 |
ທ່ານ ສຸຂິໂຕ ຫົງວັນທອງ ຮອງຫົວໜ້າຝ່າຍຄຸ້ມຄອງລະບົບໄຟຟ້າພາກໃຕ້ ໄດ້ໃຫ້ຮູ້ວ່າ: ຝ່າຍຄຸ້ມຄອງລະບົບໄຟຟ້າພາກໃຕ້ ແມ່ນຝາຍໜຶ່ງທີ່ຂຶ້ນກັບລັດວິສາຫະກິດໄຟຟ້າລາວ ປະກອບມີ 6 ສາຂາແຂວງຂຶ້ນກັບ ຄື: ແຂວງຄໍາມ່ວນ, ສະຫວັນນະເຂດ, ສາລະວັນ, ຈໍາປາສັກ, ອັດຕະປື ແລະ ແຂວງເຊກອງ, ມີພະນັກງານສົມບູນ ແລະ 90% ຈໍານວນ 1,499 ຄົນຍິງ 264 ຄົນ, ມີແຫຼ່ງຜະລິດ 29 ເຂື່ອນ, ມີສະຖານີໄຟຟ້າ 230/115/22 ກິໂລໂວນ 2 ແຫ່ງ, ສະຖານີ 115/22 ກິໂລໂວນ 18 ແຫ່ງ, ຕາຂ່າຍແຮງດັນສູງ 115 ກິໂລໂວນ 2,783 ກິໂລແມັດ/ວົງຈອນ, ຕາຂ່າຍແຮງດັນກາງ 15,036 ກິໂລແມັດ/ວົງຈອນ, ຕາຂ່າຍແຮງດັນຕໍ່າ 10,054 ກິໂລແມັດ/ວົງຈອນ, ມີໝໍ້ແປງໄຟຟ້າ 14,159 ໜ່ວຍ ແລະ ມີໝໍ້ນັບໄຟ 649,291 ໜ່ວຍ.
ໃນປີ 2025 ຜ່ານມາ, ຄະນະພັກ, ຄະນະນໍາຂອງຝ່າຍ ແລະ ສາຂາ ໄດ້ເອົາໃຈໃສ່ນໍາພາ-ຊີ້ນໍາພະນັກງານ-ກໍາມະກອນຈັດຕັ້ງປະຕິບັດວຽກງານວິຊາສະເພາະ ໂດຍຖືເອົາການບໍລິການສະໜອງໄຟຟ້າຮັບໃຊ້ສັງຄົມ, ການຄຸ້ມຄອງລະບົບ ແລະ ຜັນຂະຫຍາຍແຜນການປະຕິຮູບໃນ 7 ກຸ່ມວຽກ 26 ແຜນງານ ທີ່ຕິດພັນກັບການດໍາເນີນທຸລະກິດຂອງຝ່າຍ ເພື່ອເພີ່ມປະສິດທິພາບໃນການບໍລິຫານໜີ້ສິນ, ການຈັດຕັ້ງປະຕິບັດແຜນ ແລະ ວິໄສທັດ, ວາງນະໂຍບາຍບໍລິການ ແລະ ຄຸ້ມຄອງລະບົບໄຟຟ້າທັງສາຍສົ່ງ-ສະຖານີ ເພື່ອຮັບປະກັນການຮັບ-ສົ່ງພະລັງງານໄຟຟ້າ ຈາກແຫຼ່ງຜະລິດໄປສູ່ຜູ້ຊົມໃຊ້ທັງພາຍໃນ ແລະ ຕ່າງປະເທດໃຫ້ມີຄວາມຕໍ່ເນື່ອງ ແລະ ມີຄຸນນະພາບ; ຮັບພະລັງງານໄຟຟ້າຈາກການໄຟຟ້າຝ່າຍຜະລິດແຫ່ງປະເທດໄທ ຫຼືEGAT (3 ຈຸດພາກໃຕ້) ທັງໝົດ 782 ຈີກະວັດໂມງ ທຽບໃສ່ປີ 2024ຫຼຸດລົງ 428 ຈີກະວັດໂມງ; ສົ່ງພະລັງງານໄຟຟ້າ ໃຫ້ EGAT ທັງໝົດ 1,065 ຈີກະວັດໂມງ ທຽບໃສ່ປີ 2024 ເພີ່ມຂຶ້ນ 341 ຈີກະວັດໂມງ; ສົ່ງພະລັງງານໄຟຟ້າໃຫ້ປະເທດກໍາປູເຈຍ (3 ຈຸດພາກໃຕ້) ຈໍານວນ 2,988 ຈີກະວັດໂມງ ທຽບໃສ່ປີ 2024 ເພີ່ມຂຶ້ນ 116 ຈີກະວັດໂມງ; ປະຊາຊົນໃນ 6 ແຂວງ ໄດ້ຊົມໃຊ້ໄຟຟ້າກວມເອົາ 98.37%. ໃນນີ້, ມີເມືອງໄດ້ໃຊ້ໄຟຟ້າ 52 ເມືອງ ກວມເອົາ 100%, ມີບ້ານໄດ້ໃຊ້ໄຟຟ້າ 3,072 ບ້ານ ກວມເອົາ 97.09% ແລະ ມີຄອບຄົວໄດ້ໃຊ້ໄຟຟ້າ 561,915 ຄອບຄົວ ກວມເອົາ 98.02%.
ທ່ານ ສຸຂິໂຕ ຫົງວັນທອງ ໃຫ້ຮູ້ຕື່ມວ່າ: ໃນປີ 2026 ຄະນະພັກ, ຄະນະນໍາຝ່າຍ ແລະ ສາຂາ ຈະສືບຕໍ່ນໍາພາ-ຊີ້ນໍາພະນັກງານ, ກໍາມະກອນ ປະຕິບັດວຽກງານວິຊາສະເພາະ ຕາມແຜນສູ້ຊົນ 7 ຕົວຊີ້ວັດ, ຖືເອົາວຽກງານບໍລິການ-ຄຸ້ມຄອງລະບົບເປັນສໍາຄັນ ເພື່ອສ້າງຮາກຖານທີ່ເຂັ້ມແຂງ, ແກ້ໄຂຈຸດອ່ອນ-ຂໍ້ຄົງຄ້າງ ແລະ ເພີ່ມປະສິດທິພາບໃນດ້ານວຽກງານ ພ້ອມການບໍລິການສະໜອງໄຟຟ້າໃຫ້ສັງຄົມໄດ້ຊົມໃຊ້ຢ່າງທົ່ວເຖິງ ແລະ ມີຄວາມປອດໄພ.
(ຂ່າວ-ພາບ: ສັນຍາ)
ຄໍາເຫັນ