ຮັບຮອງເມືອງຕຸ້ມລານ ເປັນເມືອງຢຸດຕິການຖ່າຍຊະຊາຍເມືອງທີ 7 ຂອງແຂວງ

ເມື່ອບໍ່ດົນມານີ້, ເມືອງຕຸ້ມລານ ແຂວງສາລະວັນ ໄດ້ຮັບການປະກາດເປັນເມືອງຢຸດຕິການຖ່າຍຊະຊາຍເປັນເມືອງທີ 7 ຂອງແຂວງ ແລະ ເປັນເມືອງທີ 98 ໃນທົ່ວປະເທດ ພາຍຫຼັງສຸມໃສ່ການຈັດຕັ້ງປະຕິບັດຄົບຕາມມາດຖານເງື່ອນໄຂຖືເປັນຜົນງານຂອງການສ້າງຄວາມເຂັ້ມແຂງໃຫ້ກັບຊຸມຊົນ ກໍຄືຄວາມເປັນເຈົ້າການຂອງພໍ່ແມ່ປະຊາຊົນ ຕໍ່ວຽກງານຊຸມຊົນເປັນເຈົ້າການດ້ານສຸຂະອະນາໄມ (ຊຈສ), ເປັນການເພີ່ມທະວີຄວາມຮັບຜິດຊອບຂອງປະຊາຊົນ, ຄອບຄົວ ແລະ ສັງຄົມລິເລີ່ມມີສ່ວນຮ່ວມກາຍເປັນຜົນສຳເລັດອັນລວມ, ພາຍໃຕ້ການຊຸກຍູ້, ສົ່ງເສີມຂອງອົງການປົກຄອງແຕ່ລະຂັ້ນ ແລະ ຂະແໜງການສາທາລະນະສຸກໃກ້ຊິດຕິດແທດ, ແນະນຳຂັ້ນຕອນ, ວິທີການ ແລະ ສະ   ໜອງງົບປະມານໃນແຕ່ລະໄລຍະ ເຮັດໃຫ້ບັນລຸໄດ້ຕາມຄາດໝາຍ, ປະຊາຊົນພາຍໃນເມືອງໄດ້ຊົມໃຊ້ວິດຖ່າຍເປັນຂອງຕົນເອງຈໍານວນ 4.528 ຫຼັງກວມ 93,11% ແລະ ອີກ 335 ຫຼັງແມ່ນຊົມໃຊ້ຮ່ວມ ເຮັດໃຫ້ອັດຕາການຊົມໃຊ້ວິດຖ່າຍໃນທົ່ວເມືອງກວມເອົາ 100%. ເປັນກຽດມອບໃບຢັ້ງຢືນໂດຍທ່ານ ແຫວນເພັດ ລັດດາວົງ ຫົວໜ້າຄະນະຈັດຕັ້ງແຂວງ ຜູ້ຊີ້ນຳວຽກງານຮອບດ້ານຂອງເມືອງ ແລະ ເປັນກຽດຮັບໂດຍທ່ານ ທອງໃສ ເພັດລາສີ ເຈົ້າເມືອງຕຸ້ມລານ. ພ້ອມນີ້, ໄດ້ມອບໃບຍ້ອງຍໍໃຫ້ກົມກອງ ແລະ ບຸກຄົນທີ່ມີຜົນງານໃນການຈັດຕັ້ງປະຕິບັດວຽກງານ ຊຈສ. 
    ທ່ານ ແສງອາລຸນ ອຸ່ນຄໍາມະນີ ຮອງເຈົ້າເມືອງຕຸ້ມລານ ຜູ້ຊີ້ນໍາວຽກງານວັດທະນະທໍາ-ສັງຄົມເມືອງ ໄດ້ລາຍງານການຈັດຕັ້ງປະຕິບັດວຽກງານດັ່ງກ່າວວ່າ: ຫຼັງຈາກໄດ້ຮັບການຈັດຕັ້ງປະຕິບັດວຽກງານຫຼາຍດ້ານ ແລະ ມີຜົນ ສຳເລັດໃນແຕ່ລະບາດກ້າວຄົບຕາມມາດຖານ, ເງື່ອນໄຂ ແລະ ປະຊາຊົນ ສາມາດເຂົ້າເຖິງການບໍລິການດ້ານສາທາ ລະນະສຸກໂດຍມີໂຮງໝໍຊຸມຊົນ 1 ແຫ່ງ, ໂຮງໝໍນ້ອຍ 7 ແຫ່ງ, ມີ ອສບ ທັງໝົດ 98 ຄົນ, ມີກອງທຶນປະກັນສຸຂະພາບຊຸມຊົນກວມ 100%, ມີຮ້ານຂາຍຢາເອກະຊົນ 3 ຮ້ານ, ມີໂຮງງານນໍ້າດື່ມບໍລິສຸດຈຳໜ່າຍ 1 ແຫ່ງ ໄດ້ມີການລິເລີ່ມມາແຕ່ປີ 2009 ເປັນຕົ້ນມາ ຊຶ່ງໄດ້ສ້າງບ້ານສາທາລະນະສຸກແບບຢ່າງໄດ້ 1 ບ້ານ ກາຍເປັນແບບຢ່າງ, ບົດຮຽນໃນການເສີມຂະຫຍາຍ, ໃນປີ 2019 ໄດ້ເລີ່ມປະຕິບັດວຽກງານ ຊຈສ ຢ່າງເປັນຂະບວນຟົດຟື້ນ ຕໍ່ເນື່ອງຕາມຫຼັກການ ແລະ ນະໂຍບາຍວຽກງານຮັກສາສຸຂະພາບຂັ້ນຕົ້ນ, ຊຸກຍູ້ພໍ່ແມ່ປະຊາຊົນ ແລະ ປະເມີນຜົນໃນແຕ່ລະໄລຍະແຕ່ປີ 2009-2016 ສ້າງບ້ານ ຊຈສ ແລະ ບ້ານສາທາລະນະສຸກແບບຢ່າງໄດ້ 1 ບ້ານ, ປີ 2019 ສ້າງໄດ້ 4 ບ້ານ ປີ 2021 ສ້າງໄດ້ 7 ບ້ານ, ປີ 2022-2023 ສ້າງໄດ້ 25 ບ້ານກວມເອົາ 100% ຂອງບ້ານທັງໝົດ 37 ບ້ານ ໂດຍອີງໃສ່ການປະເມີນຕາມມາດຕະຖານ 4 ດາວຄື: ນໍາໃຊ້ວິດຖ່າຍບັນລຸໄດ້ 100%, ລ້າງມືໃສ່ສະບູໄດ້ 64,78%, ນໍ້າດື່ມ-ນໍ້າໃຊ້ທີ່ສະອາດໄດ້ 76,56% ແລະ ດາວທີ 4 ແມ່ນການອະນາໄມສິ່ງແວດລ້ອມບັນລຸໄດ້ 80,33%.
ຂ່າວ-ພາບ: ວິໄລວອນ ສິດທິໄຊ