ຊີກໂລກເໜືອ ແລະ ຊີກໂລກໃຕ້ ໄດ້ປະສົບກັບສະພາບອາກາດຮຸນແຮງທີ່ແຕກຕ່າງກັນຢ່າງຫຼວງຫຼາຍໃນເດືອນມັງກອນຜ່ານມາ. ໂດຍຊີກໂລກເໜືອໄດ້ປະສົບກັບຄື້ນຄວາມໜາວເຢັນທີ່ຮຸນແຮງ, ໂດຍສະເພາະໃນເອີຣົບ ແລະ ອາເມລິກາເໜືອ ຊຶ່ງເຮັດໃຫ້ເອີຣົບປະເຊີນກັບເດືອນມັງກອນທີ່ໜາວເຢັນທີ່ສຸດນັບຕັ້ງແຕ່ປີ 2010, ໂດຍມີອຸນຫະພູມສະເລ່ຍ -2.34 ອົງສາ. ຂະນະດຽວກັນ, ໃນຊີກໂລກໃຕ້, ອຸນຫະພູມທີ່ເພີ່ມສູງຂຶ້ນທຳລາຍສະຖິຕິໄດ້ເຮັດໃຫ້ເກີດໄຟ ໄໝ້ປ່າຮຸນແຮງໃນອົສຕຣາລີ ແລະ ປາຕາໂກເນຍ, ລວມທັງນໍ້າຖ້ວມທີ່ເກີດຈາກຝົນຕົກໜັກໃນພາກໃຕ້ຂອງອາຟຣິກາໃນທ້າຍເດືອນ.
ທ່ານ ຊາແມນທາ ເບີເຈສ ຫົວໜ້າຍຸດທະສາດດ້ານສະພາບອາກາດຂອງສູນພະຍາກອນອາກາດລະດັບກາງຂອງເອີຣົບ ກ່າວວ່າ: ເດືອນມັງກອນ 2026 ເປັນການເຕືອນທີ່ຊັດເຈນວ່າລະບົບສະພາບອາກາດສາມາດເຮັດໃຫ້ເກີດຄວາມໜາວເຢັນທີ່ສຸດໃນພາກພື້ນໜຶ່ງ, ໃນຂະນະທີ່ກໍ່ໃຫ້ເກີດຄວາມຮ້ອນທີ່ສຸດໃນເວລາດຽວກັນໃນອີກພາກພື້ນໜຶ່ງ.
ເຖິງແມ່ນວ່າກິດຈະກຳຂອງມະນຸດຍັງຄົງເປັນຕົວຂັບເຄື່ອນຫຼັກຂອງພາວະໂລກຮ້ອນໃນໄລຍະຍາວ, ແຕ່ເຫດ ການທີ່ຜ່ານມາໄດ້ເນັ້ນໃຫ້ເຫັນເຖິງຄວາມຈຳເປັນທີ່ຈະຕ້ອງເສີມສ້າງຄວາມພ້ອມ ແລະ ເລັ່ງການປັບຕົວເຂົ້າກັບສະພາບອາກາດທີ່ຮ້າຍແຮງຂຶ້ນເລື້ອຍໆ. ເພື່ອກຽມຄວາມພ້ອມໃຫ້ສັງຄົມໃນການຮັບມືກັບຄວາມສ່ຽງດ້ານສະພາບອາກາດໃນອະນາຄົດ.
ອຸນຫະພູມໜ້ານ້ຳທະເລສະເລ່ຍໃນເດືອນມັງກອນ 2026 ລະຫວ່າງເສັ້ນຂະໜານ 60 ອົງສາໃຕ້ ແລະ ເສັ້ນຂະໜານ 60 ອົງສາເໜືອ ແມ່ນ 20.68 ອົງສາ ຊຶ່ງເປັນອຸນຫະພູມສູງສຸດອັນດັບ 4 ຂອງສະຖິຕິເດືອນມັງກອນ, ໂດຍຕ່ຳກວ່າສະຖິຕິເດືອນມັງກອນ 2024 ຢູ່ 0.29 ອົງສາ. ຂະນະທີ່ປະລິມານນ້ຳກ້ອນທະເລອາກຕິກຕ່ຳກວ່າລະດັບສະເລ່ຍ 6% ຊຶ່ງເປັນລະດັບຕໍ່າສຸດອັນດັບ 3 ຂອງສະຖະຕິເດືອນດຽວກັນ, ສ່ວນປະລິມານນ້ຳກ້ອນໃນທະເລອັນຕາກຕິກຕ່ຳກວ່າລະດັບສະເລ່ຍ 8%.
ຄື້ນຂອງສະພາບອາກາດທີ່ຮຸນແຮງໄດ້ພັດຜ່ານເອີຣົບໃນອາທິດທີ່ຜ່ານມາ, ໂດຍມີພາຍຸຮຸ່ນແຮງຈາກມະຫາສະໝຸດອັດລັງຕິກ ເຮັດໃຫ້ເກີດນ້ຳຖ້ວມໃນບັນດາປະເທດພາກໃຕ້ ແລະ ມວນອາກາດເຢັນຈາກອາກຕິກໄດ້ເຂົ້າປົກຄຸມພື້ນທີ່ບາງສ່ວນຂອງເອີຣົບກາງ ແລະ ເໜືອ. ເຮັດໃຫ້ມີຜູ້ເສຍຊີວິດຫຼາຍສິບຄົນ, ປະຊາຊົນນັບພັນຄົນຕ້ອງຍົກຍ້າຍ ແລະ ເກີດຄວາມບໍ່ສະຫງົບຢ່າງກວ້າງຂວາງ.
ຄໍາເຫັນ