 |
ໃນພິທີ ທ່ານ ເພັດສະຫວັນ ພັນສະດາ ຮອງຫົວໜ້າ ພະແນກໂຍທາທິການ ແລະ ຂົນສົ່ງ ໄດ້ຂຶ້ນລາຍງານກ່ຽວກັບການຈັດຕັ້ງປະຕິບັດ ແລະ ຄວາມເປັນມາຂອງ ໂຄງການດັ່ງກ່າວ ທີ່ໄດ້ສໍາເລັດການສຳຫຼວດ-ອອກແບບ ແລະ ປະເມີນມູນຄ່າໂຄງການແລ້ວ, ໂດຍແມ່ນ ບໍລິສັດ ກໍ່ສ້າງໂກເອກໂກລາວ ຈຳກັດຜູ້ດຽວ ເປັນຜູ້ສໍາຫຼວດ-ອອກແບບ ຊຶ່ງໂຄງການດັ່ງກ່າວ ອອກແບບເປັນທາງຊັ້ນ V ເຂດພູດອຍ, ໜ້າທາງປູດ້ວຍເບຕົງເສີມເຫຼັກ, ໜາ 25 ຊັງຕີແມັດ, ກ້ວາງ 7 ແມັດ, ຊ່ອງຈາລະຈອນ ປູເປຕົງກວ້າງ 6 ແມັດ, ບ່າທາງກ້ວາງ 0,50 ແມັດ, ປັບປຸງລະບົບທໍ່ກົມ-ຫຼ່ຽມລະບາຍນໍ້າລອດທາງບາງຈຸດ, ມີທໍ່ລະບາຍນ້ຳຂ້າງທາງ 2 ຮູບແບບຄື: ຮ່ອງລະບາຍນ້ຳ ກໍ່ດ້ວຍຫີນອັດດ້ວຍປະທາຍ ແລະ ຮ່ອງລະບາຍນ້ຳດ້ວຍເບຕົງເສີມເຫຼັກ, ມີການກໍ່ສ້າງຕ້ານເຈື່ອນ ແລະ ບັນດາອົງປະກອບຂອງທາງຕ່າງໆ.
ໂຄງການດັ່ງກ່າວ, ໄດ້ແບ່ງອອກເປັນ 3 ສັນຍາຄື: ສັນຍາຊ່ວງ ທີ 1 ຄວາມຍາວ 8 ກິໂລແມັດ ມູນຄ່າກໍ່ສ້າງ 76 ຕື້ກ່ວາກີບ ໂດຍແມ່ນບໍລິສັດ ລາວຢູຄູນ ເຫຼັກກ້າບໍ່ແຮ່ ຈໍາກັດ ເປັນບໍລິສັດຮັບເໝົາກໍ່ສ້າງ; ສັນຍາຊ່ວງທີ 2 ຄວາມຍາວ 7 ກິໂລແມັດ ມູນຄ່າກໍ່ສ້າງ 65 ຕື້ກວ່າກີບ, ໂດຍແມ່ນ ບໍລິສັດ ເອທີໂອໂຕ້ ກໍ່ສ້າງ ຈໍາກັດ ເປັນຜູ້ຮັບເໝົາກໍ່ສ້າງ; ສັນຍາຊ່ວງທີ 3 ຄວາມຍາວ 7 ກິໂລແມັດ ມູນຄ່າກໍ່ສ້າງ 69 ຕື້ກວ່າກີບ ໂດຍແມ່ນບໍລິສັດ ສີສະເກດ ກໍ່ສ້າງຄົບວົງຈອນ ຈໍາກັດ ເປັນຜູ້ຮັບເໝົາກໍ່ສ້າງ ແລະ ມີໄລຍະເວລາປະຕິບັດໂຄງການ ທັງໝົດ 24 ເດືອນ (2 ປີ). ງົບປະມານການກໍ່ສ້າງດັ່ງກ່າວ ແມ່ນໄດ້ມາຈາກ ການປະກອບສ່ວນ ຂອງບັນດາບໍລິສັດຂຸດຄົ້ນ ແລະ ຂົນສົ່ງ ແຮ່ທາດ ຢູ່ຕາມຕອນທາງ ແລະ ຂົງເຂດດັ່ງກ່າວ.
ຈາກນັ້ນ, ໄດ້ເຊັນສັນຍາຮ່ວມກັນ ລະຫວ່າງ ສະພາຄຸ້ມຄອງບໍລິຫານກອງທຶນບູລະນະຮັກສາ ແລະ ສ້ອມແປງເສັ້ນທາງ ພາຍໃນ ແຂວງໄຊສົມບູນ, ຕາງໜ້າໂດຍ ພະແນກ ໂຍທາທິການ ແລະ ຂົນສົ່ງ ແຂວງ, ໃນນາມອົງການຄຸ້ມຄອງຈັດຕັ້ງປະຕິບັດໂຄງການ, ຕາງໜ້າເຊັນໂດຍ ທ່ານ ໄຊສົມພັນ ລີເຕັງເບຼ່ຍຈື ຫົວໜ້າ ພະແນກ ໂຍທາທິການ ແລະ ຂົນສົ່ງ ແຂວງ ຮ່ວມກັບ ທ່ານ ສາຍຄໍາ ພິລາວົງ, ປະທານ ບໍລິສັດ ເອທີໂອໂຕ້ກໍ່ສ້າງ ຈໍາກັດ, ທ່ານ ຄໍາຜາຍ ສີສະເກດ ຮອງອໍານວຍການ ບໍລິສັດ ສີສະເກດກໍ່ສ້າງ ຄົບວົງຈອນ ຈໍາກັດ ແລະ ທ່ານ ນາງ ບົວຄໍາ ລາວລີ ຜູ້ຕາງໜ້າອໍານວຍການ ບໍລິສັດ ລາວຢູຄູນ ເຫຼັກກ້າບໍ່ແຮ່ ຈໍາກັດ.
(ຂ່າວ: ນ. ຟອງ ນໍ່ນິນທາ)
ຄໍາເຫັນ