 |
ທ່ານ ນາງ ວັນມີນາ ຄັນທະວົງ ເຈົ້າຂອງຮ້ານຫັດຖະກໍາວັນມີນາ ເມືອງຫາດຊາຍຟອງ ນະຄອນຫຼວງວຽງຈັນ (ນວ) ໄດ້ໃຫ້ສໍາດພາດຕໍ່ນັກຂ່າວໜັງສືພິມປະຊາຊົນ ເມື່ອບໍ່ດົນຜ່ານມານີ້ ທີ່ເດີ່ນພະທາດຫຼວງວຽງຈັນວ່າ: ຕົນເອງຮູ້ສຶກດີໃຈ ແລະ ພາກພູມໃຈທີ່ໄດ້ມີໂອກາດນໍາເອົາສິນຄ້າຫັດຖະກໍາລາວມາວາງສະແດງ-ຂາຍໃນງານບຸນ ແຫ່ງນີ້ໃນທຸກໆປີ. ປີນີ້, ແມ່ນເລີ່ມນໍາມາວາງສະແດງ-ຂາຍແຕ່ວັນທີ 1-5 ພະຈິກ 2025.ສິນຄ້າທີ່ນໍາມາສະແດງ-ຂາຍໃນປີນີ້ ປະກອບມີ: ຂັນເງິນ, ຂັນທອງເຫຼືອງ, ຊຸດໝາກ, ຊຸດພູ, ຂັນນໍ້າຍາດ, ຕິບເຂົ້າ. ໃນນັ້ນ,ຍັງມີເຄື່ອງປະດັບຕ່າງໆ ເຊັ່ນ: ສາຍແອວເງິນ, ສາຍແອວລຽນອາເມລິກາ, ສາຍແອວທອງນາກປະສົມ, ສາຍແຂນ, ສາຍຄໍ, ຕຸມຫູເງິນ ແລະ ອື່ນໆ. ຂາຍໃນລາຄາບໍ່ແພງ ລູກຄ້າ ກໍຄືຄົນທົ່ວໄປສາມາດຊື້ ແລະ ຈັບຕ້ອງໄດ້, ຄາລາເລີ່ມຕົ້ນພຽງ 170,000 ກີບ ຂຶ້ນໄປ.
 |
ຈຸດພິເສດຂອງຮ້ານຫັດຖະກໍາວັນມີນາ ຈະເນັ້ນລວດລາຍທີ່ເປັນເອກະລັກວັດທະນະທໍາລາວ, ລາຍບູຮານຕ່າງໆ ທີ່ສວຍສົດງົດງາມ ແລະ ປານີດທີ່ສຸດ. ເຫັນໄດ້ວ່າຜູ້ມາທ່ຽວໃນງານບຸນໃຫ້ຄວາມສົນໃຈເປັນຢ່າງດີ ບາງຄົນກໍຊື້ໄປໃຊ້, ໄປເປັນຂອງທີ່ລະນຶກຂອງຝາກຂອງຕ້ອນ ແລະ ອື່ນໆ. ສະນັ້ນ, ທ່ານໃດທີ່ມີຄວາມສົນໃຈສິນຄ້າຫັດຖະກໍາລາວ ສາມາດເຂົ້າມາແວ່ເບິ່ງທີ່ຮ້ານໄດ້ຢູ່ເຂດຫ້ອງຂາຍC. ພິເສດໄລຍະວາງຂາຍຢູ່ງານບຸນປີນີ້, ໄດ້ມີການຂາຍຫຼຸດລາຄາຈາກປົກກະຕິ 30% ຂອງສິນຄ້າ ຫຼື ຖ້າຫາກທ່ານສົນໃຈສິນຄ້າຫັດຖະກໍາວັນມີນາ ຍັງສາມາດຫາເບິ່ງ ແລະ ຊື້ໄດ້ ທີ່ສູນການຄ້າລາວ-ໄອເຕັກຕຶກໃໝ່ຊັ້ນ 2.
ທ່ານ ນາງ ວັນມີນາ ຄັນທະວົງ ຍັງໃຫ້ຮູ້ຕື່ມວ່າ: ຕົນເອງໄດ້ເລີ່ມຂາຍເຄື່ອງຫັດຖະກໍາເປັນເວລາ 7 ປີແລ້ວ ແລະ ໄດ້ຮັບການຢັ້ງຢືນເປັນສິນຄ້າໂອດັອບ 5 ປີແລ້ວ, ຜ່ານມາຂາຍເຄື່ອງປະດັບພຽງເລັກໜ້ອຍ ເມື່ອເຫັນວ່າເຄື່ອງຫັດຖະກໍາລາວກໍນັບມື້ໃຫ້ການຕ້ອນຮັບ, ມີຄວາມສົນໃຈຈາກຄົນລາວ ແລະ ຊາວຕ່າງປະເທດ ຫຼາຍຂຶ້ນ ຈຶ່ງໄດ້ຂະຫຍາຍຮ້ານອອກໃຫ້ໃຫຍ່ກວ່າເກົ່າ ແລະ ໄດ້ເພີ່ມສິນຄ້າຫັດຖະກໍາໃຫ້ມີຄວາມຫຼາກຫຼາຍຂຶ້ນ. ປັດຈຸບັນມີຊ່າງຫັດຖະກໍາໂດຍແມ່ນອ້າຍເອື້ອຍນ້ອງທັງໝົດ 7 ຄົນ. ໃນປີຕໍ່ໆໄປ ກໍຈະນໍາເອົາສິນຄ້າຫັດຖະກໍາມາວາງສະແດງ-ຂາຍຢູ່ໃນງານບຸນແຫ່ງນີ້.
 |
ຄໍາເຫັນ