ຮັບຮອງເມືອງໄຊພູທອງ ເປັນເມືອງສ້າງຄອບຄົວ ແລະ ບ້ານສາມັກຄີປອງດອງ

ພິທີປະກາດເມືອງໄຊພູທອງ ເປັນເມືອງຈັດຕັ້ງປະຕິບັດການສ້າງຄອບຄົວ ແລະ ບ້ານສາມັກຄີປອງດອງ ເປັນເມືອງທີ 3 ຂວງສະຫວັນນເຂດໄດ້ຈັດຂຶ້ນເມື່ອບໍ່ດົນມານີ້, ໂດຍມີພະອາຈານ ທອງດໍາຈັນທະວົງ ເຈົ້າຄະນະ ອພສ ແຂວງ, ມີທ່ານ ຄໍາແພງ ເພັດທຸມພອນ ປະທານແນວລາວສ້າງຊາດແຂວງ, ທ່ານນາງ ດາວວອນ ໄຊສຸລຽນ ເຈົ້າເມືອງໄຊພູທອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານນາງ ແກ້ວວິຈິດວົງໂພສີ ປະທານແນວລາວສ້າງຊາດເມືອງ ກ່າວວ່າ:ເມືອງໄຊພູທອງປະກອບມີ 41ບ້ານ, ມີພົນລະເມືອງທັງໝົດ 52.837 ຄົນຍິງ 26.216 ຄົນ,ມີ 8 ກຸ່ມບ້ານ, 10.702 ຫຼັງຄາເຮືອນ, 11.621 ຄອບຄົວ,ມີ 2 ຊົນເຜົ່າຄື: ເຜົ່າລາວກວມເອົາ 93,48%, ເຜົ່າຜູ້ໄທ 6,51% ປະຊາຊົນສ່ວນໃຫຍ່ຢຶດຖືອາຊີບເຮັດນາ,ປູກຝັງ-ລ້ຽງສັດ ແລະ ຄ້າຂາຍເປັນສໍາຮອງ.ຜ່ານການຈັດຕັ້ງປະຕິບັດຂະບວນການສ້າງຄອບຄົວ ແລະບ້ານສາມັກຄີປອງດອງຂອງເມືອງໄຊພູທອງໃນໄລຍະຜ່ານມາໄດ້ປະກອບສ່ວນຢ່າງໃຫຍ່ຫຼວງເຂົ້າໃນການປົກປັກຮັກສາ ແລະ ສ້າງສາພັດທະນາເມືອງສາມາດຮັບຮອງຄອບຄົວສາມັກຄີປອງດອງໄດ້ 11.350 ຄອບຄົວ ເທົ່າກັບ 98% ຂອງຄອບຄົວທັງໝົດ ແລະ ຮັບຮອງບ້ານສາມັກຄີປອງດອງໄດ້ທັງໝົດ 41 ບ້ານເທົ່າກັບ 100% ຂອງບ້ານທັງໝົດໃນທົ່ວເມືອງ.
ໂອກາດນີ້,ທ່ານສິນໄຊ ວົງລະຄອນ ຮອງປະທານແນວລາວສ້າງຊາດແຂວງໄດ້ຜ່ານຂໍ້ຕົກລົງ ສະບັບ ເລກທີ 574/ຄປຈ,ລົງວັນທີ 18 ທັນວາ 2023 ຂອງປະທານສູນກາງແນວລາວສ້າງຊາດວ່າດ້ວຍການຢັ້ງຢຶນເມືອງໄຊພູທອງເປັນເມືອງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ແລະ ຂໍ້ຕົກລົງຂອງທ່ານເຈົ້າແຂວງສະຫວັນນະເຂດວ່າດ້ວຍການຢັ້ງຢືນ 41 ບ້ານຂອງເມືອງໄຊພູທອງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ 2 ປີລຽນຕິດ. ພ້ອມກັນນີ້, ທ່ານຄໍາແພງ ເພັດທຸມພອນ ໄດ້ໃຫ້ກຽດມອບໃບຢັ້ງຢືນການປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງໃຫ້ເມືອງໄຊພູທອງ ກ່າວຮັບໂດຍທ່ານເຈົ້າເມືອງໆໄຊພູທອງ. ໃນພິທີຄະນະປະທານໄດ້ໃຫ້ກຽດລັ່ນຄ້ອງ 9 ບາດ ແລະ ເປີດແຜ່ນປ້າຍເປັນເມືອງຈັດຕັ້ງປະຕິບັດການສ້າງຄອບຄົວ ແລະ ບ້ານສາມັກຄີປອງດອງ.
ຂ່າວ-ພາບ: ພັນທະມິດ ວົງສຸທິ