ຫັດຖະກໍາຕໍ່າຫູກທໍໄໝບ້ານທ່າຊ້າງເປັນທີ່ນິຍົມຂອງແມ່ຍິງລາວ

ໂດຍ: ແສງຈັນ
    ແມ່ຍິງລາວ ມີມູນເຊື້ອດຸໝັ່ນໃນການອອກແຮງງານ ເພີ່ມພູນຜະລິດຜົນ ໂດຍຖືເອົາວຽກງານຫັດຖະກໍາຕໍ່າຫູກທໍໄໝ ເພື່ອສ້າງລາຍຮັບເຂົ້າໃນຄອບຄົວ ເວົ້າລວມ, ເວົ້າສະເພາະ ແມ່ນ ທ່ານນາງ ຄໍາໄບ ໄຊຍະສານ ຢູ່ບ້ານທ່າຊ້າງ ເມືອງປາກງື່ມນະຄອນຫຼວງ ໄດ້ໃຫ້ສໍາພາດ ໃນງານຕະຫຼາດນັດສະເຫຼີມສະຫຼອງວັນສ້າງຕັ້ງແຂວງບໍລິຄໍາໄຊ ຄົບຮອບ 40ປີ ທີ່ແຂວງບໍລິຄໍາໄຊ ວ່າ: ດີໃຈຫຼາຍທີ່ໄດ້ນໍາເອົາຜະລິດຕະພັນສິ້ນໄໝ ມາວາງຂາຍ ຊຶ່ງເປັນການສະແດງເຖິງສີມືຂອງນາຍຊ່າງຫັດຖະກໍາທີ່ເປັນເພດຍິງ, ຫັດຖະກໍາຂອງບ້ານທ່າຊ້າງກໍເປັນທີ່ນິຍົມຂອງແມ່ຍິງລາວທຸກເຜົ່າ.
    ທ່ານນາງ ຄໍາໄບ ໄຊຍະສານ ກ່າວຕື່ມວ່າ: ຖືເອົາວຽກງານຕໍ່າຫູກ-ທໍໄໝມາແຕ່ປີ 2007 ຊຶ່ງເລີ່ມຈາກການຕໍ່າພຽງ 1-2ກີ່ ແລະ ຂະຫຍາຍກວ້າງອອກ ມີຈໍານວນສະມາຊິກຕໍ່າສິ້ນ100 –200ກີ່.  ແຕ່ປັດຈຸບັນ ຈໍານວນແຮງງານ ແລະ ກີ່ ໄດ້ຫຼຸດລົງ ສາເຫດມາຈາກ ຈໍານວນນາຍຊ່າງທີ່ມີສີມື ແມ່ນໄປເຮັດສວນປູກມັນຕົ້ນ ການຜະລິດຈຶ່ງຫຼຸດລົງ  ແຕ່ເຖິງແນວໃດກໍຕາມ ດ້ວຍຄວາມມັກຮັກໃນອາຊີບດັ່ງກ່າວ ຫັດຖະກໍາຂອງບ້ານທ່າຊ້າງກໍຍັງມີຜະລິດຕະພັນທີ່ຫຼາກຫຼາຍນໍາມາສູ່ສາຍຕາຂອງເອື້ອຍ,ນ້ອງ,ລູກ,ຫຼານ ແມ່ຍິງພາຍໃນເມືອງ ກໍຄື ແຂວງທີ່ຢູ່ໃກ້ຄຽງ ດ້ວຍການຂາຍ 1 ຜືນ ຖືກສຸດ ແມ່ນ 150.000ກີບ– 1.200.000ກີບ, ລາຄາຂາຍ ໃນເມື່ອກ່ອນ 1ຜືນ 1ແສນກີບ  ປັບຂຶ້ນລາຄາເປັນ 180.000 ກີບ, ຈາກລາຄາ 150.000 ກີບ  ປັບຂຶ້ນເປັນ 350.000ກີບ ສາເຫດປັບຂຶ້ນລາຄາ ມາຈາກ (ເງິນກີບອ່ອນຄ່າ, ວັດຖຸດິບລາຄາສູງເທົ່າຕົວ), ສ່ວນລາຍຮັບທີ່ເປັນຜົນກໍາໄລ ປີໜຶ່ງ ປະມານ  60ລ້ານກີບ, ລາຍຮັບດັ່ງກ່າວ ແມ່ນນໍາໃຊ້ເຂົ້າໃນຄອບຄົວ ແລະ ເປັນທຶນໝູນວຽນເຂົ້າໃນວຽກງານຕໍ່າຫູກ-ທໍໄໝ.  ຄຽງຄູ່ກັບວຽກງານດັ່ງກ່າວ, ພາຍໃນຄອບຄົວ ຍັງໄດ້ຊອກຊ່ອງທາງສໍາຮອງ ດ້ວຍການເຮັດກະສິກໍາປູກພືດປອດສານເຄມີ ໃນເນື້ອທີ່  2ເຮັກຕາ ເພື່ອບໍລິໂພກພາຍໃນຄອບຄົວ ແລະ ສົ່ງອອກຂາຍໃຫ້ກັບສັງຄົມໄດ້ບໍລິໂພກ ທັງເປັນການສ້າງລາຍຮັບທົດແທນ ຈາກການຖົດຖອຍຂອງນາຍຊ່າງຫັດຖະກໍາຫຼຸດລົງ.
    ເນື່ອງໃນໂອກາດໃກ້ຈະເຖິງວັນແມ່ຍິງສາກົນ 8/3, ຂໍອວຍພອນແດ່ ແມ່ຍິງໃນທົ່ວໂລກ ກໍຄື ແມ່ຍິງລາວບັນດາເຜົ່າ ຈົ່ງສຸຂະພາບແຂງແຮງ ປາສະຈາກໂຣກໄພໄຂ້ເຈັບທັງປວງ ແລະ ຈົ່ງຮ່ວມແຮງ ຮ່ວມໃຈກັນອະນຸລັກປົກປັກຮັກສາ ແລະ ເສີມຂະຫຍາຍມູນເຊື້ອທີ່ເປັນເອກະລັກຂອງແມ່ຍິງລາວ(ສິ້ນທີ່ຕໍ່າດ້ວຍມື) ໄວ້ໃຫ້ກາລະນານ.