ກະຊວງສຶກສາທິການຟີລິບປິນ ລະບຸວ່າ: ແຜ່ນດິນໄຫວໄດ້ສົ່ງຜົນກະທົບຕໍ່ໂຮງຮຽນຫຼາຍກວ່າ 8,600 ແຫ່ງ, ນັກຮຽນຫຼາຍກວ່າ 4 ລ້ານຄົນ ແລະ ພະນັກງານການສຶກສາຫຼາຍກວ່າ 150,000 ຄົນ. ກະຊວງພະລັງງານລາຍງານວ່າ ມີຄົວເຮືອນປະສົບກັບໄຟຟ້າດັບ ປະມານ 864,000 ຄົວເຮືອນ. ກະຊວງໂຍທາທິການ ແລະ ທາງຫຼວງລະບຸວ່າ, ຄວາມເສຍຫາຍຕໍ່ຊັບສິນໃນເມືອງເຈເນີຣັລ ຊານໂຕສ ຊຶ່ງເປັນເມືອງທ່າເຮືອທີ່ມີປະຊາກອນຫຼາຍກວ່າ 700,000 ຄົນ, ເພີ່ມຂຶ້ນສູງເຖິງ 1 ຕື້ເປໂຊ.
ໃນຂະນະດຽວກັນ, ອົງການບິນພົນລະເຮືອນຂອງຟີລິບປິນລະບຸວ່າ: ປັດຈຸບັນຖ້ຽວບິນທີ່ສະໜາມບິນສາກົນ ເຈເນີຣັລ ຊານໂຕສ ຈະຖືກຈຳກັດສະເພາະການປະຕິບັດງານຂອງລັດຖະບານ, ທະຫານ ແລະ ມະນຸດສະທຳເທົ່ານັ້ນຈົນຮອດເວລາ 18:00 ໂມງ (ຕາມເວລາທ້ອງຖິ່ນ) ຂອງວັນ 11 ມິຖຸນາ ນີ້.
ສະຖາບັນວິທະຍາສາດພູເຂົາໄຟ ແລະ ແຜ່ນດິນໄຫວຟີລິບປິນລາຍງານວ່າ: ແຜ່ນດິນໄຫວດັ່ງກ່າວເກີດຂຶ້ນຕາມຮອຍແຕກຂອງເປືອກໂລກ ໃນເວລາ 7:37 ໂມງເຊົ້າ (ຕາມເວລາທ້ອງຖິ່ນ) ທີ່ຄວາມເລິກ 33 ກິໂລແມັດ ໂດຍຈຸດສູນກາງຢູ່ຫ່າງຈາກຝັ່ງທະເລເມືອງມາຊິມ ໃນແຂວງຊາຣາງການີ ເທິງເກາະມິນດາເນົາ ໄປທາງທິດຕາເວັນຕົກສຽງໃຕ້ ປະມານ 10 ກິໂລແມັດ.
ຄໍາເຫັນ