 |
ທ່ານ ຈີນດາວົງ ໂພສີຄຳ ກ່າວມວ່າ: ນະຄອນ ຫຼວງພະບາງ ເປັນເມືອງມໍຣະດົກໂລກ ທີ່ມີຄຸນຄ່າທາງດ້ານປະຫວັດສາດ ອັນຍາວນານ ມີວັດທະນະທຳ-ຮີດຄອງປະເພນີທີ່ເປັນເອກະລັກ ແລະ ມີທຳມະຊາດ ອຸດົມສົມບູນທີ່ສວຍສົດງົດງາມ, ເຊິ່ງປັດຈຸບັນພວມປະເຊີນ ກັບສິ່ງທ້າທາຍໃນຫຼາຍດ້ານ ທີ່ຕ້ອງໄດ້ປັບປຸງແກ້ໄຂ ເຊັ່ນ: ການຂະຫຍາຍຕົວຂອງຕົວເມືອງຢ່າງໄວວາ, ບັນຫາການຄຸ້ມຄອງຂີ້ເຫຍື້ອ, ລະບົບລະບາຍນໍ້າເປື້ອນ, ການຮັກສາຄຸນນະພາບສິ່ງແວດລ້ອມ-ສັງຄົມ ແລະ ແຮງກົດດັນມະຫານສານຈາກ ການທ່ອງທ່ຽວທາງພາຍນອກ ແລະ ພາຍໃນ, ເພື່ອເຮັດໃຫ້ ການພັດທະນາຕົວເມືອງ ນະຄອນ ຫຼວງພະບາງ ດຳເນີນຢ່າງຖືກຕ້ອງຕາມລະບຽບກົດໝາຍ ແລະ ຄຽງຄູ່ກັບການອະນຸລັກມໍຣະດົກໂລກຫຼວງພະບາງ, ໂຄງການປັບປຸງສິ່ງແວດລ້ອມຕົວເມືອງນະຄອນ ຫຼວງພະບາງ ຈຶ່ງມີຄວາມສໍາຄັນເປັນຢ່າງຍິ່ງ ເພື່ອຍົກລະດັບຄຸນນະພາບຊີວິດຂອງປະຊາຊົນ, ສົ່ງເສີມສຸຂະອະນາໄມ, ສິ່ງແວດລ້ອມທີ່ດີ, ຫຼຸດຜ່ອນຜົນ ກະທົບຈາກມົນລະພິດ ແລະ ໄພທຳມະຊາດ, ພ້ອມທັງສ້າງພື້ນຖານທີ່ໝັ້ນຄົງ ສໍາລັບການພັດທະນາຕົວ ເມືອງ ແບບຍືນຍົງ ໃນອະນາຄົດ ແລະ ສິ່ງສໍາຄັນສອດຄ່ອງກັບແຜນພັດທະນາເສດຖະກິດ-ສັງຄົມ (5 ປີ 2025-2029) ຂອງນະຄອນ ຫຼວງພະບາງ ກໍຄື ແຜນພັດທະນາເສດຖະກິດ-ສັງຄົມ (5 ປີ 2026-2030) ຂອງແຂວງຫຼວງພະບາງ ຊຶ່ງຜູ້ເຂົ້າຮ່ວມກອງປະຊຸມ ຈະຕ້ອງສຸມໃສ່ຄົ້ນຄວ້າພິຈາລະນາແກ້ໄຂໃຫ້ຄໍາແນະນໍາທາງດ້ານຍຸດທະສາດ-ທິດທາງ ແລະໃຫ້ການສະໜັບສະໜູນ ເພື່ອໃຫ້ບັນລຸຕາມເປົ້າໝາຍຂອງໂຄງການ ແລະຂອງລັດຖະບານ ດ້ວຍການຈັດຕັ້ງປະຕິບັດໂຄງການ ເປັນໄປຕາມເປົ້າໝາຍ, ມີປະສິດທິຜົນ ແລະໂປ່ງໃສ.
 |
ກອງປະຊຸມຄັ້ງນີ້ ເປັນການເລີ່ມຕົ້ນກົນໄກການເຮັດວຽກ ຂອງຄະນະຊີ້ນໍາລວມຂັ້ນແຂວງ, ເຊິ່ງຜູ້ເຂົ້າຮ່ວມໄດ້ຮັບຟັງບົດລາຍງານຄວາມຄືບໜ້າ ຂອງການຈັດຕັ້ງປະຕິບັດໂຄງການ, ພ້ອມທັງຮ່ວມກັນຄົ້ນຄວ້າຂໍ້ສະດວກ, ຂໍ້ຫຍຸ້ງຍາກ, ສິ່ງທ້າທາຍ ແລະ ຫາວິທີທາງແກ້ໄຂ, ເປັນຕົ້ນບັນຫາການກຳຈັດຂີ້ເຫຍື້ອ, ການບຳບັດນ້ຳເປື້ອນ, ການຈັດສັນຄວາມເປັນລະບຽບ-ຮຽບຮ້ອຍ ຂອງລະບົບສາຍໄຟຟ້າ-ລະບົບສາຍສື່ສານ, ການປັບປຸງເສັ້ນທາງ ແລະ ອື່ນໆ, ເຊິ່ງແຕ່ລະວຽກງານຂອງໂຄງການ ໄດ້ຮັບທືນກູ້ຢືມ ແລະ ຊ່ວຍເຫຼືອຈາກ ທະນາຄານພັດທະນາອາຊີ ຫຼື ADB, ລວມທັງທືນສົມທົບຂອງລັດຖະບານລາວ ລວມມູນຄ່າ 45 ລ້ານໂດລາ ໂດຍມີແຜນຈັດຕັ້ງປະຕິບັດຈົນເຖີງ ວັນທີ່ 30 ມິຖຸນາ 2030.
ຂ່າວ-ພາບ: ອາພຸດເດດ ບຸບຜາ
ຄໍາເຫັນ