ຮອງປະທານ ສພຊ ຕິດຕາມການຈັດຕັ້ງປະຕິບັດກົດໝາຍ ຢູ່ແຂວງສາລະວັນ

ທ່ານ ສີເຮັງ ຫອມສົມບັດ ປະທານສະພາປະຊາຊົນແຂວງສາລະວັນ ໄດ້ລາຍງານຫຍໍ້ ກ່ຽວກັບສະພາບລວມການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ທິດທາງແຜນການໃນຕໍ່ໜ້າ. ຈາກນັ້ນ, ທ່ານ ຈະເລີນ ເຍຍປາວເຮີ ໄດ້ກ່າວເປີດກອງປະຊຸມ ແລະ ສະເໜີຈຸດປະສົງ ເພື່ອຕິດຕາມກວດກາການຈັດຕັ້ງປະຕິບັດບາງກົດໝາຍ ແລະ ຕິດຕາມຊຸກຍູ້ວຽກງານໂຄສະນາເຜີຍແຜ່ ລັດຖະທຳມະນູນ ສະບັບປັບປຸງປີ 2025 ຢູ່ຂັ້ນທ້ອງຖິ່ນ ກໍຄືຢູ່ແຂວງສາລະວັນ ໃນຈໍານວນ 4 ກົດໝາຍ ຄື: ກົດໝາຍວ່າດ້ວຍການສ້າງນິຕິກຳ, ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍການຂົນສົ່ງທາງບົກ ແລະ ກົດໝາຍ ວ່າດ້ວຍການຈັດສັນພູມລາເນົາ ແລະ ອາຊີບ. ພ້ອມນັ້ນ, ທ່ານໄດ້ສະເໜີໃຫ້ຜູ້ແທນກອງປະຊຸມຈົ່ງພ້ອມກັນປະກອບຄໍາຄິດຄໍາເຫັນ ເຮັດໃຫ້ກອງປະຊຸມບັນລຸຜົນສໍາເລັດຕາມຈຸດປະສົງ ລະດັບຄາດໝາຍທີ່ວາງໄວ້.

ໃນກອງປະຊຸມ, ຍັງໄດ້ຮັບຟັງການລາຍງານ ການຈັດຕັ້ງປະຕິບັດ ມີຂໍ້ສະດວກ, ຂໍ້ຫຍຸ້ງຍາກ, ຜົນສຳເລັດ ແລະ ຂໍ້ຄົງຄ້າງ ແລະ ປະກອບຄໍາເຫັນຕໍ່ກັບການຈັດຕັ້ງປະຕິບັດ 4 ກົດໝາຍ ດັ່ງກ່າວຕາມການເຈາະຈີ້ມຂອງທ່ານປະທານກອງປະຊຸມ ຈາກ 6 ພາກສ່ວນຂອງແຂວງ ບົນພື້ນຖານຄວາມຮັບຜິດຊອບຢ່າງກົງໄປກົງມາ ຊຶ່ງເຫັນໄດ້ຜົນສໍາເລັດອັນພົ້ນເດັ່ນ, ບົດຮຽນທີ່ຖອດຖອນໄດ້ ແລະ ບາງບັນຫາທີ່ຈະຕ້ອງເພີ່ມທະວີການປັບປຸງແກ້ໄຂ.

ໃນຕອນທ້າຍ, ທ່ານ ຈະເລີນ ເຍຍປາວເຮີ ໄດ້ສະແດງຄວາມຊົມເຊີຍຕໍ່ທຸກພາກສ່ວນທີ່ປະກອບຄໍາຄິດເຫັນອັນເປັນປະໂຫຍດ ແລະ ເຕັມໄປດ້ວຍເນື້ອໃນສໍາຄັນ ສະແດງໃຫ້ເຫັນເຖິງຄວາມພະຍາຍາມໃນການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ຊຶ່ງຄໍາຄິດຄໍາເຫັນ, ຂໍ້ມູນ ແລະ ຂໍ້ສະເໜີ ຕ່າງໆ ຂອງທຸກພາກສ່ວນ, ຄະນະຮັບຜິດຊອບຈະນໍາໄປຄົ້ນຄວ້າເພື່ອເປັນຂໍ້ມູນປັບປຸງກົດໝາຍໃນຕໍ່ໜ້າ ໃຫ້ສອດຄ່ອງກັບສະພາບຄວາມເປັນຈິງ ແລະ ທ່ານໄດ້ສະເໜີໃຫ້ບັນດາທ່ານການນໍາອົງການປົກຄອງແຂວງ, ສະພາປະຊາຊົນແຂວງ, ພະແນກການ-ກົມກອງອ້ອມຂ້າງແຂວງ ແລະ ພາກສ່ວນທີ່ກ່ຽວຂ້ອງ ເພີ່ມທະວີຄວາມເອົາໃຈໃສ່ການຈັດຕັ້ງປະຕິບັດ ກົດໝາຍ 4 ສະບັບດັ່ງກ່າວ. ເອົາໃຈໃສ່ຄວາມຮັບຜິດຊອບ ຂອງບັນດາພະແນກ ການທີ່ກ່ຽວຂ້ອງ ເພື່ອສ້າງແຜນການ ແລະ ປັບປຸງນິຕິກຳໃຕ້ກົດໝາຍ ຂອງແຂວງ ແລະ ຂອງເມືອງ ເປັນແຕ່ລະໄລຍະ, ເອົາໃຈໃສ່ຈັດຕັ້ງປະຕິບັດຕາມກົດໝາຍວ່າດ້ວຍທີ່ດິນ, ມະຕິ, ດໍາລັດ, ຄໍາສັ່ງ ແລະ ນິຕິກຳໃຕ້ກົດໝາຍອື່ນໆ ທີ່ກ່ຽວຂ້ອງກັບການຄຸ້ມຄອງ, ນໍາໃຊ້ທີ່ດິນ ໃຫ້ມີຄວາມເຂັ້ມງວດ ແລະ ເອົາໃຈໃສ່ປະສານສົມທົບກັບບໍລິສັດຜູ້ລົງທຶນ ເພື່ອຈັດຕັ້ງປະຕິບັດ ກົດໝາຍ ວ່າດ້ວຍການຈັດສັນພູມລຳເນົາ ແລະ ອາຊີບ ແລະ ນິຕິກຳໃຕ້ກົດໝາຍອື່ນໆທີ່ກ່ຽວຂ້ອງ ຢ່າງເຂັ້ມງວດ. ສືບຕໍ່ຈັດຕັ້ງປະຕິບັດ ກົດໝາຍ ວ່າດ້ວຍການຂົນສົ່ງທາງບົກ ແລະ ກົດໝາຍ ວ່າດ້ວຍການຈະລາຈອນທາງບົກ ແລະ ນິຕິກຳອື່ນທີ່ກ່ຽວຂ້ອງ ຢ່າງເຂັ້ມງວດ ແລະ ມອບໃຫ້ສະພາປະຊາຊົນແຂວງ ແລະ ການນໍາຂອງແຂວງ ເອົາໃຈໃສ່ຕິດຕາມກວດກາ ຊີ້ນໍາຢ່າງໃກ້ຊິດ ພາກສ່ວນທີ່ກ່ຽວຂ້ອງ ໃນການຈັດຕັ້ງປະຕິບັດ ແລະ ເຄົາລົບກົດໝາຍ;

(ພາບ-ຂ່າວ: ດີລໍາພົນ ພົມມະຈັນ)