ພ້ອມດ້ວຍພັນລະຍາ ແລະ ຄະນະ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມປຶກສາຫາລື ດ້ານການເມືອງຂັ້ນລັດຖະມົນຕີຕ່າງປະເທດ ລາວ-ຫວຽດນາມ ຄັ້ງທີ 11 ໃນລະຫວ່າງວັນທີ 16-18 ທັນວາ 2024, ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສປປ ລາວ ແລະ ສສ ຫວຽດນາມ ໃຫ້ສືບຕໍ່ໄດ້ຮັບການເພີ່ມພູນຄູນສ້າງ ແລະ ແຕກດອກອອກຜົນຍິ່ງໆຂຶ້ນ.
ກອງປະຊຸມປຶກສາຫາລືດ້ານການເມືອງ ຂັ້ນລັດຖະມົນຕີ ລະຫວ່າງ ສອງກະຊວງການຕ່າງປະເທດ ລາວ-ຫວຽດນາມ ຄັ້ງທີ 11 ຈັດຂຶ້ນໃນຕອນບ່າຍຂອງວັນທີ 16 ທັນວາ 2024 ທີ່ກະຊວງການຕ່າງປະເທດ ແຫ່ງ ສປປ ລາວ ຊຶ່ງສອງຝ່າຍ ໄດ້ທົບທວນຄືນການພົວພັນຮ່ວມມື ລາວ-ຫວຽດນາມ ໃນໄລຍະຜ່ານມາ ເວົ້າລວມ, ເວົ້າສະເພາະ ແມ່ນການສະຫຼຸບຕີລາຄາຄືນການຮ່ວມມືລະຫວ່າງ ສອງກະຊວງການຕ່າງປະເທດ ລາວ-ຫວຽດນາມ ແລະ ໄດ້ປຶກສາຫາລືແລກປ່ຽນຄຳຄິດເຫັນໃນຫຼາຍບັນຫາຮ່ວມກັນ ແລະ ກຳນົດທິດທາງແຜນການຮ່ວມມືໃນຕໍ່ໜ້າ ເປັນຕົ້ນການຮ່ວມມືສອງຝ່າຍ ແລະ ຫຼາຍຝ່າຍ. ພ້ອມນີ້, ສອງຝ່າຍ ເຫັນດີເອກະພາບຕີລາຄາສູງຕໍ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ-ສອງລັດຖະບານ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ທີ່ສືບຕໍ່ໄດ້ຮັບການເພີ່ມພູນຄູນສ້າງ ໃຫ້ແຕກດອກອອກຜົນຍິ່ງໆຂຶ້ນ, ໃນນັ້ນ ຄະນະຜູ້ແທນສອງປະເທດໄດ້ມີການແລກປ່ຽນການພົບປະຢ້ຽມຢາມຊຶ່ງກັນ ແລະ ກັນ ຢ່າງເປັນປົກກະຕິ, ແລກປ່ຽນບົດຮຽນຊຶ່ງກັນ ແລະ ກັນ ດ້ານທິດສະດີ, ຂໍ້ມູນຂ່າວສານ, ປະສົບການວຽກງານກໍ່ສ້າງພັກ, ລະບົບການເມືອງ, ການສ້າງກົດໝາຍ, ການພັດທະນາເສດຖະກິດ-ສັງຄົມ, ວຽກງານປ້ອງກັນຊາດ, ປ້ອງກັນຄວາມສະຫງົບ ແລະ ອື່ນໆ. ສອງຝ່າຍ ສະແດງຄວາມຊົມເຊີຍຕໍ່ການຮ່ວມມື ດ້ານເສດຖະກິດ-ການຄ້າ, ການລົງທຶນ ທີ່ສືບຕໍ່ໄດ້ຮັບການຈັດຕັ້ງປະຕິບັດຢ່າງມີຜົນສຳເລັດສູງ, ໃນນັ້ນ ມູນຄ່າການຄ້າສອງຝ່າຍ ໃນ 10 ເດືອນຕົ້ນປີ 2024 ບັນລຸໄດ້ 1.7 ຕື້ໂດລາ ແລະ ຄາດວ່າຈະບັນລຸ 2 ຕື້ໂດລາ ໃນທ້າຍປີ 2024, ປັດຈຸບັນ ວິສາຫະກິດ ຫວຽດນາມ ມາລົງທຶນຢູ່ ສປປ ລາວ ມີ 256 ໂຄງການ ລວມມູນຄ່າ 5.5 ຕື້ໂດລາ ຊຶ່ງໄດ້ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ. ພ້ອມນີ້, ສອງຝ່າຍ ເຫັນດີສືບຕໍ່ເອົາໃຈໃສ່ຊີ້ນຳບັນດາກະຊວງ-ຂະແໜງການຂອງຕົນ ຈັດຕັ້ງປະຕິບັດບັນດາໂຄງການລົງທຶນທີ່ເປັນຈຸດສຸມ ແລະ ສຸມໃສ່ແກ້ໄຂບັນດາຂໍ້ຫຍຸ້ງຍາກ, ຂໍ້ຄົງຄ້າງ ແລະ ສ້າງເງື່ອນໄຂອຳນວຍຄວາມສະດວກ ເພື່ອໃຫ້ສຳເລັດຕາມກຳນົດເວລາ ເປັນຕົ້ນໂຄງການສະໜາມບິນໜອງຄ້າງ, ໂຄງການເຂື່ອນໄຟຟ້າເຊຂະໝານ 3, ໂຄງການກໍ່ສ້າງສູນບຳບັດຢາເສບຕິດ, ໂຄງການກໍ່ສ້າງລະບົບຄຸ້ມຄອງສຳມະໂນຄົວ-ບັດປະຈຳຕົວ ແລະ ອື່ນໆ, ສືບຕໍ່ຈັດຕັ້ງຜັນຂະຫຍາຍບົດບັນທຶກ ວ່າດ້ວຍຍຸດທະສາດການຮ່ວມມື ດ້ານຄົມມະນາຄົມ-ຂົນສົ່ງ ໄລຍະ 2016-2025 ແລະ ວິໄສທັດຮອດປີ 2030, ສືບຕໍ່ປະສານສົມທົບໃນການຊອກຫາແຫຼ່ງທຶນ ເພື່ອຈັດຕັ້ງປະຕິບັດໂຄງການທີ່ເປັນຈຸດສຸມ ແລະ ເປັນຍຸດທະສາດຂອງສອງປະເທດ ເຊັ່ນ: ເສັ້ນທາງດ່ວນເຊື່ອມຕໍ່ ວຽງຈັນ-ຮ່າໂນ້ຍ, ເສັ້ນທາງລົດໄຟ ວຽງຈັນ-ທ່າແຂກ-ເຕີນເອີບ-ຫວຸ້ງອ່າງ ແລະ ບັນດາໂຄງການເຊື່ອມຕໍ່ຄົມມະນາຄົມທີ່ສຳຄັນອື່ນໆ; ຊຸກຍູ້ການຮ່ວມມືດ້ານການສຶກສາ ແລະ ການພັດທະນາຊັບພະຍາກອນມະນຸດ ລາວ-ຫວຽດນາມ ຊຶ່ງປັດຈຸບັນ ມີນັກສຶກສາລາວ ທີ່ກຳລັງສຶກສາຢູ່ ສສ ຫວຽດນາມ 14,050 ຄົນ ແລະ ບັນດານັກສຶກສາຫວຽດນາມ ທີ່ກໍາລັງສຶກສາຢູ່ ສປປ ລາວ ກໍມີຈຳນວນຫຼາຍ, ໃນນັ້ນ ສອງຝ່າຍ ໄດ້ໃຫ້ການຊຸກຍູ້ເພື່ອເອົາເນື້ອໃນກ່ຽວກັບປະຫວັດສາດການພົວພັນພິເສດ ລາວ-ຫວຽດນາມ, ຫວຽດນາມ-ລາວ ບັນຈຸເຂົ້າໃນການສິດສອນຢູ່ບັນດາໂຮງຮຽນຂອງສອງປະເທດອີກດ້ວຍ, ຝ່າຍລາວ ໄດ້ຕີລາຄາສູງຕໍ່ການຊ່ວຍເຫຼືອຈາກ ລັດຖະບານຫວຽດນາມ ຊຶ່ງໄດ້ຖືກນໍາໃຊ້ເຂົ້າໃນວຽກງານບໍາລຸງກໍ່ສ້າງ ແລະ ດໍາເນີນບັນດາກິດຈະການ, ໂຄງການຕ່າງໆທີ່ຄົບເງື່ອນໄຂຂອງຫວຽດນາມ ໃນນັ້ນ ຫຼາຍໂຄງການແມ່ນມີຄວາມຄືບໜ້າ ແລະ ດຳເນີນໄປຕາມແຜນການ.
ສຳລັບການຮ່ວມມືລະຫວ່າງ ສອງກະຊວງການຕ່າງປະເທດ ລາວ-ຫວຽດນາມ, ສອງຝ່າຍ ສະແດງຄວາມຊົມເຊີຍ ແລະ ຕີລາຄາສູງຕໍ່ການພົວພັນຮ່ວມມືອັນສະໜິດແໜ້ນ ໂດຍສະເພາະການເປັນເສນາທິການແກ່ຂັ້ນເທິງໃນການຊຸກຍູ້ສົ່ງເສີມ ການພົວພັນຮ່ວມມືໃນຂອບສອງຝ່າຍ ແລະ ຫຼາຍຝ່າຍ, ອັນພົ້ນເດັ່ນ ສອງກະຊວງມີການແລກປ່ຽນ ຂໍ້ມູນຂ່າວສານນຳກັນເປັນປົກກະຕິ. ປັດຈຸບັນ, ສອງກະຊວງ ກຳລັງສຸມໃສ່ຈັດຕັ້ງປະຕິບັດຂໍ້ຕົກລົງການຮ່ວມມື ໄລຍະ 2021-2025 ແລະ ແຜນຈັດຕັ້ງປະຕິບັດການທູດເສດຖະກິດ ໄລຍະ 2020-2025 ໂດຍເຫັນດີສືບຕໍ່ຈັດຕັ້ງປະຕິບັດບັນດາເອກະສານການຮ່ວມມື ທີ່ໄດ້ລົງນາມກັນແລ້ວນັ້ນ ໃຫ້ປະກົດຜົນເປັນຮູບປະທຳ ແລະ ມີປະສິດທິຜົນສູງສຸດ ເປັນຕົ້ນການຮ່ວມມືກັນຄົ້ນຄວ້າບັນດາເອກະສານສຳຄັນຕ່າງໆ, ການສ້າງນາຍແປພາສາ, ການຝຶກອົບຮົມນັກການທູດ, ການຍົກລະດັບບຸກຄະລາກອນກະຊວງການຕ່າງປະເທດ, ການປະສານສົມທົບກັນຂອງສະຖານທູດ ແລະ ຫ້ອງການຜູ້ຕາງໜ້າຂອງສອງປະເທດຢູ່ປະເທດທີ 3, ຍົກສູງປະສິດທິພາບການເປັນເສນາທິການຂອງຕົນໃຫ້ດີຂຶ້ນ, ຊຸກຍູ້ຕິດຕາມ ແລະ ແກ້ໄຂຂໍ້ຫຍຸ້ງຍາກຂອງການຮ່ວມມືສອງຝ່າຍ ໃຫ້ມີປະສິດທິພາບ ແລະ ທັນການຂຶ້ນກວ່າເກົ່າ, ເພີ່ມທະວີການຮ່ວມມືວຽກງານກົງສູນ, ວຽກງານການຂ່າວ ເຊັ່ນ: ວຽກໂຄສົກ-ຖະແຫຼງຂ່າວ, ຄົ້ນຄວ້າວິໄຈຂ່າວ, ການຄຸ້ມຄອງການນຳໃຊ້ສື່ສັງຄົມອອນລາຍ ແລະ ວຽກຕອບໂຕ້ຂ່າວໃສ່ຮ້າຍປ້າຍສີຕໍ່ສອງປະເທດ ແລະ ອື່ນໆ; ສືບຕໍ່ການຮ່ວມມືດ້ານການທູດເສດຖະກິດ, ວຽກງານຊາຍແດນ ລາວ-ຫວຽດນາມ ເປັນຕົ້ນການບູລະນະຫຼັກໝາຍຊາຍແດນທີ່ເປ່ເພ, ການຮັກສາຄວາມເປັນລະບຽບຮຽບຮ້ອຍຢູ່ບໍລິເວນຊາຍແດນ ແລະ ການຊຸກຍູ້ໃຫ້ປະຊາຊົນຢູ່ບໍລິເວນຊາຍແດນ ໃຫ້ມີການໄປມາຫາສູ່ກັນ ແລະ ຮ່ວມມືໃຫ້ຫຼາຍຂຶ້ນໃນຕໍ່ໜ້າ, ສືບຕໍ່ສະໜັບສະໜູນຊ່ວຍເຫຼືອຊຶ່ງກັນ ແລະ ກັນ ໃນເວທີພາກພື້ນ ແລະ ສາກົນ ເປັນຕົ້ນ ສປຊ, ອາຊຽນ, ຂອບການຮ່ວມມືອະນຸພາກພື້ນແມ່ນ້ຳຂອງ.
ກອງປະຊຸມປຶກສາຫາລືດ້ານການເມືອງຂັ້ນລັດຖະມົນຕີຕ່າງປະເທດ ລາວ-ຫວຽດນາມ ຄັ້ງທີ 11 ນີ້ ໄດ້ດໍາເນີນໄປດ້ວຍບັນຍາກາດອັນສ້າງສັນ ແລະ ເຕັມໄປດ້ວຍໄມຕີຈິດມິດຕະພາບ, ການປຶກສາຫາລື ແລະ ແລກປ່ຽນຄຳຄິດຄຳເຫັນ ໄດ້ກວມເອົາທຸກບັນຫາຂອງການພົວພັນຮ່ວມມືສອງປະເທດ ຊຶ່ງຝ່າຍຫວຽດນາມ ສະແດງຄວາມຍິນດີຈະສືບຕໍ່ເປັນເຈົ້າພາບຈັດກອງປະຊຸມປຶກສາຫາລືດ້ານການເມືອງຂັ້ນລັດຖະມົນຕີຕ່າງປະເທດ ລາວ-ຫວຽດນາມ ຄັ້ງທີ 12 ທີ່ ສສ ຫວຽດນາມ ໃນປີ 2025.
ພາຍຫຼັງສຳເລັດກອງປະຊຸມ, ສອງຝ່າຍ ກໍໄດ້ສືບຕໍ່ເຂົ້າຮ່ວມພິທີປະດັບຫຼຽນໄຊ, ຫຼຽນກາ ແລະ ໃບຍ້ອງຍໍ ແຫ່ງ ສສ ຫວຽດນາມ ມອບໃຫ້ກົມກອງລວມໝູ່ ແລະ ບຸກຄົນຂອງກະຊວງການຕ່າງປະເທດ ແຫ່ງ ສປປ ລາວ, ເພື່ອເປັນການຍ້ອງຍໍຊົມເຊີຍຜູ້ທີ່ມີຜົນງານດີເດັ່ນໃນການປະກອບສ່ວນເຫື່ອແຮງເຂົ້າໃນປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ປີ 2022 ຜ່ານມາ ຊຶ່ງຕາງໜ້າ ພັກ ແລະ ລັດຖະບານ ແຫ່ງ ສສ ຫວຽດນາມ ໃຫ້ກຽດປະດັບໃນຄັ້ງນີ້ໂດຍ ສະຫາຍ ບຸຍ ແທັງ ເຊີນປະກອບມີຫຼຽນໄຊເອກະລາດ ຊັ້ນ III ໃຫ້ 3 ສະຫາຍ ແລະ 2 ກົມກອງ, ຫຼຽນໄຊແຮງງານ ຊັ້ນ I ໃຫ້ 4 ກົມກອງ, ຫຼຽນໄຊແຮງງານ ຊັ້ນ II ໃຫ້ 6 ກົມກອງ ແລະ 2 ສະຫາຍ, ຫຼຽນໄຊແຮງງານ ຊັ້ນ III ໃຫ້ 1 ສະຫາຍ, ຫຼຽນໄຊມິດຕະພາບ ໃຫ້ 5 ສະຫາຍ ແລະ ຫຼຽນກາມິດຕະພາບ ໃຫ້ 5 ສະຫາຍ.
ຂ່າວ: ກະຊວງການຕ່າງປະເທດ
ຄໍາເຫັນ