ໂດຍການເປັນປະທານຂອງທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ(ສພຊ) ຊຶ່ງມີບັນດາທ່ານປະທານ ແລະ ຮອງປະທານກໍາມາທິການທີ່ກ່ຽວຂ້ອງຂອງສພຊ, ຮອງຫົວໜ້າອົງການໄອຍະການປະຊາຊົນສູງສຸດ,ຮອງປະທານສານປະຊາຊົນສູງສຸດ,ຮອງລັດຖະມົນຕີກະຊວງຍຸຕິທໍາ,ຮອງຫົວໜ້າຫ້ອງວ່າການສໍານັກງານປະທານປະເທດ,ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີພ້ອມດ້ວຍຄະນະກົມ,ຄະນະພະແນກ ແລະ ພະນັກງານຈາກສພຊ ແລະ ພາກສ່ວນທີ່ກ່ຽວຂ້ອງເຂົ້າຮ່ວມທັງນີ້, ກໍເພື່ອນຳເອົາຄຳເຫັນຂອງສະມາຊິກສະພາແຫ່ງຊາດ (ສສຊ)ທີ່ໄດ້ປະກອບໃສ່ຮ່າງກົດໝາຍສອງສະບັບນີ້ ມາພິຈາລະນາ, ປັບປຸງໃສ່ເນື້ອໃນສອງຮ່າງກົດໝາຍ ໃຫ້ມີຄວາມຈະແຈ້ງ, ຄົບຖ້ວນ ແລະຮັດກຸມ.
ທ່ານ ຈະເລີນ ເຢຍປາວເຮີ ກ່າວວ່າ: ກອງປະຊຸມຄັ້ງນີ້ ຈະໄດ້ພິຈາລະນາຄືນບັນດາຄໍາເຫັນຂອງສະມາຊິກສະພາແຫ່ງຊາດ ທີ່ຄະນະຮັບຜິດຊອບເຫັນດີ ຫຼື ບໍ່ປັບປຸງຕາມການສະເໜີ ແລະ ບັນຫາອື່ນທີ່ສະມາຊິກສະພາແຫ່ງຊາດບໍ່ໄດ້ຍົກຂຶ້ນ; ແຕ່ຫາກຍັງເຫັນວ່າເນື້ອໃນໃດຍັງບໍ່ສອດຄ່ອງ, ບໍ່ຄົບຖ້ວນ ຫຼື ການຂຽນຍັງບໍ່ຖືກຕ້ອງ ກໍຈະໄດ້ປັບປຸງ ແລະ ຮຽບຮຽງຄືນ ເພື່ອຮັບປະກັນໃຫ້ເນື້ອໃນກົດໝາຍມີຄວາມຈະແຈ້ງ, ຮັດກຸມ ແລະ ສາມາດຈັດຕັ້ງປະຕິບັດໄດ້ ແລ້ວລາຍງານຕໍ່ກອງປະຊຸມຄະນະປະຈຳສະພາແຫ່ງຊາດ ເພື່ອນຳສະເໜີທ່ານປະທານສະພາແຫ່ງຊາດພິຈາລະນາລົງລາຍເຊັນໃນກົດໝາຍ2ສະບັບດັ່ງກ່າວ.
ຜູ້ເຂົ້າຮ່ວມໄດ້ສຸມສະຕິປັນຍາຄົ້ນຄວ້າ,ສົນທະນາແລກປ່ຽນ ແຕ່ລະບັນຫາທີ່ ສສຊ ຕັ້ງຂຶ້ນ ແລະ ບັນຫາອື່ນໆ ຢ່າງເລິກເຊິ່ງ ແລະ ຮອບດ້ານ.
ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກມູນນິທິເອເຊຍ (The AsiaFoundation)ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອໃຫ້ແກ່ສະພາແຫ່ງຊາດ.
(ຂ່າວ-ພາບ: ນາງ ອານິຕາ ມ່ວນສະຫວັດ)
ຄໍາເຫັນ