ຮັບຮອງວັດສີມຸງຄຸນໄຊຍະຣາມ ບ້ານນາບວມເປັນມໍລະດົກທ້ອງຖິ່ນ

ທ່ານ ຄຳພັນ ຄຳພູບົວ ຮັກສາການເຈົ້າເມືອງໆພຽງໄດ້ລາຍງານການກະກຽມກ່ຽວກັບການຈັດຕັ້ງປະຕິບັດການສ້າງວັດສີມຸງຄຸນໄຊຍະຣາມບ້ານນາບວມເປັນມໍຣະດົກທາງດ້ານວັດທະນະທຳລະດັບທ້ອງຖິ່ນຂັ້ນແຂວງ ຊຶ່ງໃນໄລຍະຜ່ານມາຄະນະພັກອົງການປົກຄອງເມືອງກໍຄືພາກສ່ວນທີ່ກ່ຽວຂ້ອງຂັ້ນແຂວງ, ຂັ້ນເມືອງໄດ້ປຸກລະດົມປະຊາຊົນບັນດາເຜົ່າພາຍໃນບ້ານເປັນເຈົ້າການໃນການປົກປັກຮັກສາ ແລະ ສົ່ງເສີມວັດທະນະທຳ, ຮີດຄອງປະເພນີອັນດີງາມຂອງຊາດທີ່ເຄີຍປະຕິບັດກັນມາໃຫ້ມີຄວາມຍືນຍົງພ້ອມທັງຕິດຕາມຊຸກຍູ້ ໃນການບູລະນະປົກປັກຮັກສາວັດຖຸພັນຕ່າງໆຢູ່ພາຍໃນວັດໄດ້ເປັນຢ່າງດີ ໄດ້ສົມທົບກັບພາກສ່ວນທີ່ກ່ຽວຂ້ອງຂັ້ນແຂວງ, ຂັ້ນເມືອງ ອົງການປົກຄອງບ້ານ ເຖົ້າແກ່ແນວໂຮມພ້ອມທັງ ສະເໜີຂໍວິຊາການຈາກກົມມໍລະດົກລົງເກັບກຳຂໍ້ມູນຕົວຈິງຢູ່ວັດສີມຸງຄຸນໄຊຍະຣາມ ເປັນຕົ້ນແມ່ນ ກຸຕິ, ຫໍກອງ, ທາດ, ອາຄານຕ່າງໆທີ່ມີຢູ່ພາຍໃນວັດ, ວັດຖຸພັນທີ່ເກົ່າແກ່, ຕົ້ນໄມ້ ແລະ ອື່ນໆ. ຜ່ານການສໍາຫຼວດ ເກັບກຳຂໍ້ມູນປະເມີນຜົນຕົວຈິງ ເຫັນວ່າ ວັດສີມຸງຄຸນໄຊຍະຣາມ ຄົບຕາມມາດຖານເງື່ອນໄຂໃນການປະກາດຮັບຮອງ ເປັນມໍຣະດົກທາງດ້ານວັດທະນະທໍາລະດັບທ້ອງຖິ່ນຂັ້ນແຂວງ ເພື່ອເປັນການຄຸ້ມ ຄອງ, ອະນຸລັກ ແລະ ປົກປັກຮັກສາໃຫ້ເປັນຊັບສົມບັດອັນລໍ້າຄ່າຂອງແຂວງກໍຄືຂອງຊາດລາວໃຫ້ມີຄວາມຍືນຍົງຕະຫຼອດໄປ.

ໃນໂອ້ກາດນີ້, ກໍໄດ້ຜ່ານຂໍ້ຕົກລົງຂອງທ່ານເຈົ້າແຂວງວ່າດ້ວຍການປະກາດຮັບຮອງວັດສີມຸງຄຸນໄຊຍະຣາມ ເປັນມໍຣະດົກທາງດ້ານວັດທະນະທໍາລະດັບທ້ອງຖິ່ນຂັ້ນແຂວງພ້ອມທັງໄດ້ມອບໃບຢັ້ງຢືນມໍລະດົກລະດັບທ້ອງຖິ່ນໃຫ້ກັບວັດດັ່ງກ່າວ. ຈາກນັ້ນ, ຄະນະປະທານພ້ອມດ້ວຍຜູ້ເຂົ້າຮ່ວມໄດ້ພ້ອມກັນລັ່ນຄ້ອງ 9 ບາດ, ຕັດແຖບຜ້າ ເປີດປ້າຍເພຶ່ອເປັນສັນຍາລັກການປະກາດຮັບຮອງເອົາວັດສີມຸງຄຸນໄຊຍະຣາມ ບ້ານນາບວມ ເປັນມໍລະດົກທາງດ້ານວັດທະນະທຳລະດັບທ້ອງຖິ່ນຂັ້ນແຂວງຢ່າງເປັນທາງການ.

(ຂ່າວ: ວົງສະຫວັນ ສຸທິໂວຫານ)