ສະຫາຍ ພັທ ສຸລິວັນ ແກ້ວມະນີວົງ ເລຂາຄະນະພັກຮາກຖານ ຫົວໜ້າກອງບັນຊາການ ປກສ ເມືອງສີສັດຕະນາກ ປະກອບຄຳເຫັນຕໍ່ກອງປະຊຸມໃຫຍ່ຄັ້ງທີ VIII ອົງຄະນະພັກເມືອງສີສັດຕະນາກ ໃນຫົວຂໍ້ “ຂົງເຂດວຽກງານແກ້ໄຂປະກົດການຫຍໍ້ທໍ້ ແລະ ບັນຫາຢາເສບຕິດ” ເມື່ອບໍ່ຜ່ານມານີ້ວ່າ: ຕະຫຼອດໄລຍະ 5 ປີຜ່ານມາ ກຳລັງປ້ອງກັນຄວາມສະຫງົບເມືອງສີສັດຕະນາກ ໄດ້ສະກັດກັ້ນ ແລະ ແກ້ໄຂບັນຫາຢາເສບຕິດໂດຍໄດ້ເຄື່ອນໄຫວ ແລະ ຈັດຕັ້ງການແກ້ໄຂຢ່າງເປັນປົກກະຕິ ຕາມວຽກວິຊາສະເພາະຂອງຕົນຢ່າງຕັ້ງໜ້າ ແລະ ມີຈຸດສຸມ, ພາຍຫຼັງທີ່ມີຄຳສັ່ງສະບັບເລກທີ 19/ນຍ, ລົງວັນທີ 4 ຕຸລາ 2021 ຂອງນາຍົກລັດຖະມົນຕີກ່ຽວກັບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ, ແຜນປະຕິບັດງານສະບັບເລກທີ 520/ປກສ.ນວ ລົງວັນທີ 3 ພະຈິກ 2021 ແລະ ຂໍ້ຕົກລົງສະບັບເລກທີ 516/ປກສ.ນວ, ລົງວັນທີ 1 ຕຸລາ 2021 ວ່າດ້ວຍການແບ່ງຄວມຮັບຜິດຊອບໃນການຈັດຕັ້ງຜັນຂະຫຍາຍແຜນການ, ສະນັ້ນກຳລັງປ້ອງກັນຄວາມສະຫງົບ ເມືອງສີສັດຕະນາກ ກໍໄດ້ຫັນມາເປັນແຜນການອັນລະອຽດ.
ໃນໄລຍະ 5 ປີຜ່ານມາ, ໄດ້ສຸມໃສ່ເຮັດວຽກງານໂຄສະນາເຜີຍແຜ່ຜົນຮ້າຍຂອງຢາເສບຕິດ ໂດຍສົມທົບກັບອຳນາດການປົກຄອງບ້ານຜ່ານທາງໂທລະໂຄ່ງໄດ້ 37 ບ້ານ ມີ 5,328 ຄັ້ງ, ໂຄສະນາວາລະແຫ່ງຊາດຕາມພື້ນທີ່ 23 ຄັ້ງ. ສະຖາບັນການສຶກສາ 17 ຄັ້ງ, ເປົ້າໝາຍຂອງການໂຄສະນາ ແມ່ນເພື່ອປຸກລະດົມຂົນຂວາຍ ໃຫ້ພໍ່ແມ່ປະຊາຊົນປະກອບສ່ວນເຂົ້າໃນວຽກງານປ້ອງກັນສະກັດກັ້ນ ບັນຫາການຊື້-ຂາຍ ແລະ ມົ້ວສຸມຢາເສບຕິດ, ໄປຄຽງຄູ່ກັນນັ້ນເຈົ້າໜ້າທີ່ພວກເຮົາຍັງລົງສົມທົບກັບອຳນາດປົກຄອງບ້ານ ເຮັດສັນຍາປ້ອງກັນຄວາມສະຫງົບກັບຫົວໜ່ວຍທຸລະກິດ 1,388 ຫົວໜ່ວຍ, ກັບຄອບຄົວ 500 ກວ່າຄອບຄົວ ແລະ ສົມທົບກັບຜູ້ປົກຄອງເພື່ອສຶກສາອົບຮົມເປົ້າໝາຍທີ່ມີການເຄື່ອນໄຫວພົວພັນກັບຢາເສບ, ສົ່ງໄປບຳບັດສູນສົມສະຫງ່າ 46 ຄົນ ຍິງ 3 ຄົນ, ເກັບກໍາຂຶ້ນບັນຊີເປົ້າໝາຍຢາເສບຕິດປີ 2025ມີທັງໝົດ 84 ຄົນ ຍິງ 6 ຄົນ, ໃນນັ້ນເປົ້າໝາຍເສບຢາເສບຕິດມີ 56 ຄົນ ຍິງ 2 ຄົນ, ເປົ້າໝາຍຄ້າຂາຍລາຍຍ່ອຍ ມີ 28 ຄົນ ຍິງ 4 ຄົນ. ສົມທຽບປີຜ່ານມາ ເຫັນວ່າຫຼຸດລົງ, 5 ປີຜ່ານມາມີສະພາບປາກົດການຫຍໍ້ທໍ້ໃນສັງຄົມ ເກີດຂຶ້ນທັງໝົດ 950 ເລື່ອງ, ສາມາດແກ້ໄຂ ຫຼື ມ້າງໄດ້ 710 ເລື່ອງ, ກັກຜູ້ຖືກຫາ 1,187 ຄົນ ຍິງ 138 ຄົນ, ບັນຫາທີ່ພົ້ນເດັ່ນແມ່ນຄະດີຢາເສບຕິດສາມາດມ້າງໄດ້ທັງໝົດ 388 ເລື່ອງ, ກັກຜູ້ຖືກຫາໄດ້ 647 ຄົນ ຍິງ 87 ຄົນ, ຢຶດຂອງກາງ ຢາບ້າ ໄດ້ 492,386 ເມັດ, ຢາໄອສ 29 ກິໂລ ກັບ 19 ຖົງນ້ອຍ, ຢາເຄ 3 ຖົງນ້ອຍ, ເຮໂຣອິນ 6 ແທ່ງ, ຢາອີ 1,011 ເມັດ, ແປ້ງຝຸ່ນປະສົມຢາເສບຕິດ 13 ຖົງນ້ອຍ ກັບ 277 ຊອງ, ຢາສູບໄຟຟ້າ 11 ອັນ, ບັ້ງອົກຊີບັນຈຸສານໄນຕັດ 13 ບັ້ງ, ຢຶດລົດໃຫຍ່ໄດ້ 7 ຄັນ, ລົດຈັກ 18 ຄັນ, ເງິນກີບ 186,327,000 ກີບ, ເງິນບາດ 522,730 ບາດ, ຄໍາຮູບປະພັນ 5 ບາດ, ທີ່ດິນ 2 ຕອນ, ປືນສັ້ນ 7 ກະບອກ ລູກປືນ 48 ລູກ.
ໃນຂະນະດຽວກັນ, ເພື່ອຮັບປະກັນການຈັດຕັ້ງປະຕິບັດບັນດາມາດຕະການສະກັດກັ້ນ ແລະ ການແກ້ໄຂປະກົດການຫຍໍ້ທໍ້ທີ່ເກີດຂຶ້ນໃນສັງຄົມ ຮັບປະກັນຄວາມສະຫງົບ, ຄວາມປອດໄພ ແລະ ໃຫ້ຖືກຕ້ອງຕາມກົດໝາຍ, ຕາມແນວທາງ ແລະ ຫຼັກການວິຊາສະເພາະ, ກອງບັນຊາການປ້ອງກັນຄວາມສະຫງົບເມືອງສີສັດຕະນາກ ມີມາດຕະການຈະສືບຕໍ່ຍົກສູງວຽກງານສຶກສາອົບຮົມນໍາພາການເມືອງແນວຄິດໃຫ້ນາຍ ແລະ ພົນຕໍາຫຼວດ ເປັນກົກ, ເປັນຮາກຖານທີ່ສໍາຄັນ ເພື່ອເຮັດໃຫ້ນາຍ ແລະ ພົນຕໍາຫຼວດມີຄຸນທາດການເມືອງໜັກແໜ້ນ, ມີຄວາມຈົງຮັກພັກດີຕໍ່ພັກ-ຕໍ່ລັດ, ມີຈັນຍາບັນ-ຈັນຍາທໍາ, ເປັນກໍາລັງຕໍາຫຼວດຂອງປະຊາຊົນ, ໂດຍປະຊາຊົນ ແລະ ເພື່ອຜົນປະໂຫຍດອັນຊອບທໍາຂອງປະຊາຊົນ ແລະ ຮັບປະກັນເຮັດສໍາເລັດໜ້າທີ່ການເມືອງຂອງຕົນ, ຫັນກຳລັງວິຊາສະເພາະລົງກໍ່ສ້າງຮາກຖານການເມືອງປຸກລະດົມທົ່ວສັງຄົມເຂົ້າຮ່ວມຈັດຕັ້ງປະຕິບັດແນວທາງປ້ອງກັນຊາດ - ປ້ອງກັນຄວາມສະຫງົບຮອບດ້ານຂອງພັກ ຢ່າງກ້ວາງຂວາງ ແລະ ເລິກເຊິ່ງ, ສົມທົບກັບພະນັກງານກໍ່ສ້າງຮາກຖານກະຊວງ ປກສ, ອົງການປົກຄອງທຸກຂັ້ນ, ໃນການນຳພາວຽກງານປ້ອງກັນຄວາມສະຫງົບຢູ່ຂັ້ນຮາກຖານໃນການກວດກາ, ຄຸ້ມຄອງການພັກເຊົາ, ຄຸ້ມຄອງຕິດຕາມເປົ້າໝາຍ, ກວດກາຄົນເຂົ້າອອກພັກເຊົາຕາມໂຮງແຮມ, ເຮືອນພັກ, ຣີສອດ, ເຮືອນເຊົ່າ ແລະ ເຮືອນຫ້ອງແຖວໃນແຕ່ລະບ້ານ.
ໃນນັ້ນ, ສືບຕໍ່ຈັດຕັ້ງປະຕິບັດຕາມທິດຊີ້ນຳຂອງຂັ້ນເທິງ ແລະ ບັນດານິຕິກຳຂອງພັກ-ລັດ, ແຜນ ການໜ່ວຍສະເພາະກິດແກ້ໄຂສະພາບປະກົດການຫຍໍ້ທໍ້ຂອງສັງຄົມຢູ່ເມືອງສີສັດຕະນາກ ໂດຍຖືເປັນສຳຄັນວຽກງານສືບສວນ-ສອບສວນຂັ້ນພື້ນຖານ, ວຽກງານສືບຂ່າວເກັບກຳຊອກຮູ້ເປົ້າໝາຍແຕ່ລະປະເພດ ເພື່ອແກ້ໄຂປັດໄຈໜໍ່ແໜງທີ່ຈະກໍ່ຄວາມບໍ່ສະຫງົບສຸກ ແລະ ຄວາມບໍ່ເປັນລະບຽບຮຽບຮ້ອຍໃນສັງຄົມ ຕາມຄໍາສັ່ງເລກທີ 27/ນຍ ແລະ ຂໍ້ຕົກລົງເລກທີ 2048/ປກສ, ເພື່ອແກ້ໄຂປະກົດການຫຍໍ້ທໍ້ ບັນຫາອາຊະຍາກໍາ ຢູ່ເມືອງສີສັດຕະນາກ ໃຫ້ຫຼຸດນ້ອຍຖອຍລົງ, ສືບຕໍ່ຈັດຕັ້ງປະຕິບັດວາລະແຫ່ງຊາດແກ້ໄຂບັນຫາຢາເສບຕິດ, ສຸມໃສ່ 6 ວຽກຈຸດສຸມ ຕາມຂໍ້ຕົກລົງຂອງເຈົ້າຄອງນະຄອນຫຼວງວຽງຈັນ ໃຫ້ເປັນຂະບວນການ, ເຮັດໃຫ້ທຸກພາກສ່ວນສັງຄົມເຂົ້າໃຈໜ້າທີ່ ແລະ ມີຄວາມຮັບຜິດຊອບສູງຕໍ່ການແກ້ໄຂບັນຫາຢາເສບຕິດ, ສືບຕໍ່ປະສານສົມທົບກັບຂະແໜງກ່ຽວຂ້ອງກວດກາຕິດຕາມສະຖານທີ່ບໍລິການຮ້ານກິນດື່ມ, ບັນເທີງ, ຮ້ານອາຫານ, ຮ້ານເກມອິນເຕີເນັດ ທີ່ສົ່ງສຽງເນື່ອງນັນ, ເຄື່ອນໄຫວລະເມີດລະບຽບກົດ ໝາຍ, ຕິດພັນກັບການມົ້ວສຸມສິ່ງເສບຕິດ ແລະ ມີການອາລະວາດຕີກັນ ຊຶ່ງຈະໄດ້ສືບຕໍ່ເຂົ້າຮ່ວມເປັນຄະນະສະເພາະກິດກວດກາແກ້ໄຂຢ່າງເຂັ້ມງວດ, ເອົາໃຈໃສ່ຊີ້ນໍາການດໍາເນີນຄະດີໃຫ້ວ່ອງໄວ, ຖືກຕ້ອງ ແລະ ຍຸຕິທໍາເພື່ອຕີຖອຍຫາງສຽງສັງຄົມ ຕໍ່ກຳລັງປ້ອງກັນຄວາມສະຫົງບ ເມືອງສີສັດຕະນາກ.
ຄໍາເຫັນ