ຂ່າວລະບຸວ່າ: ມາຮອດວັນທີ 11 ມີນາ 2026, EU ກຳລັງໃຫ້ການຊ່ວຍເຫຼືອມູນຄ່າ 100 ລ້ານເອີໂຣແກ່ລີບັງ ເພື່ອຊ່ວຍແກ້ໄຂວິກິດການມະນຸດສະທຳທີ່ເກີດຈາກຂໍ້ຂັດແຍ່ງລະຫວ່າງ ສະຫະລັດ ອາເມຣິກາ - ອິສຣາແອນ ກັບ ອີຣານ ຊຶ່ງເຮັດໃຫ້ລີບັງມີຜູ້ເສຍຊີວິດຈຳນວນຫຼາຍຮ້ອຍຄົນ ແລະ ມີຜູ້ອົບພະຍົບຈຳນວນຫຼາຍ ໃນອາທິດຜ່ານມາ.
ທ່ານນາງ ເອີຊູຣາ ວອນ ເດີ ເລເຢນ ປະທານຄະນະກຳມະການ EU ກ່າວວ່າ: ທາງກຸ່ມໄດ້ຈັດສົ່ງເຄື່ອງບັນເທົາທຸກຫຼາຍກວ່າ 40 ໂຕນໄປຍັງລີບັງໃນວັນທີ 10 ມີນາຜ່ານມາ ແລະ ວາງແຜນຈະຈັດຖ້ຽວບິນຂົນສົ່ງເຄື່ອງຊ່ວຍເຫຼືອດ້ານມະນຸດສະທຳຕື່ມອີກ.
ເຈົ້າໜ້າທີ່ລີບັງລະບຸວ່າ: ມີປະຊາຊົນຫຼາຍກວ່າ 800,000 ຄົນ ຕ້ອງອົບພະຍົບພາຍໃນປະເທດ. ຢ່າງໃດກໍຕາມ, ທ່ານ ອາເດລ ນັສຊາ ລັດຖະມົນຕີກະຊວງຍຸຕິທຳລີບັງ ໄດ້ເປີດເຜີຍວ່າ: ໂຕເລກນີ້ນັບສະເພາະຜູ້ທີ່ມາລົງທະບຽນດ້ວຍຕົນເອງເທົ່ານັ້ນ, ສະນັ້ນຈຳນວນທີ່ແທ້ຈິງອາດຈະສູງກວ່ານີ້ຫຼາຍ.
ກ່ອນໜ້ານີ້, ທ່ານ ທອມ ເຟຣດເຊີ ຫົວໜ້າຝ່າຍມະນຸດສະທຳຂອງສະຫະປະຊາຊາດ ໄດ້ເຕືອນວ່າ: ລີບັງ ແລະ ພາກພື້ນນີ້ກຳລັງປະເຊີນກັບ “ໄລຍະເວລາທີ່ມີອັນຕະລາຍຮ້າຍແຮງ.”
ທັງນີ້, ອົງການຄຸ້ມຄອງຄວາມສ່ຽງໄພພິບັດຂອງລີບັງລາຍງານວ່າ: ມີຜູ້ເສຍຊີວິດຢ່າງໜ້ອຍ 634 ຄົນ ນັບຕັ້ງແຕ່ອິສຣາເອນ ເພີ່ມການໂຈມຕີລີບັງໃນອາທິດທີ່ຜ່ານມາ.
ຄໍາເຫັນ