ສາເຫດຂອງປະກົດການຄັ້ງນີ້ເກີດຈາກມວນອາກາດຮ້ອນຈາກທະເລຊາຍຊາຮາຣາທີ່ເຄື່ອນທີ່ໄປທາງທິດເໜືອ, ໂດຍມີລະບົບຄວາມກົດອາກາດສູງ ຫຼື "ພາຍຸໄຊໂຄລນອາຟຣິກາ," ເປັນແຮງຂັບເຄື່ອນທີ່ສ້າງປະກົດການທີ່ນັກອຸຕິນິຍົມວິທະຍາເອີ້ນວ່າ: "ໂດມຄວາມຮ້ອນ." (Heat Dome) ຊຶ່ງເຮັດໜ້າທີ່ກັກເກັບອາກາດຮ້ອນຫຼາຍໄວ້ເທິງພາກພື້ນເອີຣົບຕາເວັນຕົກ ແລະ ກາງ ຊຶ່ງສົ່ງຜົນໃຫ້ອຸນຫະພູມເພີ່ມຂຶ້ນຢ່າງຕໍ່ເນື່ອງເປັນໄລຍະເວລາທີ່ຍາວນານຜິດປົກກະຕິ, ໂດຍສະເພາະໃນໄລຍະ Summer Solstice ຫຼື ມື້ທີ່ກາງເວັນຍາວທີ່ສຸດຂອງປີໃນຊີກໂລກເໜືອ ຊຶ່ງປົກກະຕິແລ້ວແມ່ນຈຸດເລີ່ມຕົ້ນຂອງໄລຍະເວລາທີ່ຮ້ອນທີ່ສຸດຂອງປີ.
ໃນປະເທດອີຕາລີ, ເຈົ້າໜ້າທີ່ໄດ້ຍົກລະດັບການແຈ້ງເຕືອນໄພເປັນ "ສີແດງ" ໃນ 8 ເມືອງໃຫຍ່, ລວມທັງເມືອງມິລານ ແລະ ຟລໍເຣນສ, ຫຼັງຈາກອຸນຫະພູມໄດ້ເພີ່ມຂຶ້ນສູງກວ່າ 35 ອົງສາ ເປັນເວລາຫຼາຍມື້ຕິດຕໍ່ກັນ. ໃນຂະນະດຽວກັນ, ປະເທດແອັດສະປາຍ ລາຍງານວ່າພື້ນທີ່ກວ້າງໃຫຍ່ຂອງແຫຼມໄອບີເຣຍ ແລະ ເກາະມາຢໍກາ ອາດຈະມີອຸນຫະພູມສູງເຖິງ 40 ອົງສາ ແລະ ຄາດວ່າຄື້ນຄວາມຮ້ອນຈະແກ່ຍາວໄປຈົນຮອດກາງອາທິດ.
ຄວາມຮ້ອນທີ່ຮຸນແຮງຍັງສົ່ງຜົນກະທົບໂດຍກົງຕໍ່ພື້ນຖານໂຄງລ່າງ, ທ່ານ ເຈນ ຄາສເທັກສ ຜູ້ອຳນວຍການໃຫຍ່ຂອງບໍລິສັດລົດໄຟແຫ່ງຊາດຝຣັ່ງ (SNCF) ເປີດເຜີຍວ່າ: ອຸນຫະພູມທີ່ສູງເກີນໄປເຮັດໃຫ້ລາງລົດໄຟຂະຫຍາຍອອກ ແລະ ມີຄວາມສ່ຽງທີ່ຈະທຳລາຍສາຍໄຟຟ້າເທິງຫົວລົດໄຟ. ຈົນເຮັດໃຫ້ມີການຍົກເລີກການບໍລິການລົດໄຟລະຫວ່າງເມືອງຫຼາຍກວ່າ 71 ຖ້ຽວ, ພ້ອມທັງລະດົມພະນັກງານຫຼາຍກວ່າ 5,500 ຄົນລົງພື້ນທີ່ເພື່ອຕິດຕາມກວດກາ ແລະ ສ້ອມແປງສຸກເສີນ ແລະ ແນະນຳໃຫ້ຜູ້ໂດຍສານທີ່ມີຄວາມສ່ຽງຄວນເລື່ອນການເດີນທາງຂອງເຂົາເຈົ້າອອກໄປ.
ໃນປະເທດເຢຍລະມັນ, ນອກຈາກອຸນຫະພູມທີ່ສູງເຖິງ 38 ອົງສາແລ້ວ, ປະເທດຍັງປະເຊີນກັບພາຍຸຝົນຟ້າຄະນອງຮຸນແຮງໃນພາກຕາເວັນອອກຂອງເຢຍລະມັນ, ໂດຍສະເພາະໃນເບີລິນ ຊຶ່ງຝົນທີ່ຕົກໜັກເຮັດໃຫ້ເທດສະການດົນຕີກາງແຈ້ງ Fete de la Musique ຖືກໂຈະໄວ້ຊົ່ວຄາວ.
ໃນຂະນະດຽວກັນ, ຜົນກະທົບຕໍ່ສິ່ງແວດລ້ອມເລີ່ມຮຸ່ນແຮງຂຶ້ນ. ໂດຍສູນຊ່ວຍເຫຼືອສັດປ່າໃກ້ກັບເມືອງນາມູຣ ປະເທດແບນຊິກ ລາຍງານວ່າ: ມີສັດປ່າຫຼາຍກວ່າ 150 ໂຕ, ໂດຍສະເພາະນົກນ້ອຍ ໄດ້ຮັບການປິ່ນປົວຍ້ອນຄວາມກົດດັນຈາກຄວາມຮ້ອນ.
ທັງນີ້, ຜູ້ຊ່ຽວຊານເນັ້ນໜັກວ່າສະຖານະການນີ້ສະທ້ອນໃຫ້ເຫັນເຖິງທ່າອ່ຽງຂອງຄື້ນຄວາມຮ້ອນທີ່ເກີດຂຶ້ນເລື້ອຍໆ ແລະ ຮຸນແຮງຂຶ້ນໃນເອີຣົບ ຊຶ່ງເປັນຜົນໂດຍກົງຈາກການປ່ຽນແປງຂອງດິນຟ້າອາກາດທີ່ໂລກກຳລັງປະເຊີນຢູ່ໃນປັດຈຸບັນ.
ຄໍາເຫັນ