ຝຶກອົບຮົມກຽມຄວາມພ້ອມປັບຕົວຕໍ່ສະພາບອາກາດ ແລະ ສຸຂະພາບ

ທ່ານ ບຸນເລີດ ສີຫາປັນຍາ ຮັກສາການເຈົ້າເມືອງທຸລະຄົມ ໄດ້ລາຍງານຫຍໍ້ກ່ຽວກັບສະພາບລວມຂອງເມືອງ, ສະພາບດິນຟ້າອາກາດ ແລະ ໄພພິບັດໃນໄລຍະຜ່ານມາ. ຈາກນັ້ນ, ທ່ານ ພູທອນ ເມືອງປາກ ໄດ້ນໍາສະເໜີຄວາມເປັນມາຂອງໂຄງການ, ຈຸດປະສົງ, ກິດຈະກໍາ, ເປົ້າໝາຍ ແລະ ຄາດຄະເນຜົນໄດ້ຮັບ. ໃນໄລຍະທີ່ຜ່ານມາ ກໍຄືປັດຈຸບັນ ສະພາບດິນຟ້າອາກາດໃນທົ່ວໂລກມີການປ່ຽນແປງກໍໃຫ້ເກີດມີໄພພິບັດທາງທຳມະຊາດເກີດຂຶ້ນຢ່າງຕໍ່ເນື່ອງ ແລະ ຮ້າຍແຮງຂຶ້ນກວ່າເກົ່າເປັນຕົ້ນ: ແຜ່ນດິນໄຫວ, ພູເຂົາເກີດດິນຖະຫຼົ່ມ, ນໍ້າຖ້ວມກະທັນຫັນ, ໄຟໄໝ້ປ່າ, ພະຍາດລະບາດ ແລະ ອື່ນໆ ອັນໄດ້ສົ່ງຜົນກະທົບຕໍ່ການດຳລົງຊີວິດຂອງປະຊາຊົນ. ສະນັ້ນ, ຄວາມຮຽກຮ້ອງຕ້ອງການໃນການຊ່ວຍເຫຼືອຍິ່ງເພີ່ມຂຶ້ນທຸກວັນ, ຈຶ່ງເປັນເຫດຜົນຫຼັກອັນໜຶ່ງທີ່ມູນນິທິຮ່ວມໃຈພັດທະນາລາວ ຕ້ອງການມີສ່ວນຮ່ວມໃນການແກ້ໄຂບັນຫາດັ່ງກ່າວຊ່ວຍເຫຼືອພັກ-ລັດ ກໍຄືປະຊາຊົນບັນດາເຜົ່າ.

ທ່ານ ບຸນຖອງ ພິມມະຈັກ ຫົວໜ້າຂະແໜງສັງຄົມສົງເຄາະ ພະແນກແຮງງານ ແລະ ສະຫວັດດີການສັງຄົມ ແຂວງວຽງຈັນ ໄດ້ນໍາສະເໜີຄວາມຮູ້ພື້ນຖານກ່ຽວກັບການປ້ອງກັນ ແລະ ຄຸ້ມຄອງໄພພິບັດ, ຊຶ່ງໄດ້ນໍາສະເໜີ 3 ບັນຫຼັກເຊັ່ນ: ວຽກງານຄຸ້ມຄອງໄພພິບັດ ຢູ່ ສປປ ລາວ, ບົດບາດຄວາມຮັບຜິດຊອບໃນການຄຸ້ມຄອງໄພພິບັດແຕ່ລະຂັ້ນ (ເມືອງ, ບ້ານ), ບາງຄວາມຮູ້ໃນການຮັບມືກັບໄພພິບັດໃນຫົວໜ່ວຍຂັ້ນຄອບຄົວ, ບຸກຄົນ. ຄວາມຮູ້ຟື້ນຖານການຄຸ້ມຄອງໄພພິບັດ ທີ່ເປັນອັນຕະລາຍ ແລະ ອາດຈະເປັນສາເຫດແກ່ການສູນເສຍຊີວິດ, ບາດເຈັບ ຫຼື ມີຜົນກະທົບອື່ນໆ ຕໍ່ສຸຂະພາບ, ຄວາມເສຍຫາຍດ້ານຊັບສິນ, ສູນເສຍການດໍາລົງຊີວິດ ແລະ ການບໍລິການ, ກີດຂວາງກິດຈະກໍາດ້ານເສດຖະກິດ ແລະ ສັງຄົມ ຫຼື ຄວາມເສຍຫາຍທາງດ້ານສິ່ງແວດລ້ອມ ແລະ ເຫດການທີ່ເປັນອັນຕະລາຍຮ້າຍແຮງທີ່ເກີດຂຶ້ນຈາກທຳມະຊາດ ຫຼື ມະນຸດສ້າງຂຶ້ນ ຊຶ່ງສ້າງຄວາມເສຍຫາຍຢ່າງຫຼວງຫຼາຍ ຕໍ່ສຸຂະພາບ, ຊີວິດ, ຊັບສິນ, ເສດຖະກິດ ແລະ ການດຳລົງຊີວິດຂອງຄົນໃນສັງຄົມ ທັງໃນໄລຍະສັ້ນ ແລະ ໄລຍະຍາວ.

(ແຫຼ່ງຂ່າວ: ເມືອງທຸລະຄົມ)