ຮັບຮອງເມືອງໄຊບູລີເປັນເມືອງປະຕິບັດຂະບວນການສ້າງຄອບຄົວ ແລະບ້ານສາມັກຄີປອງດອງ

ເມື່ອບໍ່ດົນມານີ້ທີ່ສະໂມສອນເມືອງໄຊບູລີ ແຂວງສະຫວັນນະເຂດ ໄດ້ຈັດພິທີປະກາດຮັບຮອງເອົາເມືອງໄຊບູລີ ເປັນເມືອງປະຕິບັດຂະບວນການສ້າງຄອບຄົວ ແລະບ້ານສາມັກຄີປອງດອງໂດຍການເປັນປະທານຂອງທ່ານ ຄຳແພງ ເພັດທຸມພອນ ປະທານແນວລາວສ້າງຊາດແຂວງ, ມີທ່ານ ຄາລາໂຊ ຫຼຸຍບົວທອງ ຮອງເລຂາພັກເມືອງພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
    ທ່ານນາງ ສົມລານ ອິນທີສານ ປະທານແນວລາວສ້າງຊາດເມືອງ ກ່າວວ່າ: ເມືອງໄຊບູລີ ເປັນເມືອງໜຶ່ງທີ່ມີຄວາມອຸດົມສົມບູນທາງດ້ານທຳມະຊາດ, ມີພື້ນຖານທາງດ້ານການຜະລິດປູກຝັງລ້ຽງສັດໃຫ້ກາຍເປັນສິນຄ້າ, ເຕັມໄປດ້ວຍອູ່ເຂົ້າອູ່ປາທີ່ອຸດົມສົມບູນ, ມີທົ່ງພຽງຍາວເລາະຕາມແມ່ນໍ້າສາຍເຊບັ້ງໄຟ. ເມືອງໄຊບູລີມີເນື້ອທີ່ 1.109,9 ກິໂລຕາແມັດປະກອບມີ 52 ບ້ານ, ມີ 3 ຊົນເຜົ່າຄື: ຊົນເຜົ່າລາວ, ຊົນເຜົ່າຜູ້ໄທ ແລະຊົນເຜົ່າບຣູປະຊາຊົນມີມູນເຊື້ອສາມັກຄີປອງດອງຮັກແພງຊ່ວຍເຫຼືອຊຶ່ງກັນ ແລະກັນ, ມີມູນເຊື້ອດຸໝັ່ນຂະຫຍັນພຽນຮູ້ຈັກອະນຸລັກຮັກສາຮີດຄອງປະເພນີອັນດີງາມຂອງເຜົ່າຂອງຊາດໄດ້ດີຕະຫຼອດມາ.ດັ່ງຄຳຂວັນທີ່ວ່າ: “ໄຊບູລີ ອຸດົມດີທັນຍາຫານ ໃບເສມາໜອງເຮືອທອງຊື່ລືລັ່ນ ງາມສາຍຂອງເຊບັ້ງໄຟໄຫຼປະສານແກ້ງກະເບົາ ມ່ວນຊື່ນບຸນສົງການນໍ້າຕານຫວານຜະລິດຕະພັນສູ່ສາກົນ” ພາຍໃຕ້ການຊີ້ນຳໆພາຂອງອົງຄະນະພັກເມືອງບວກກັບຄວາມສາມັກຄີອັນເປັນປຶກແຜ່ນຂອງປະຊາຊົນບັນດາເຜົ່າ.
    ຜ່ານການຈັດຕັ້ງປະຕິບັດຂະບວນການສ້າງຄອບຄົວ ແລະບ້ານສາມັກຄີປອງດອງຂອງແນວລາວສ້າງຊາດສາມາດປະເມີນຮັບຮອງເອົາຄອບຄົວສາມັກຄີປອງດອງຈຳນວນ 10.772 ຄອບຄົວເທົ່າກັບ 98%, ຮັບຮອງເປັນບ້ານສາມັກຄີປອງດອງ 52 ບ້ານເທົ່າກັບ 100% ຊຶ່ງບັນດາຄອບຄົວ ແລະບ້ານທີ່ໄດ້ຮັບຮອງ ແມ່ນໄດ້ຜ່ານການປະເມີນຜົນຕາມ 4 ມາດຖານການສ້າງຄອບຄົວ ແລະ 5 ມາດຖານການສ້າງບ້ານສາມັກຄີປອງດອງຂອງແນວລາວສ້າງຊາດວາງອອກ.
    ໃນພິທີ, ທ່ານ ຄຳແພງ ເພັດທຸມພອນ ໄດ້ໃຫ້ກຽດມອບໃບຢັ້ງຢືນຮັບຮອງເມືອງໄຊບູລີ ເປັນເມືອງປະຕິບັດຂະບວນການສ້າງຄອບຄົວ ແລະບ້ານສາມັກຄີປອງດອງຂອງແນວລາວສ້າງຊາດ, ຕາງໜ້າຮັບໂດຍທ່ານຮອງເຈົ້າເມືອງໄຊບູລີ.
ຂ່າວ-ພາບ: ສະຫວັນນະເຂດ