫ້ເຈົ້າໜ້າທີ່ແຕ່ລະຂະແໜງການພາຍໃນດ່ານເພີ້ມທະວີຄວາມຮັບຜິດຊອບໃຫ້ສູງຂຶ້ນ, ເອົາໃຈໃສ່ໃນການຕິດຕາມກວດກາພາຫະນະ, ສິນຄ້າ ແລະ ຄົນເຂົ້າ-ອອກເມືອງຢ່າງເຂັ້ມງວດ, ເອົາໃຈໃສ່ຕິດຕາມກວດກາ, ແກ້ໄຂປະກົດການຫຍໍ້ທໍ້ພາຍໃນດ່ານເຊັ່ນ : ການສະກັດກັ້ນການລັກລອບນໍາເຂົ້າ-ສົ່ງອອກສິ່ງຜິດກົດໝາຍ, ການຮັກສາຄວາມເປັນລະບຽບຮຽບຮ້ອຍພາຍໃນດ່ານ, ພ້ອມທັງມີທິດທາງແຜນການໃນການຫັນດ່ານໃຫ້ກຸ້ມຕົນເອງທາງດ້ານງົບປະມານລາຍຈ່າຍບໍລິຫານ.
ຄໍາເຫັນ