ບົດລາຍງານລະບຸວ່າ: ການສົ່ງອອກໃນເດືອນສິງຫາເພີ່ມຂຶ້ນ 19.3% ເປັນ 10.05 ພັນຕື້ເຢນ ຊຶ່ງໄດ້ຮັບການຊຸກຍູ້ຈາກການສົ່ງອອກທີ່ເຂັ້ມແຂງຂອງເຊມິຄອນດັກເຕີ ແລະ ລົດຍົນ.
ສ່ວນການນຳເຂົ້າຂອງຍີ່ປຸ່ນໃນເດືອນສິງຫາໄດ້ເພີ່ມຂຶ້ນ 28% ເມື່ອທຽບກັບໄລຍະດຽວກັນຂອງປີກາຍ, ບັນລຸ 11.15 ພັນຕື້ເຢນ ຊຶ່ງໄດ້ຮັບແຮງຂັບເຄື່ອນຈາກການນຳເຂົ້ານ້ຳມັນດິບ ຈາກ ສະຫະລັດ ອາເມຣິກາ ທີ່ມີມູນຄ່າເພີ່ມຂຶ້ນຫຼາຍກວ່າ 11 ເທົ່າ.
ຍີ່ປຸ່ນ, ອາໄສການນຳເຂົ້ານ້ຳມັນດິບຈາກຕາເວັນອອກກາງຢ່າງຫຼວງຫຼາຍ, ໄດ້ເລັ່ງຄວາມພະຍາຍາມໃນການຊອກຫານ້ຳມັນເຊື້ອໄຟຈາກສະຖານທີ່ອື່ນໆ ລວມທັງສະຫະລັດ ອາເມຣິກາ, ເນື່ອງຈາກການຂົນສົ່ງຜ່ານຊ່ອງແຄບຮໍມຸສໄດ້ຖືກຢຸດສະງັກນັບຕັ້ງແຕ່ ສະຫະລັດ ອາເມຣິກາ ແລະ ອິສຣາແອນ ໂຈມຕີອີຣານໃນທ້າຍເດືອນກຸມພາ.
ນັກວິເຄາະຈາກສະຖາບັນຄົ້ນຄວ້າອິໂຕຈູກ່າວວ່າ: ການເພີ່ມຂຶ້ນຂອງລາຄານໍ້າມັນດິບໄດ້ເຮັດໃຫ້ຄ່າໃຊ້ຈ່າຍໃນການນຳເຂົ້າຂອງຍີ່ປຸ່ນເພີ່ມຂຶ້ນ ຊຶ່ງເປັນສາເຫດທີ່ເຮັດໃຫ້ການຂາດດຸນການຄ້າຫຼາຍຂຶ້ນໃນເດືອນສິງຫາ. ປັດຈຸບັນລາຄານ້ຳມັນດິບໄດ້ເພີ່ມຂຶ້ນເກີນ 100 ໂດລາຕໍ່ບາເຣວ ຊຶ່ງປັດໄຈດັ່ງກ່າວອາດຈະນຳໄປສູ່ການຂາດດຸນການຄ້າຢ່າງຕໍ່ເນື່ອງ ແລະ ເຮັດໃຫ້ຍີ່ປຸ່ນຍາກທີ່ຈະກັບຄືນສູ່ສະພາບເກີນດຸນການຄ້າ.
ຄໍາເຫັນ