ຟຟລຫຼຸດລາຍຈ່າຍ-ເພີ່ມລາຍຮັບ-ປັບກົງຈັກການຈັດຕັ້ງ

ໂດຍ: ຣັດສະໝີ ດວງສັດຈະ 
ລັດວິສາຫະກິດໄຟຟ້າລາວ (ຟຟລ) ໄດ້ຈັດຕັ້ງຜັນຂະຫຍາຍບັນດາມະຕິຂອງພັກ ແລະແຜນຍຸດທະສາດຂອງລັດຖະບານ; ເປັນຄວາມຮັບຜິດຊອບໜ້າທີ່ການເມືອງກໍຄືການປະຕິບັດໜ້າທີ່ສະໜັບສະໜູນ ແລະຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດໃນແຕ່ລະໄລຍະເຊິ່ງປັດຈຸບັນທົ່ວປະເທດ ມີ 95,30% ຂອງຈໍານວນຄົວເຮືອນທັງໝົດ ໄດ້ນໍາໄຟຟ້າໃຊ້ແລ້ວ; ຂະນະນີ້ ຟຟລ ພວມສືບຕໍ່ສ້າງຄວາມຍືນຍົງ, ເຂັ້ມແຂງໂດຍເລັ່ງປັບປຸງຕົນເອງ ຕາມມະຕິກົມການເມືຶອງສູນກາງພັກໂດຍສະເພາະມະຕິ 10/ລບ ຂອງລັດຖະບານກ່ຽວກັບແຜນປະຕິຮູບແຕ່ປີ 2021-2025ກໍຄືມະຕິຂອງອົງຄະນະພັກກະຊວງພະລັງງານ ແລະບໍ່ແຮ່,ດ້ວຍຄວາມຮັບຜິດຊອບຂອງຄະນະປະຕິຮູບ ແລະການບໍລິຫານງານຂອງທ່ານ ຈັນທະບູນ ສຸກອາລຸນ ຜູ້ອໍານວຍການໃຫຍ່ ຟຟລ ພ້ອມຄະນະຜູ້ບໍລິຫານແລະພະນັກງານ-ກໍາມະກອນໃນໄລຍະກາງສະໄຫມຜ່ານມາສາມາດຍາດໄດ້ຜົນສໍາເລັດໃນຫຼາຍດ້ານ.
ວຽກຫຼຸດລາຍຈ່າຍ: ໄດ້ສໍາເລັດການດັດແກ້ສັນຍາ ຊື້-ຂາຍໄຟ ກັບຜູ້ຜະລິດໄຟຟ້າຫຼາຍສັນຍາໂດຍຫຼຸດລາຍຈ່າຍຄ່າກະແສໄຟຟ້າຈາກເດີມໄດ້ປະມານ 5% ແລະໄລ່ລຽງສະເພາະໄລຍະປີ 2021-2030 ຈະຫຼຸດລາຍຈ່າຍໄດ້ປະມານ 11,93%;ສໍາເລັດການເຈລະຈາຄືນສັນຍາທີ່ບໍ່ເໝາະສົມ ສາມາດຫຼຸດຜ່ອນມູນຄ່າໂຄງການກໍ່ສ້າງສາຍສົ່ງ-ສະຖານີ ແລະສັນຍາຈັດຊື້-ຈັດຈ້າງໄດ້ມະຫາສານ; ປັບປຸງລະບຽບການຈັດຊື້-ຈັດຈ້າງ,ກຳນົດຫົວໜ່ວຍລາຄາກາງ ບັນດາອຸປະກອນຕ່າງໆໃຫ້ມີຄວາມໂປ່ງໃສ ແລະກວດສອບໄດ້ທຸກໆການຈັດຊື້-ຈັດຈ້າງ; ສໍາເລັດການສ້າງກົນໄກການປະມູນຮັບຊື້ໄຟຟ້າໂຄງການໂຊລາຟາມຂະໜາດນ້ອຍແບບເປີດກວ້າງ 9 ຈຸດໃນລາຄາຕໍ່າກວ່າລາຄາທີ່ເຄີຍຊື້ຜ່ານມາ 30-40%; ສໍາເລັດການເຈລະຈາປັບໂຄງສ້າງໜີ້ເງິນກູ້ກັບບັນດາທະນາຄານ ສາມາດປັບໂຄງສ້າງໜີ້ໄລຍະສັ້ນ-ຍາວນັບແຕ່ປີ 2021 ຮອດປັດຈຸບັນຫຼຸດລົງຈໍານວນໜຶ່ງ; ຫັນມານໍາໃຊ້ລົດໄຟຟ້າເຂົ້າໃນວຽກງານບໍລິຫານ-ບໍລິການສ້ອມແປງຢູ່ເຂດຕົວເມືອງໃຫຍ່; ສ້າງລະບົບການຄວບຄຸມທາງໄກສໍາລັບ LBS ເພື່ອຫຼຸດຜ່ອນເວລາ ແລະການນໍາໃຊ້ບຸກຄະລາກອນເຂົ້າໃນວຽກງານການຄຸ້ມຄອງລະບົບຕາຂ່າຍ.
ວຽກເພີ່ມລາຍຮັບ:ໄດ້ນໍາໃຊ້ຫຼາຍມາດຕະການເພື່ອຫຼຸດຜ່ອນພະລັງງານຕົກເຮ່ຍໃນປີ 2022ປະຕິບັດໄດ້ 7,02%  ທຽບໃສ່ 2021 ຫຼຸດລົງ 2,29% ແລະສູ້ຊົນໃຫ້ຫຼຸດລົງຕື່ມອີກໃນປີ 2023 ເນື່ອງຈາກນໍາໃຊ້ມາດຕະການເດັດຂາດຕໍ່ຜູ້ລັກໃຊ້ໄຟຟ້າ ໂດຍການດໍາເນີນຄະດີທາງແພ່ງ ແລະອາຍາຕໍ່ຜູ້ລະເມີດລວມທັງການປັບປຸງທາງເຕັກນິກ. ປີ 2022 ສາມາດເກັບກູ້ຄືນເງິນຄ່າພະລັງງານ ແລະຄ່າປັບໄໝທັງໝົດ 68 ຕື້ກີບໃນ 211 ລູກຄ້າ, ຮ້ອງຟ້ອງສານຕັດສິນສໍາເລັດ 2 ລູກຄ້າ; ມີນະໂຍບາຍປະກອບທຶນໃຫ້ບັນດາສາຂາທົ່ວປະເທດເພື່ອນໍາໃຊ້ເຂົ້າວຽກງານໃຫ້ບໍລິການກໍ່ສ້າງ-ຕິດຕັ້ງໄຟຟ້າຮັບເໝົາພາຍນອກ ສາມາດສ້າງລາຍຮັບເພີ່ມ; ໄດ້ຮັບເໝົາກໍ່ສ້າງ 3 ສະຖານີໄຟຟ້າ ສາມາດສ້າງລາຍຮັບປະມານ 3,15 ລ້ານໂດລາ(ກໍາໄລ 1,2 ລ້ານໂດລາ), ສ້າງລາຍຮັບຈາກການເຮັດການທົດສອບລະບົບໄຟຟ້າສາຍສົ່ງ, ສະຖານີແລະເຂື່ອນປະມານ 5 ຕື້ກີບ,ໃຫ້ບໍລິການວຽກງານບໍາລຸງຮັກສາ ສາມາດສ້າງລາຍຮັບເພີ່ມໄດ້ 34 ຕື້ກີບ.
ວຽກສ້ອມແປງ-ບໍາລຸງຮັກສາ: ພາກສາຍສົ່ງ-ສະຖານີ ແລະ ພາກລະບົບຈໍາໜ່າຍ, ປັດຈຸບັນໄດ້ຫັນມາໃຫ້ພະນັກງານ ຟຟລ ປະຕິບັດເອງ; ເຊັນສັນຍາຮ່ວມທຸລະກິດກັບບໍລິສັດໂທລະຄົມເພື່ອໝູນໃຊ້ພື້ນຖານໂຄງລ່າງລະບົບສື່ສານສາຍໄຍແກ້ວຂອງ ຟຟລ ເຂົ້າໃນການບໍລິການດ້ານໂທລະຄົມໃຫ້ເກີດປະໂຫຍດສູງສຸດ;ສໍາເລັດການຄົ້ນຄວ້າ ແລະ ຮັບຮອງການນໍາໃຊ້ໂຄງສ້າງລາຄາໄຟຟ້າ ທີ່ບໍ່ແມ່ນພາກທີ່ຢູ່ອາໄສໃນປີ 2023 ຈາກລັດຖະບານ, ພາຍໃຕ້ຫຼັກການລາຄາຈໍາໜ່າຍສົມຄູ່ກັບຕົ້ນທຶນ ເພື່ອຫຼຸດຜ່ອນການເກື້ອກູນລົງເທື່ອລະກ້າວ; ສໍາເລັດການຄົ້ນຄວ້າ ແລະ ຮັບຮອງການອະນຸຍາດເກັບເງິນຄ່າກະແສໄຟຟ້າເປັນເງິນຕາຕ່າງປະເທດນໍາທຸລະກິດສົ່ງອອກ ເພື່ອແກ້ໄຂບັນຫາຂາດດຸນອັດຕາແລກປ່ຽນ.
ສໍາລັບການປັບປຸງໂຄງຮ່າງການຈັດຕັ້ງ:ໄດ້ປະເມີນຄືນຜົນການປັບປຸງເປັນແຕ່ລະໄລຍະໂດຍໄດ້ສໍາເລັດການຄັດເລືອກ ແລະ ສັບຊ້ອນຄືນໃໝ່ ຍຶດຖືຄວາມສາມາດ, ຄວາມຊໍານານງານ ຫຼື ສາຍວິຊາສະເພາະເປັນຫຼັກ ໂດຍນໍາໃຊ້ຫຼາຍກົນໄກເຊັ່ນ:ການສອບເສັງສໍາພາດ, ການປະເມີນຜົນການປະຕິບັດງານ KPI, ການຈັດກຸ່ມປະເພດພະນັກງານແຕ່ລະລະດັບເພື່ອຄັດຈ້ອນບຸກຄະລາກອນທີ່ມີປະສິດທີພາບ;ປັບປຸງລະບຽບດ້ານບຸກຄະລາກອນໃຫ້ສອດຄ່ອງກັບກົດໝາຍແຮງງານ; ອະນຸຍາດໃຫ້ຜູ້ອາວຸໂສໃກ້ກະສຽນສາມາດອອກກະສຽນໄດ້ຕາມຄວາມສະໝັກໃຈ ເຮັດໃຫ້ພະນັກງານຫຼຸດລົງຈາກ 6.200 ກວ່າຄົນ ໃນປີ 2020 ມາເປັນ 5.605 ຄົນ ໃນປີ 2023;
ສໍາເລັດການຫັນຈາກລະບົບ “ພະນັກງານຖາວອນ”ທີ່ມີການຄຸ້ມຄອງ ຄ້າຍຄືກັບພະນັກງານ-ລັດຖະກອນ ແຕ່ມີສັນຍາແຮງງານລວມໝູ່ ໄປເປັນລະບົບ “ວ່າຈ້າງຕາມສັນຍາແຮງງານ ແລະ ມີການກຳນົດການປະຕິບັດສັນຍາໃນແຕ່ລະໄລຍະໂດຍອີງໃສ່ການປະເມີນຜົນງານການປະຕິບັດວຽກງານKPI ເປັນຫຼັກໃນການຕໍ່ສັນຍາ”; ສ້າງກົນໄກການວ່າຈ້າງພະນັກງານຈາກພາຍນອກ.
ສ້າງ ແລະ ເລີ່ມນໍາໃຊ້ຖານຂໍ້ມູນລະບົບການຄຸ້ມຄອງອຸປະກອນໄຟຟ້າພາກລະບົບຈໍາໜ່າຍ ແລະ ລະບົບສາຍສົ່ງໄຟຟ້າ; ສືບຕໍ່ດຳເນີນໂຄງການການນໍາໃຊ້ໝໍ້ນັບໄຟທັນສະໄໝໄລຍະ2 ໃຫ້ສາມາດນໍາໃຊ້ທົ່ວປະເທດ; ສ້າງ ແລະ ທົບທວນຄືນລະບຽບທີ່ຈໍາເປັນໃຫ້ຄວບຄຸມການດໍາເນີນທຸລະກິດ ແລະ ຫັນການຄຸ້ມຄອງບໍລິຫານອົງກອນໄປຕາມກົດໝາຍວ່າດ້ວຍວິສາຫະກິດ; ສໍາເລັດການພັດທະນາ ແລະ ຂໍອະນຸມັດນໍາໃຊ້ຮູບແບບໃບຮຽກເກັບເງິນ (Tax invoice) ຄ່າກະແສໄຟຟ້າຮູບແບບໃໝ່. ນອກນີ້, ຍັງມີອີກຫຼາຍໂປຣແກຣມທີ່ກໍາລັງພັດທະນາ ໂດຍບຸກຄະລາກອນຂອງ ຟຟລ ເອງ.
ປັບປຸງການບໍລິການໃຫ້ຜູ້ຊົມໃຊ້ໄຟຟ້າໂດຍໄດ້ເພີ່ມການເອົາໃຈໃສ່ແກ້ໄຂບັນຫາໄຟຕົກ-ໄຟມອດ ໂດຍປັບປຸງລະບົບຕາຂ່າຍໄຟຟ້າ, ບໍາລຸງຮັກສາສ້ອມແປງ ແລະ ອານາໄມແລວສາຍ ເປັນປະຈໍາ ເຮັດໃຫ້ສະຖິຕິຂອງໄຟຕົກ-ໄຟມອດ ຫຼຸດລົງຈາກປີ 2020 ຈໍານວນ 285.770 ນາທີ ມາເປັນ 277.451 ນາທີໃນປີ 2022; ປັບປຸງແບບແຜນວິທີເຮັດວຽກຂອງລະບົບ Call center 1199 ແລະ ປັບປຸງຕໍ່ຍອດ EDL Application ໃຫ້ທັນສະໄໝ;ກຳນົດມາດຕະການຕໍ່ພະນັກງານໃຫ້ເພີ່ມຄວາມຮັບຜິດຊອບສູງ ໂດຍສະເພາະການຈົດເລກໝໍ້ນັບໄຟ ແລະ ການຜະລິດໃບບິນໃຫ້ຖືກຕ້ອງ;ເພີ່ມທະວີການບໍລິການລູກຄ້າຂໍຊົມໃຊ້ໄຟໃໝ່ ໃຫ້ວ່ອງໄວ; ເພີ່ມຊ່ອງທາງບໍລິການແຈ້ງເຫດໄຟຟ້າບໍ່ພໍ, ໄຟຕົກ-ໄຟມອດ ຜ່ານຊ່ອງທາງສື່ອອນລາຍ ແລະ ເບີໂທສາຍດ່ວນ 1199.
     ພ້ອມນັ້ນ; ຟຟລ ມີນະໂຍບາຍສົ່ງເສີມການພົວພັນຮ່ວມມືກັບພາຍໃນ ແລະ ຕ່າງປະເທດໂດຍໃນໄລຍະ 3 ປີຜ່ານມາ ໄດ້ສໍາເລັດການຮ່ວມມືກັບຫຼາຍຂະແໜງການເຊັ່ນ:ສໍາເລັດການເຊັນ MOU ຮ່ວມກັບຫຼາຍບໍລິສັດໃນການສຶກສາທຸລະກິດທີ່ມີທ່າແຮງຮ່ວມກັນ; ຮ່ວມມືກັນດ້ານເຕັກນິກວິຊາການ; ຮ່ວມກັນນໍາໃຊ້ທ່າແຮງຂອງຕົນເຂົ້າໃນການປັບປຸງກົນໄກການຄຸ້ມຄອງ-ບໍລິຫານຈັດການລະບົບໄຟຟ້າສາທາລະນະແລະສໍານັກງານລັດຄຸ້ມຄອງ;ຮ່ວມມືທາງການສຶກສາ; ການຊ່ວຍເຫຼືອຈາກອົງການຈັດຕັ້ງສາກົນ ແລະອື່ນໆ.