ໃນໄລຍະຫ້າປີທີ່ຜ່ານມາ, ສູນກາງການຂົນສົ່ງທີ່ທັນສະໄໝ ແລະ ຄົບວົງຈອນໄດ້ຖືກສ້າງຂຶ້ນຢູ່ທີ່ນັ້ນ, ໂດຍມີດ່ານສາກົນໜານຊາງເປັນສູນກາງ, ລະບົບການຂົນສົ່ງແບບປະສົມປະສານລະຫວ່າງທາງຫຼວງ-ທາງລົດໄຟ-ທາງນ້ຳເປັນຫຼັກ. ລະບົບການຂົນສົ່ງທາງລົດໄຟ ແລະ ຂົວຂ້າມແມ່ນ້ຳເປັນເສັ້ນທາງຂົນສົ່ງທີ່ສະດວກສະບາຍສຳລັບຄົນທ້ອງຖິ່ນ.
ໃນຕອນກາງຄືນ, ດ່ານສາກົນໜານຊາງ ຊຶ່ງເປັນໜຶ່ງໃນບັນດາສູນກາງການຂົນສົ່ງແຫ່ງຊາດກຸ່ມທຳອິດໃນໄລຍະແຜນການ 5 ປີຄັ້ງທີ 14, ເປັນຖານການຂົນສົ່ງລະບົບຕ່ອງໂສ້ແບບຄວບຄຸມອຸນຫະພຸມຫຼັກຂອງປະເທດ, ຖານການຂົນສົ່ງທາງລົດໄຟຊັ້ນໜຶ່ງ ແລະ ເປັນດ່ານທາງບົກລະດັບ 5A ທີ່ຍັງຄົງຄຶກຄື້ນຢູ່.
ໃນໜ້າຈໍຂະໜາດໃຫຍ່ຂອງສູນຄວບຄຸມໃນດ່ານ, ເສັ້ນທາງລົດໄຟການຄ້າຕ່າງປະເທດທັງຂາເຂົ້າ ແລະ ຂາອອກ, ພ້ອມທັງໂຕເລກສຳລັບປະລິມານຕູ້ຄອນເທນເນີ ແລະ ມູນຄ່າສິນຄ້າປະກົດຂຶ້ນຢ່າງຕໍ່ເນື່ອງ, ເຜີຍໃຫ້ເຫັນການປ່ຽນແປງຈາກສູນແຈກຢາຍຂະໜາດນ້ອຍໃນທ້ອງຖິ່ນໃນອະດີດ ກາຍເປັນສູນກາງການຂົນສົ່ງໃນພາກພື້ນທີ່ຄຶກຄື້ນ.
ທ່ານ Liu Jianhong ຜູ້ຈັດການຂອງບໍລິສັດພັດທະນາທາງລົດໄຟນານຊາງ ຊຽງຖັງ ຈຳກັດ ໄດ້ແນະນຳວ່າ: ປັດຈຸບັນ, ດ່ານທາງບົກມີເສັ້ນທາງການຄ້າຕ່າງປະເທດ 25 ເສັ້ນທາງ ຊຶ່ງເຂົ້າເຖິງ 134 ປະເທດ ແລະ ພາກພື້ນ, ລວມທັງບັນດາປະເທດ ແລະ ພາກພື້ນໃນອາຊຽນ, ອາຊີກາງ, ເອີຣົບ ແລະ ອາເມລິກາໃຕ້.
ທ່ານ Liu Jianhong ໃຫ້ຂໍ້ສັງເກດວ່າ: ການນຳໃຊ້ການບໍລິການແຈ້ງພາສີແບບປະຕູດຽວສຳລັບການຂົນສົ່ງຮ່ວມກັນລະຫວ່າງທາງລົດໄຟ-ທາງທະເລ ແລະ ການບໍລິການແຈ້ງພາສີດ່ວນເຂົ້າ-ອອກທາງລົດໄຟ ສຳລັບບໍລິສັດ China Railway Express ເປັນການບຸກເບີກຂອງດ່ານທາງບົກ ຊ່ວຍໃຫ້ການແຈ້ງພາສີດໍາເນີນການຢ່າງງ່າຍດາຍ ແລະ ການຄ້າທີ່ລາບລື່ນ.
ໃນອະດີດ, ບໍລິສັດຜະລິດລົດຍົນທ້ອງຖິ່ນ ເຊັ່ນ: Jiangling Motors ເຄີຍຂົນສົ່ງຍານພາຫະນະຂອງຕົນຜ່ານທາງຫຼວງໄປຍັງເມືອງ Xiamen ຫຼື ເມືອງ Ningbo ທີ່ຕັ້ງຢູ່ແຄມທະເລເພື່ອສົ່ງອອກ, ແຕ່ປັດຈຸບັນການຂົນສົ່ງທາງລົດໄຟ-ທາງທະເລໄດ້ຫຼຸດເວລາການຂົນສົ່ງທັງໝົດລົງເຫຼືອພຽງ 5-7 ວັນ, ພ້ອມທັງຫຼຸດຜ່ອນຄ່າໃຊ້ຈ່າຍລົງ 15-20 %.
ແຕ່ປີ 2021 ຫາ 2025, ດ່ານສາກົນໜານຊາງ ໄດ້ຮອງຮັບການນຳເຂົ້າ ແລະ ສົ່ງອອກສິນຄ້າມູນຄ່າ 12.99 ຕື້ໂດລາ.
ເມື່ອເສັ້ນທາງຄົມມະນາຄົມຫຼັກເປີດກວ້າງພ້ອມທັງລວມເຂົ້າກັບການຂົນສົ່ງທາງລົດໄຟທົ່ວພື້ນທີ່, ເສັ້ນທາງດ່ວນ ແລະ ຂົວຂ້າມແມ່ນໍ້າຫຼາຍແຫ່ງ, ຈະເຮັດໃຫ້ເຂດນີ້ມີການໄຫຼວຽນຂອງປະຊາຊົນ ແລະ ສິນຄ້າຢ່າງຄ່ອງແຄ້ວ ແລະ ກະຕຸ້ນເສດຖະກິດຢ່າງມີປະສິດທິພາບ.
ຄຸນນະພາບການເປັນຢູ່ທົ່ວເຂດດັ່ງກ່າວໄດ້ຮັບການປັບປຸງໃຫ້ດີຂຶ້ນຢ່າງຕໍ່ເນື່ອງ, ຍ້ອນການກໍ່ສ້າງ ແລະ ການປັບປຸງດ້ານພື້ນຖານໂຄງລ່າງ ແລະ ການກໍ່ສ້າງພື້ນທີ່ທີ່ໄດ້ຕາມມາດຕະຖານເມືອງຟອງນ້ຳ, ສວນພຶກສາ ແລະ ທາງຍ່າງສີຂຽວຂອງຊຸມຊົນ ຊຶ່ງຊ່ວຍໃຫ້ຖະໜົນວັດທະນະທຳທ້ອງຖິ່ນ, ສະຖານທີ່ທຸລະກິດລະດັບສູງ, ໂຮງໝໍ ແລະ ຕະຫຼາດທ່ອງທ່ຽວຊົນນະບົດຈະເລີນຮຸ່ງເຮືອງ.
ຄໍາເຫັນ