ຂໍ້ມູນສະແດງໃຫ້ເຫັນວ່າ: ຈຳນວນຜູ້ມີວຽກເຮັດງານທຳຫຼຸດລົງ 0.4% ມາຢູ່ທີ່ 68.17 ລ້ານຄົນ ຊຶ່ງເປັນການຫຼຸດລົງຄັ້ງທຳອິດໃນຮອບ 5 ເດືອນ, ໃນຂະນະທີ່ຈຳນວນຜູ້ວ່າງງານເພີ່ມຂຶ້ນ 3.2% ມາຢູ່ທີ່ 1.91 ລ້ານຄົນ, ເພີ່ມຂຶ້ນເປັນເດືອນທີສອງຕິດຕໍ່ກັນ.
ໃນບັນດາຜູ້ທີ່ວ່າງງານ, ພົບວ່າຜູ້ຖືກປົດອອກຈາກວຽກ ມີຈຳນວນ 450,000 ຄົນ ຊຶ່ງເປັນໂຕເລກທີ່ບໍ່ປ່ຽນແປງຈາກເດືອນທັນວາ. ໃນຂະນະດຽວກັນ, ມີຜູ້ທີ່ລາອອກຈາກວຽກໂດຍສະໝັກໃຈມີຈຳນວນ 820,000 ຄົນ. ໂດຍປົກກະຕິແລ້ວເປັນການລາອອກເພື່ອສະແຫວງຫາເງື່ອນໄຂການເຮັດວຽກທີ່ດີກວ່າເກົ່າ, ໂດຍໂຕເລກດັ່ງກ່າວເພີ່ມຂຶ້ນ 7.9%. ສ່ວນຈຳນວນຜູ້ທີ່ເລີ່ມຊອກວຽກເຮັດງານທຳໃໝ່ຫຼຸດລົງ 3.6% ມາຢູ່ທີ່ 540,000 ຄົນ.
ເຈົ້າໜ້າທີ່ກະຊວງດັ່ງກ່າວ ລະບຸວ່າ: ພະນັກງານຫຼາຍຄົນອາດຕັດສິນໃຈອອກຈາກວຽກຫຼັງຈາກໄດ້ຮັບໂບນັດໃນລະດູໜາວ ເພື່ອຊອກຫາຕຳແໜ່ງທີ່ມີລາຍໄດ້ສູງກວ່າເກົ່າ.
ໃນຂະນະດຽວກັນ, ໜັງສືພິມ Kyodo News ລາຍງານວ່າ: ຂໍ້ມູນອີກຊຸດໜຶ່ງຈາກກະຊວງສາທາລະນະສຸກ, ແຮງງານ ແລະ ສະຫວັດດີການ ສະແດງໃຫ້ເຫັນວ່າ, ອັດຕາສ່ວນຕຳແໜ່ງງານວ່າງຕໍ່ຜູ້ຊອກວຽກໄດ້ຫຼຸດລົງ 0.02 ຈຸດຈາກເດືອນທັນວາມາເປັນ 1.18 ຊຶ່ງໝາຍຄວາມວ່າມີຕຳແໜ່ງງານວ່າງ 118 ຕຳແໜ່ງສຳລັບຜູ້ຊອກວຽກທຸກໆ 100 ຄົນ. ຖືເປັນການຫຼຸດລົງຄັ້ງທຳອິດໃນຮອບສາມເດືອນ.
ເມື່ອພິຈາລະນາແຍກຕາມອຸດສາຫະກຳ ພົບວ່າ: ຈຳນວນຕຳແໜ່ງງານໃໝ່ໃນຂະແໜງບໍລິການທີ່ພັກ ແລະອາຫານໄດ້ຫຼຸດລົງ 13.8%, ໃນຂະນະທີ່ຂະແໜງການຂາຍສົ່ງ ແລະ ຂາຍຍ່ອຍ ໃນເດືອນມັງກອນຜ່ານມາ ມີການຈ້າງພະນັກງານໃໝ່ຫຼຸດລົງ 11.6% ເມື່ອທຽບກັບປີກ່ອນ. ໃນທາງກົງກັນຂ້າມ, ຕຳແໜ່ງງານໃໝ່ໃນຂະແໜງການສຶກສາເພີ່ມຂຶ້ນ 4.3%, ຂະແໜງການຜະລິດ ເພີ່ມຂຶ້ນ 0.8% ແລະ ຂະແໜງການຄົ້ນຄວ້າວິທະຍາສາດ, ບໍລິການວິຊາຊີບ ແລະ ວິຊາການ ເພີ່ມຂຶ້ນ 0.3%.
ເຈົ້າໜ້າທີ່ກະຊວງສາທາລະນະສຸກ, ແຮງງານ ແລະ ສະຫວັດດີການ ກ່າວວ່າ: ລາຄາສິນຄ້າ ແລະ ຄ່າໃຊ້ຈ່າຍດ້ານແຮງງານທີ່ເພີ່ມຂຶ້ນ ພວມເລັ່ງຄວາມພະຍາຍາມໃນການຫຼຸດຜ່ອນຈຳນວນພະນັກງານ ແລະ ປັບປຸງປະສິດທິພາບ, ລວມທັງການນຳເອົາປັນຍາປະດິດ (AI) ມາໃຊ້.
ຄໍາເຫັນ