ຝຶກອົບຮົມວຽກງານມາດຕະຖານ ວັດແທກ ຄຸນນະພາບ

ຫ້ອງເຕັກນິກກອງບັນຊາການທະຫານແຂວງບໍ່ແກ້ວ ໄດ້ເປີດຝຶກອົບຮົມວຽກງານມາດ ຕະຖານ-ວັດແທກ-ຄຸນນະພາບ ອາວຸດຍຸດໂທປະກອນເຕັກນິກໄລຍະສັ້ນ ປະຈຳປີ 2023 ໃຫ້ພະນັກງານ-ນັກຮົບວິຊາສະເພາະຂອງຕົນ ໃນວັນທີ 9 ກັນຍາ  ຜ່ານມາ, ໂດຍການເປັນປະທານຂອງ ສະຫາຍ ພັນໂທ ຄຳສົດ ລາດສະພົງ ຮອງຫົວໜ້າກົມມາດຕະຖານ-ວັດແທກ-ຄຸນນະພາບ ກົມໃຫຍ່ເຕັກນິກກອງທັບ, ສະຫາຍ ພັນເອກ ຈຸລາຍ ຈູລະຈິດ ຄະນະພັກກອງບັນຊາການ ຫົວໜ້າຫ້ອງເຕັກນິກ ກອງບັນຊາການທະຫານແຂວງບໍ່ແກ້ວ, ມີ ພະແນກການກ່ຽວຂ້ອງເຂົ້າຮ່ວມ. 
  ສະຫາຍ ພັນໂທ ກຸນນະສັກ ນາມມະວົງ ຫົວໜ້າພະແນກສັງລວມ ກົມມາດຖານ ກົມໃຫຍ່ເຕັກນິກກອງທັບ ໄດ້ຂຶ້ນຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການອະນຸມັດເປີດຝຶກອົບຮົມໄລຍະສັ້ນ ວຽກງານມາດຕະຖານ-ວັດແທກ-ຄຸນນະພາບ, ໂອກາດດັ່ງກ່າວ ສະຫາຍຍັງໄດ້ຂຶ້ນຜ່ານເນື້ອໃນເອກກະສານທີ່ນຳມາເຜີຍແຜ່ໃນຄັ້ງນີ້ປະກອບມີ: ເອກກະສານ ຂໍ້ກຳນົດຂອງກະຊວງປ້ອງກັນປະເທດ ວ່າດ້ວຍທີ່ຕັ້ງ, ພາລະບົດບາດ, ໜ້າທີ່, ຂອບເຂດສິດ, ໂຄງປະກອບການຈັດຕັ້ງ, ຫຼັກການ ແລະ ແບບແຜນວິທີເຮັດວຽກຂອງກົມມາດຕະຖານ, ເອກກະສານຂໍ້ກຳນົດຂອງກະຊວງປ້ອງກັນປະເທດ ວ່າດ້ວຍວຽກງານມາດ
ຕະຖານ-ວັດແທກ-ຄຸນນະພາບ ກອງທັບປະຊາຊົນລາວ, ເອກກະສານ ຂໍ້ຕົກລົງກະຊວງປ້ອງກັນປະເທດ ວ່າດ້ວຍການເຄື່ອນໄຫວວຽກງານ ວັດແທກໃນຂົງເຂດການທະຫານປ້ອງກັນຊາດ, ເອກກະສານບົດແນະນຳຂໍ້ກຳນົດ ວຽກງານເຕັກນິກ ກອງທັບປະຊາຊົນລາວ, ແລະ ເອກກະສານ ແນະນຳການນຳໃຊ້ ອຸປະກອນວັດແທກ, ກວດກາ ແລະ ວິທີກວດກາເຕັກນິກລົດການທະຫານ. ຈາກນັ້ນ, ກໍໄດ້ເຄື່ອນໄຫວຈັດຕັ້ງປະຕິບັດຕົວຈິງ ກ່ຽວກັບການວັດແທກ ອາວຸດ, ຍຸດໂທປະກອນເຕັກນິກ ເພື່ອເຮັດໃຫ້ພະນັກງານວິຊາສະເພາະ ຂອງກອງບັນຊາການທະຫານແຂວງບໍ່ແກ້ວ ໄດ້ມີຄວາມຮັບຮູ້ ເຂົ້າໃຈ ແລະ ມີຄວາມສໍານິຊໍານານ, ຮັບປະກັນໃຫ້ແກ່ການປົກປັກຮັກສາ ພາຫະນະອາວຸດ, ຍຸດໂທປະກອນຕ່າງໆ ໃຫ້ມີຄຸນນະພາບສູງ ແລະ ນຳໃຊ້ໄດ້ຍາວນານ. ໂອກາດນີ້ ຍັງໄດ້ມອບເຄື່ອງ, ອຸປະກອນການວັດ ແທກຄຸນນະພາບສ້ອມແປງອາວຸດ, ຍຸດໂທປະກອນເຕັກນິກ ການທະຫານ ຈຳນວນໜຶ່ງ ເພື່ອນຳໃຊ້ເຂົ້າໃນວຽກງານກວດກາມາດຕະຖານ-ວັດແທກ-ຄຸນນະພາບ ຂອງກົມກອງ ອີກດ້ວຍ.
ສະຫາຍ ພັນໂທ ຄຳສົດ ລາດສະພົງ ໄດ້ເນັ້ນໜັກໃຫ້ນັກຝຶກອົບຮົມທຸກສະຫາຍຈົ່ງພ້ອມກັນນໍາເອົາຮຽນໃນຄັ້ງນີ້ໄປຈັດຕັ້ງຜັນຂະຫາຍໃຫ້ເກີດດອກອອກຜົນໃນກົມກອງຂອງຕົນ ທັງເປັນກຳລັງອັນສຳຄັນຂອງວຽກງານປ້ອງກັນຊາດ ໃນສະເພາະໜ້າ ແລະ ຍາວນານ.
 ຂ່າວ: ວໍລະສິດ  ພິດສະຫາຍ.