ຮັບປະກັນໃຫ້ວຽກງານສື່ສານກອງທັບຮັບໃຊ້ການນຳ ແລະ ພາກລັດບໍລິຫານມີຜົນສຳເລັດຫຼາຍດ້ານ ( ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ )

ສະຫາຍ ພັນໂທ ອານົງສີ ແກ້ວຄໍາພັນ ຫົວໜ້າການເມືອງສູນສື່ສານກອງທັບຮັບໃຊ້ການນໍາ ແລະ ພາກລັດບໍລິຫານ ໄດ້ກ່າວວ່າ: ຕະຫຼອດໄລຍະ 75 ປີແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ພາຍໃຕ້ການນໍາພາຂອງພັກ ປະຊາຊົນ ປະຕິວັດລາວ ສາມາດນໍາພາເອົາໄຊຊະນະມາສູ່ປະເທດ ກາຍເປັນປະເທດ ສປປ ລາວ. ຍ້ອນມີການນໍາອັນສະຫຼາດສ່ອງໃສຂອງພັກ ປະຊາຊົນ ປະຕິວັດລາວ, ປະຊາຊົນລາວທຸກຖ້ວນໜ້າມີຄວາມຮົ່ມເຢັນຜາສຸກ ປະເທດຊາດໄດ້ຮັບການພັດທະນາ ແລະ ຮຸ່ງເຮືອງສີວິໄລ.
    ເພື່ອຮັບປະກັນໃຫ້ວຽກງານສື່ສານກອງທັບຮັບໃຊ້ການນຳ ແລະ ພາກລັດບໍລິຫານ ເນື່ອງໃນໂອກາດກະ ກຽມສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີທີ່ຈະມາເຖິງນີ້ໃຫ້ມີຜົນສໍາເລັດ ແລະ ມີປະສິດທິຜົນສູງ. ກົມກອງໄດ້ມີການຫ້າງຫາກະກຽມວຽກງານຮັບປະກັນຫຼາຍດ້ານເຊັ່ນ ໄດ້ສຸມໃສ່ຊີ້ນໍາບັນດາສຳນັກ ງານໃຫຍ່, ກອງພັນ, ກອງຮ້ອຍ ແລະ ບັນດາໝວດໝູ່ລົງພົວພັນພໍ່ແມ່ປະຊາຊົນ, ອຳນາດການປົກຄອງທ້ອງຖິ່ນ ໂຄສະນາໃຫ້ເຂົາເຈົ້າຮັບຮູ້ກ່ຽວກັບແລວຄອງສາຍໄຍແກ້ວໃຕ້ດິນ ທີ່ມີການຕິດພັນກັບເສັ້ນທາງ, ຕິດພັນກັບດິນສາທາ ລະນະ, ດິນສ່ວນບຸກຄົນເພື່ອຮັບປະກັນບໍ່ໃຫ້ມີການເປ່ເພເສຍຫາຍ, ຄະນະພັກ-ຄະນະບັນຊາຂອງພວກເຮົາໄດ້ເອົາໃຈໃສ່ລົງເຄື່ອນໄຫວເຮັດວຽກງານຢ່າງຮອບດ້ານນໍາກອງພັນນ້ອຍ, ກອງຮ້ອຍເພື່ອເກັບກຳເອົາບັນຫາຕ່າງໆ ເພື່ອມາປັບປຸງແກ້ໄຂໃຫ້ທັນກັບສະພາບການ, ຈັດຕັ້ງລະບົບປະຈຳການຢູ່ກອງພັນໃຫຍ່ ມີປະຈຳການບັນຊາ, ປະຈຳການມໍນິເຕີ, ປະຈຳການລົດບໍລິຫານ, ມີປະຈຳການກອງພັນ, ກອງຮ້ອຍ, ໝວດແຕ່ລະຈຸດມີ 2 ສະຫາຍ ເຮັດໜ້າທີ່ປະຈໍາການຢູ່ບັນດາຈຸດໃຫ້ບໍລິການ ຮັບປະກັນທາງດ້ານລະບົບສື່ສານໃຫ້ດໍາເນີນການຕະຫຼອດ 24 ຊົ່ວໂມງ, ປະຈໍາການແຕ່ລະພາກສ່ວນແມ່ນໄດ້ສະຫຼຸບສະພາບ ແລະ ປະຕິບັດການສ່ອງແສງລາຍງານໃຫ້ຂັ້ນເທິງຢ່າງເປັນປົກກະຕິໃນແຕ່ລະວັນ, ຈັດຕັ້ງກໍາລັງພ້ອມພາຫະນະລົດອາວຸດກະສຸນ, ອຸປະກອນເຕັກນິກ ແລະ ເຄື່ອງມືຮັບໃຊ້ຢູ່ບັນດາຈຸດທີ່ມີຄວາມສ່ຽງຕ່າງໆຈໍານວນ 34 ຈຸດໃນຂອບເຂດທົ່ວປະເທດ ເພື່ອຮັບປະກັນວຽກງານກຽມພ້ອມສູ້ຮົບ ແລະ ສ້ອມແປງແກ້ໄຂສາຍໄຍແກ້ວຂາດ, ຕິດຕາມການຂະຫຍາຍທາງ, ການສ້ອມແປງທາງ, ການຂະ ຫຍາຍທໍ່ນໍ້າປະປາ, ການຂະຫຍາຍລະບົບໄຟຟ້າ ແລະ ອື່ນໆໃນໄລຍະຜ່ານມາກໍຄືປັດຈຸບັນ, ກົມກອງຂອງພວກເຮົາໄດ້ມອບໝາຍຈັດແບ່ງຄວາມຮັບຜິດຊອບໃຫ້ແຕ່ລະພາກສ່ວນ ຕາມພາລະບົດບາດໃຫ້ຖືກຕ້ອງສອດຄ່ອງ ແລະ ຈັດຕັ້ງປະຕິບັດໜ້າທີ່ການເມືອງຂອງຕົນຢ່າງຫ້າວຫັນ ເພາະກົມກອງຂອງພວກເຮົາແມ່ນທຽບເທົ່າກອງພັນໃຫຍ່ມີ 4 ກອງພັນນ້ອຍ ຂຶ້ນກັບສູນກາງໃຫຍ່ແມ່ນຕັ້ງຢູ່ໂພນເຄັງເປັນມະຫາພາກຊີ້ນໍາລວມຄື: 1 ກອງພັນນະຄອນຫຼວງ, 2 ພາກເໜືອ, 3 ພາກກາງ ແລະ ກອງພັນພາກໃຕ້ຮັບຜິດຊອບວຽກງານຮັບປະກັນການໃຫ້ບໍລິການວຽກງານສື່ສານ ປກຊ-ປກສ ແລະ ພາກລັດບໍລິຫານດ້ວຍຄວາມໂປ່ງໃສ, ວ່ອງໄວ ແລະ ປອດໄພ, ກົມກອງຂອງພວກເຮົາແມ່ນມີບັນດາສູນສະຖານີໃຫ້ບໍລິການຢູ່ກະແຈກກະຈາຍໃນທົ່ວປະເທດ. ສະນັ້ນມັນເປັນໜ້າທີ່ອັນທ້າທາຍໃຫ້ພວກເຮົາໃນການຈັດຕັ້ງປະຕິບັດໜ້າທີ່ວຽກງານ, ແຕ່ເຫັນວ່າການປະຕິບັດໜ້າທີ່ທາງດ້ານການເມືອງ-ແນວຄິດ, ດ້ານການຈັດຕັ້ງ ດ້ານວຽກງານວິຊາສະເພາະ, ວຽກງານຮັບປະກັນ ແລະ ວຽກງານປ້ອງກັນ-ກວດກາ, ກໍຄືວຽກງານຮັບປະກັນສື່ສານ ປກຊ-ປກສ ໂດຍປະຕິບັດຕາມ 4 ໜ້າທີ່ໃຫຍ່ 26 ແຜນງານຂອງກະຊວງປ້ອງກັນປະເທດວາງອອກ. ໄລຍະຜ່ານມາເຫັນວ່າປະຕິບັດໄດ້ດີມີຜົນສໍາເລັດຕາມແຜນການທີ່ວາງໄວ້.
    

    ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ, ສະຫາຍ ພັນໂທ ອານົງສີ ແກ້ວຄໍາພັນ ຕາງໜ້າຄະນະພັກ-ຄະນະບັນຊາ, ພະນັກງານ-ນັກຮົບທົ່ວສູນສື່ສານກອງທັບຮັບໃຊ້ການນຳ ແລະ ພາກລັດບໍລິຫານ ໄດ້ອວຍພອນໄຊອັນປະເສີດມາຍັງບັນດາການນໍາພັກ-ລັດ, ການນໍາກະຊວງປ້ອງກັນປະ ເທດຈົ່ງມີສຸຂະພາບເຂັ້ມແຂງ ມີຜົນສໍາເລັດໃນໜ້າທີ່ອັນສູງສົ່ງຂອງທ່ານ, ອວຍພອນມາຍັງຖັນແຖວພະນັກງານ-ນັກຮົບທົ່ວກອງທັບປະຊາຊົນລາວ ຈົ່ງມີຄວາມຜາສຸກ ມີສຸຂະພາບເຂັ້ມແຂງ ສືບຕໍ່ປະຕິບັດໜ້າທີ່ການເມືອງຂອງຕົນ ດ້ວຍຜົນສໍາເລັດອັນຈົບງາມ.