 |
ທ່ານ ເກດເກສອນ ພະສີສົມບັດ ກ່າວວ່າ: ປັດຈຸບັນ, ພະຍາດເລືອດຈາງໃນແມ່ຍິງ ແລະ ເດັກນ້ອຍ ຍັງເປັນບັນຫາດ້ານສາທາລະນະສຸກທີ່ສຳຄັນຂອງໂລກ ໂດຍສະເພາະເດັກນ້ອຍ, ເດັກຍິງ, ໄວໜຸ່ມ, ແມ່ຍິງໄວຈະເລີນພັນ, ແມ່ຍິງຖືພາ ແລະ ຫຼັງເກີດລູກ ອົງການອະນາໄມໂລກ (WHO) ຄາດຄະເນວ່າ 40% ຂອງເດັກອາຍຸ 6-59 ເດືອນ 37% ຂອງແມ່ຍິງຖືພາ, 30% ຂອງແມ່ຍິງອາຍຸ 15-49 ປີໃນທົ່ວໂລກເປັນພະຍາດເລືອດຈາງ, ປີ 2019 ສປປ ລາວ ມີຂໍ້ມູນປະຊາກອນ ທີ່ເປັນພະຍາດເລືອດຈາງ ໃນນີ້ 47% ຂອງແມ່ຍິງຖືພາ 39.2% ແມ່ຍິງທີ່ບໍ່ໄດ້ຖືພາ 19% ແມ່ຍິງໄວຈະເລີນພັນ ແລະ 43% ຂອງເດັກນ້ອຍ ກຸ່ມທີ່ມີຄວາມສ່ຽງສູງ ແມ່ນແມ່ຍິງຖືພາ ແລະ ເດັກນ້ອຍ ໂດຍສະເພາະຜູ້ທີ່ອາໄສຢູ່ເຂດຊົນນະບົດ ທີ່ບໍ່ສາມາດເຂົ້າເຖິງສາທາລະນະສຸກ ສາເຫດ ແລະ ປັດໄຈທີ່ປະກອບສ່ວນໃຫ້ມີພາວະເລືອດຈາງ ແມ່ນການຂາດທາດເຫຼັກ (ການຂາດສານອາຫານ) ການຂາດອາຫານ ແລະ ບັນຫາສຸຂະພາບທີ່ຕິດພັນ.
ພະຍາດເລືອດຈາງ ສົ່ງຜົນກະທົບທາງລົບຕໍ່ການເຕີບໃຫຍ່ນໍາໄປສູ່ອາການອ່ອນເພຍ ພູມຕ້ານທານ ຕໍ່າ, ຮ່າງກາຍອ່ອນແອຕິດເຊື້ອໄດ້ງ່າຍຂຶ້ນ ເນື່ອງຈາກລະບົບພູມຕ້ານທານເຮັດວຽກບໍ່ໄດ້ເຕັມປະສິດທິຜົນ ແລະ ອາດກະທົບຕໍ່ການພັດທະນາດ້ານສະຕິປັນຍາການຮຽນຮູ້ ແລະ ມີບັນຫາດ້ານພຶດຕິກຳໃນໄລຍະຍາວ ໂດຍສະເພາະໃນເດັກພາວະເລືອດຈາງ ເຮັດໃຫ້ຄວາມເຂັ້ມຂຸ້ນຂອງ hemoglobin ຕໍ່າ, ໃນລະຫວ່າງການຖືພາອາດສົ່ງຜົນກະທົບກັບແມ່ຍິງຖືພາ ແລະ ມີຄວາມສ່ຽງຕໍ່ແມ່ເພີ່ມຂຶ້ນ. ລັດຖະບານລາວມີເປົ້າໝາຍຫຼຸດຜ່ອນການເປັນພະຍາດເລືອດຈາງຂອງແມ່ ແລະ ເດັກນ້ອຍ ແລະ ຫຼຸດຜ່ອນອັດຕາການຕາຍຂອງແມ່ ແລະ ເດັກ ປັດໄຈສ່ຽງຫຼັກຂອງການເສຍຊີວິດຂອງແມ່ ຍ້ອນການຕົກເລືອດຫຼັງເກີດໃນແມ່ຍິງຖືພາ ທີ່ເປັນພະຍາດເລືອດຈາງ ກະຊວງສາທາລະນະສຸກໄດ້ເຫັນຄວາມສຳຄັນໃນການປ້ອງກັນ ເພື່ອຫຼຸດຜ່ອນພາວະເລືອດຈາງໃນແມ່ ແລະ ເດັກ ໃນການຫຼຸດຜ່ອນນີ້, ການຄັດກອງ (screening) ມີຄວາມຈຳເປັນຫຼາຍໃນການປ້ອງກັນ ແລະ ແກ້ໄຂໃຫ້ທັນເວລາ ເພື່ອຫຼຸດຜ່ອນການກ້າວເຂົ້າສູ່ພະຍາດເລືອດຈາງ ການຄັດກອງເຮັດໃຫ້ພົບແມ່ ແລະ ເດັກທີ່ມີພາວະເລືອດຈາງ. ລັດຖະບານ ຈຶ່ງຕ້ອງການເປັນເອກະພາບໃນການຈັດຕັ້ງນະໂຍບາຍ ເພື່ອໃຫ້ເປັນບຸລິມະສິດລະດັບຊາດ ເພາະການທີ່ຈະບັນລຸໄດ້ ບໍ່ແມ່ນພາກສ່ວນສະເພາະໃດໜຶ່ງ ແຕ່ເປັນການຮ່ວມມືຂອງພາກສ່ວນກ່ຽວຂ້ອງ. ລັດຖະບານຈຶ່ງໄດ້ຈັດກອງປະຊຸມຄັ້ງນີ້ຂຶ້ນ ເພື່ອສ້າງແຜນງານ ຄູ່ມື ແລະ ການແນະນຳໃນການປ້ອງກັນ ທີ່ມີການຮ່ວມມືຈາກຫຼາຍພາກສ່ວນ ເພື່ອຫຼຸດຜ່ອນພາວະເລືອດຈາງຂອງແມ່ ແລະ ເດັກ ເກີດຂຶ້ນໃນ ສປປ ລາວ.
ໂອກາດນີ້, ທ່ານ ອາລົງກອນ ເພັງສະຫວັນ ກ່າວວ່າ: ພະຍາດເລືອດຈາງ ຍ້ອນຂາດທາດເຫຼັກ ແລະ ສາເຫດອື່ນໆ ການຂາດທາດເຫຼັກ ມັນຈະເກີດຜົນແນວໃດຕໍ່ແມ່ ແລະ ເດັກ ສໍາລັບສະພາບເລືອດຈ້າງໃນ ສປ ປລາວ ຊຶ່ງສະພາບເລືອດຈາງແມ່ນສູງເຖິງ 40-50% ສາເຫດຍ້ອນຂາດທາດເຫຼັກ ແລະ ເຂົາເຈົ້າບໍ່ຮູ້ວ່າຈະກິນອາຫານປະເພດໃດ ແລະ ສາມາດກວດທ້ອງ ຫຼື ກວດທ້ອງໄວເທົ່າທີ່ຈະໄວໄດ້ ສໍາລັບວິທີປ້ອງກັນໃຫ້ມາກວດທ້ອງ ແລະ ໃຫ້ວິຕາມິນເສີມ.
 |
ທ່ານ ສຸລິເດດ ແສງຈັນ ຫົວໜ້າພາກວິຊາກຸມມານເວດສາດ ຄະນະແພດສາດ ມວສ ກ່າວວ່າ: ເພື່ອເຮັດແນວໃດໃຫ້ເດັກນ້ອຍລາວມີພັດທະນາການທີ່ດີ ພ້ອມທັງສະຫຼາດ ແລະ ໃນໄລຍະຜ່ານມາ ພວກເຮົາໄດ້ສົ່ງເສີມທາງສູນແມ່ ແລະ ເດັກ ອອກນະໂຍບາຍໃຫ້ທາດເຫຼັກ ໜຶ່ງແມ່ນເສີມ ແລະ ສອງແມ່ນປິ່ນປົວ, ການຂາດທາດເຫຼັກບໍ່ເຮັດໃຫ້ແມ່ເສຍຊີວິດ ແຕ່ເຮັດໃຫ້ເດັກເສຍໂອກາດໃນການພັດທະນາສະໝອງ.
ຂ່າວ-ພາບ: ບຸນອູ້ມ
ຄໍາເຫັນ