 |
ໃນວັນທີ 11-15 ພຶດສະພາ ຜ່ານມານີ້, ສູນກະສິກຳສະອາດ ໄດ້ຈັດຝຶກອົບຮົມໃຫ້ເປັນຄູຝຶກ ກ່ຽວກັບການທົບທວນຄືນເຕັກນິກການຜະລິດພືດຜັກທີ່ເປັນມິດຕໍ່ສິ່ງແວດລ້ອມ ແລະ ການວິໄຈ, ການປ້ອງກັນພະຍາດ ແລະ ແມງໄມ້; ສຳລັບພືດ ໝາກເລັ່ນ, ໝາກເຜັດ, ຜັກກະລໍ່າປີ, ຜັກບົ່ວແບ່ງ ໃຫ້ແກ່ພະນັກງານວິຊາການຂັ້ນແຂວງ, ຂັ້ນເມືອງ ແລະ ພາກສ່ວນທີ່ກ່ຽວຂ້ອງໃນ 3 ແຂວງຄື: ນະຄອນຫຼວງວຽງຈັນ, ຈໍາປາສັກ ແລະ ເຊກອງ ເປັນເປົ້າໝາຍຂອງໂຄງການ. ໂດຍການເປັນປະທານຮ່ວມຂອງ ທ່ານ ວັນທ່ຽງ ພົມມະສຸລິນ ຮອງຫົວນ້າກົມປູກຝັງ, ທ່ານ ບຸນນາລິດ ອູນ ຊ່ຽວຊານດ້ານການປູກພືດຜັກ ຕາງໜ້າສູນພືດຜັກໂລກ, ມີຕາງໜ້າຈາກກົມປູກຝັງ, ກົມສົ່ງເສີມກະສິກໍາ ແລະ ສະຫະກອນ, ສູນຄົ້ນຄວ້າພືດຜັກ ແລະ ໄມ້ໃຫ້ໝາກ ຫາດດອກແກ້ວ, ຂະແໜງປູກຝັງ, ຫ້ອງການກະສິກຳ ແລະ ສິ່ງແວດລ້ອມເມືອງ 3 ແຂວງເປົ້າໝາຍຂອງໂຄງການເຂົ້າຮ່ວມ.
ຈຸດປະສົງແມ່ນເພື່ອເປັນການທົບທວນຄືນໃນການສ້າງຄວາມເຂັ້ມແຂງທາງດ້ານວິຊາການໃຫ້ແກ່ພະນັກງານວິຊາການຂັ້ນແຂວງ, ຂັ້ນເມືອງ ກ່ຽວກັບ ເຕັກນິກການຜະລິດພືດຜັກທີ່ເປັນມິດຕໍ່ສິ່ງແວດລ້ອມ ແລະ ການວິນິດໄສ, ການປ້ອງກັນພະຍາດ ແລະ ແມງໄມ້ ສຳລັບພືດ ໝາກເລັ່ນ, ໝາກເຜັດ, ຜັກກະລໍ່າປີ, ຜັກບົ່ວແບ່ງ ແລະ ຜູ້ທີ່ໄດ້ຜ່ານການຝຶກ ແມ່ນຈະໄດ້ນໍາເອົາບົດຮຽນໄປຝຶກ ແລະ ແນະນໍາຕໍ່ໃຫ້ກັບຊາວສວນ ໃນເຂດທ້ອງຖິ່ນຂອງຕົນ ເພື່ອແນໃສ່ການຜະລິດໃຫ້ມີຄວາມປອດໄພ ແລະ ໃຫ້ມີປະລິມານຜົນຜະລິດສູງຂຶ້ນ ສາມາດສ້າງລາຍຮັບໃຫ້ແກ່ຊາວສວນ ແລະ ຫຼຸດຜ່ອນການນໍາເຂົ້າ.
 |
ການຝຶກອົບຮົມ ແລະ ແລກປ່ຽນບົດຮຽນໃນເທື່ອນີ້ ຜູ້ເຂົ້າຮ່ວມຈະນໍາເອົາບົດຮຽນດັ່ງກ່າວນີ້ ໄປໝູນໃຊ້ເຂົ້າການປູກພືດຜັກ ໂດຍສະເພາະການຜະລິດພືດຜັກທີ່ເປັນມິດຕໍ່ສິ່ງແວດລ້ອມ ໃຫ້ມີຄວາມຍືນຍົງ ແລະ ສາມາດໃຫ້ມີການຜະລິດຕະຫຼອດປີ, ຫຼຸດຜ່ອນການນໍາໃຊ້ສານເຄມີ ແລະ ເປັນການສ້າງລາຍຮັບເພີ່ມ ແລະ ຫຼຸດຜ່ອນການນໍາເຂົ້າຜົນຜະລິດຈາກຕ່າງປະເທດ ສົ່ງເສີມການຜະລິດພາຍໃນໃຫ້ນັບມື້ມີຄວາມເພີ່ມທະວີຂຶ້ນ.
(ຂ່າວ-ພາບ: ສູນກະສິກໍາສະອາດ ກົມປູກຝັງ)
ຄໍາເຫັນ