ທ່ານ ຍົມມະລາ ວໍລະຈິດ ກ່າວວ່າ: ວຽກງານຄຸ້ມຄອງຊັບສິນຂອງລັດ ເປັນວຽກງານໜຶ່ງປະກອບສ່ວນສຳຄັນ ເຂົ້າໃນການຍົກສູງປະສິດທິພາບຂອງການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ, ເປັນເຄື່ອງມືໃຫ້ອົງການຈັດຕັ້ງພັກ-ລັດ ໂດຍສະເພາະຂະແໜງການເງິນ ນຳໃຊ້ເປັນບ່ອນອີງໃນການນຳພາ-ຊີ້ນຳ ຄຸ້ມຄອງຊັບສິນຂອງລັດຢ່າງລວມສູນ ແລະ ເປັນເອກະພາບໃນຂອບເຂດທົ່ວປະເທດ ໃຫ້ມີປະສິດທິພາບ ແລະ ປະສິດທິຜົນ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດ.
ເພື່ອເຮັດໃຫ້ວຽກງານການຄຸ້ມຄອງ, ຕິດຕາມ ກວດກາວຽກງານຄຸ້ມຄອງຊັບສິນຂອງລັດຖືກຕ້ອງ, ເປັນເອກະພາບ, ເຂັ້ມແຂງ, ໂປ່ງໃສ ແລະ ທັນສະໄໝ ແນ¬ໃສ່ຮັບປະກັນການຄຸ້ມຄອງຊັບສິນຂອງລັດ ມີປະສິດ ທິພາບ, ປະສິດທິຜົນ ທັງເປັນການຍົກລະດັບຂີດຄວາມສາມາດ ໃຫ້ພະນັກງານໃຫ້ມີຄວາມຮັບຮູ້ ແລະ ເຂົ້າໃຈຕໍ່ວຽກງານຄຸ້ມຄອງຊັບສິນແຫ່ງລັດ ໃຫ້ມີຄວາມໜັກແໜ້ນຂຶ້ນຕື່ມ ສາມາດເຜີຍແຜ່, ແນະນໍາ, ຊຸກຍູ້, ຕິດຕາມ, ກວດກາວຽກງານຄຸ້ມຄອງຊັບສິນຂອງລັດ, ຊຸກຍູ້ຫົວໜ່ວຍທຸລະກິດ ເພື່ອປະຕິບັດພັນທະ ແລະ ຄຸ້ມຄອງຈັດເກັບລາຍຮັບເຂົ້າງົບປະມານໃຫ້ຖືກຕ້ອງ ແລະ ສອດຄ່ອງຕາມລະບຽບກົດໜາຍກໍານົດ.
ສໍາລັບຫົວຂໍ້ທີ່ນໍາມາຝຶກອົບຮົມໃນຄັ້ງນີ້ ປະກອບມີການຄຸ້ມຄອງແຮ່ທາດ: ວຽກງານຄຸ້ມຄອງຕິດຕາມກວດກາ ການເຄື່ອນຍ້າຍຊັບພະຍາກອນແຮ່ທາດ; ວິທີການຄິດໄລ່ຄ່າຊັບພະຍາກອນແຮ່ທາດ; ຂັ້ນຕອນໃນການຄົ້ນຄວ້າ ຕິດຕາມການສົ່ງແຮ່ທາດ ແລະ ຫຼັກການກໍານົດແຮ່ທາດ; ແນະນໍາການສະສາງລົດຂອງລັດ ຂັ້ນຕອນ ແລະ ວິທີການສະສາງລົດລັດ; ການຫັນເປັນທັນສະໄໝ ແນະນໍາການນຳໃຊ້ ແລະ ເພີ່ມຂໍ້ມູນເຂົ້າໃນລະບົບ AMIS. ພ້ອມນັ້ນ, ຄະນະປະທານຍັງໄດ້ມີຄໍາເຫັນ ແລະ ຮຽກຮ້ອງໃຫ້ວິທະຍາກອນ, ສໍາມະນາກອນທີ່ເຂົ້າຮ່ວມຝຶກອົບຮົມຄັ້ງນີ້ ເອົາໃຈໃສ່ການປະຕິບັດລະບຽບຂອງການຝຶກອົບຮົມ, ສຸມໃສ່ຄົ້ນຄວ້າ ແລກປ່ຽນບົດຮຽນປະສົບການທາງດ້ານທິດສະດີ ແລະ ພຶດຕິກໍາຕົວຈິງ, ແລກປ່ຽນປຶກສາຫາລືຮ່ວມກັນ ແລະ ສາມາດກໍາແໜ້ນໄດ້ບັນດາເນື້ອໃນ, ຫົວຂໍ້ທີ່ນໍາມາຝຶກອົບຮົມຄັ້ງນີ້ ເພື່ອຜັນຂະຫຍາຍ ແລະ ນໍາເອົາເນື້ອໃນບົດຮຽນ, ປະສົບການ ໄປໝູນໃຊ້ເຂົ້າສູ່ວຽກງານຕົວຈິງຢ່າງມີປະສິດທິຜົນສູງຂຶ້ນໄປເລື້ອຍໆ.
ຂ່າວ: ກະຊວງການເງິນ
ຄໍາເຫັນ