ຫາລືແຜນການສືບຕໍ່ກໍ່ສ້າງຫໍທໍາມະສະພາ ແຂວງຫຼວງພະບາງ

ທ່ານ ທອງວັນ ຈັນນິລາ ຮອງປະທານແນວລາວສ້າງຊາດແຂວງຫຼວງພະບາງ ໄດ້ຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການແຕ່ງຕັ້ງ ຄະນະກຳມະການຮັບຜິດຊອບໂຄງການກໍ່ສ້າງຫໍທໍາມະສະພາ ຂອງອົງການພຸດທະສາສະໜາສໍາພັນລາວແຂວງຫຼວງພະບາງ ແລະ ມະຕິຂອງຄະນະປະຈໍາພັກແຂວງ ວ່າດ້ວຍການແຕ່ງຕັ້ງ ຄະນະຮັບຜິດຊອບໂຄງການບູລະນະສ້ອມແປງຫຼັງຄາ ພັດທະສີມມາ (ອາຣາມ) ວັດຄົກວ່າ. ພ້ອມນີ້, ຜູ້ເຂົ້າຮ່ວມຍັງໄດ້ຮັບຟັງ ການລາຍງານສະພາບ ການດຳເນີນໂຄງການກໍ່ສ້າງຫໍທໍາມະສະພາ ອົງການພຸດທະສາສະໜາສໍາພັນລາວ ແຂວງຫຼວງພະບາງ ໃນໄລຍະຜ່ານມາ, ຊຶ່ງປັດຈຸບັນບັນດາໜ້າວຽກໄດ້ສືບຕໍ່ດຳເນີນຕາມແຜນການ ແລະ ມີຄວາມຄືບໜ້າຕາມຄາດໝາຍ ຍ້ອນຄະນະຮັບຜິຊອບໄດ້ເອົາໃນໃສ່ ຊີ້ນຳການກໍ່ສ້າງຢ່າງໃກ້ຊິດ, ທັງໄດ້ຮັບການສະໜັບສະໜູນທຶນຮອນ ເຂົ້າໃນການກໍ່ສ້າງຈາກພາກສ່ວນຕ່າງໆ.

ໂອກາດນີ້, ທ່ານ ບຸນເລື່ອມ ມະນີວົງ ປະທານສະພາປະຊາຊົນແຂວງ ໄດ້ກ່າວວ່າ: ການແຕ່ງຕັ້ງຄະນະຮັບຜິດຊອບທັງສອງໂຄງການນີ້ ເປັນການເພີ່ມທະວີການນໍາພາຂອງພັກ ຕໍ່ວຽກງານອົງການພຸດທະສາສະໜາ ໂດຍສະເພາະ ການມອບໝາຍຄວາມຮັບຜິດຊອບຂອງທຸກພາກສ່ວນທີ່ກ່ຽວຂ້ອງ ໄດ້ມີຄວາມຮັບຜິດຊອບຮ່ວມກັນ ເຮັດໃຫ້ທັງສອງໂຄງການ ຂອງອົງການພຸດທະສາສະໜາສໍາພັນລາວແຂວງຫຼວງພະບາງ ສາມາດດຳເນີນການຢ່າງມີປະສິດທິພາບ ແລະ ມີປະສິດທິຜົນ ສໍາເລັດຕາມຄາດໝາຍທີ່ກຳນົດໄວ້ ແນໃສ່ອະນຸລັກ ແລະ ເສີມຂະຫຍາຍ ວັດທະນະທໍາອັນດີງາມຂອງປະຊາຊົນບັນດາເຜົ່າຫຼວງພະບາງ ກໍຄືຂອງຊາດລາວ ໄວ້ໃຫ້ຍືນຍົງ ຕາມແນວທາງຂອງພັກໄດ້ວາງໄວ້.

ໂອກາດດຽວກັນ, ໄດ້ມີການມອບເງິນ ເພື່ອນໍາໃຊ້ເຂົ້າໃນໂຄງການສ້ອມແປງຫລັງຄາພັດທະສີມມາ ວັດຄົກວ່າ ປະກອບມີ: ທ່ານ ສົມສະຫວາດ ເລັ່ງສະຫວັດ 25,000 ໂດລາ, ທ່ານ ສີສັກ ຮຸ່ງວິໄລ 20,000 ໂດລາ, ທ່ານ ສະເໜີ ຈຸນລະມະນີ 11,000 ໂດລາ, ທ່ານ ສົມບູນ ສິດທິພອນ 2,000 ໂດລາ. ພ້ອມດຽວກັນນີ້ ພະອາຈານ ຄໍາພັນ ພັນທະມຸຕໂຕ ເຈົ້າອະທິການວັດຊຽງທອງ ຖວາຍປັດໄຈຈາກການຈັດບຸນ 84,000 ພະທໍາມະຂັນ ໃນບຸນຫົດສົງນ້ຳພະເຈົ້າໝ່ານ ປີໃໝ່ລາວ 2026 ຈຳນວນ 200 ລ້ານກີບ ແລະ ບໍລິສັດສັດຊີມັງຄອນ 150 ລ້ານກີບ ເພື່ອນໍາໃຊ້ເຂົ້າໃນໂຄງການກໍ່ສ້າງຫໍທໍາມະສະພາ ອົງການພຸດທະສາສະໜາສຳພັນລາວ ແຂວງຫຼວງພະບາງ .ຂ່າວ-ພາບ: ສົມສັກ ຈອມແປງສຸກ