ທ່ານ ຫງວຽນ ມິງເຕິມ ໄດ້ກ່າວປາໄສວ່າ: ການປົດປ່ອຍພາກໃຕ້ຫວຽດນາມໄດ້ທ້ອນໂຮມປະເທດຊາດເປັນເອກະພາບ ແລະ ຂີດໝາຍອັນສະຫງ່າລາສີທີ່ສຸດໃນປະຫວັດສາດແຫ່ງການສ້າງສາ ແລະ ປົກປັກຮັກສາປະເທດຊາດ, ເປັນຂີດໝາຍການຕໍ່ສູ້ອົງອາດກ້າແກ່ນ, ພິລະອາດຫານທັງເປັນການຢຸດຕິແອກປົກຄອງເປັນເວລາກວ່າເຄິ່ງສະຕະວັດ ຂອງລັດທິລ່າເມືອງຂຶ້ນແບບເກົ່າ ແລະ ແບບໃໝ່. ພ້ອມນີ້, ທ່ານ ຫງວຽນ ມິງເຕິມ ຍັງສະແດງຄວາມຮູ້ບຸນຄຸນ, ຄຸນ ງາມຄວາມດີອັນໃຫຍ່ຫຼວງຂອງປະທານ ໂຮ່ຈິມິນ ແລະ ຮູ້ບຸນຄຸນຕໍ່ບັນດາການນຳປະຕິວັດຮຸ່ນກ່ອນ, ບັນດານັກຮົບວິລະຊົນທີ່ເສຍສະຫຼະຊີວິດເພື່ອຊາດ, ຫວຽດນາມແມ່ນນັກວິລະຊົນກຳລັງປະກອບອາວຸດ, ບັນດາທະຫານເປັນຜູ້ມີຄຸນງາມ ຄວາມດີຕໍ່ການປະຕິວັດ ກໍຄືຊາວຫວຽດນາມທີ່ໄດ້ອຸທິດເສຍສະຫຼະຊີວິດເພື່ອພາລະກິດປົດປ່ອຍພາກໃຕ້ຫວຽດນາມຢ່າງສົມບູນ, ທ້ອນໂຮມປະເທດຊາດເປັນເອກະລາດ.
ທ່ານ ຫງວຽນ ມິງເຕິມ ຢືນຢັນວ່າ: “ວັນເດືອນປີຈະຜ່ານພົ້ນໄປ ແຕ່ໄຊຊະນະຂອງປະຊາຊົນຫວຽດນາມໄດ້ບັນທຶກເຂົ້າໃນປະຫວັດສາດຂອງຊາດຫວຽດນາມຕະຫຼອດໄປ, ເປັນສັນຍາລັກອັນໃສແຈ້ງຂອງລັດທິວິລະຊົນປະຕິວັດ, ແມ່ນໄຊຊະນະອັນຊອບທຳ, ນ້ຳໃຈຮັກຊາດອັນເຕັມປ່ຽມ, ຄວາມຄາດຫວັງມີເອກກະລາດ, ເສລີພາບ ແລະ ທ້ອນໂຮມປະເທດຊາດເປັນເອກະພາບດ້ວຍສັດຈະທຳ, ປະເທດຫວຽດນາມ ແມ່ນໜຶ່ງຊາດທີ່ເປັນຂີດໝາຍຢັ້ງຢືນວ່າທົ່ວພັກ, ທົ່ວປວງຊົນ, ທົ່ວກອງທັບຫວຽດນາມ ໄດ້ປະຕິບັດຄວາມປາຖະໜາ ແລະ ຄຳບອກເຕືອນອັນຈິງໃຈທີ່ສຸດຂອງປະທານໂຮ່ຈິມິນ ທີ່ສັ່ງໄວ້ວ່າ: ປະຕິບັດພາລະກິດປົດປ່ອຍພາກໃຕ້ຫວຽດນາມຢ່າງສົມບູນ, ທ້ອນໂຮມປະເທດຊາດພາກໃຕ້-ພາກ ເໜືອເປັນຄອບຄົວໜຶ່ງ. ພາຍຫຼັງທ້ອນໂຮມປະເທດຊາດເປັນເອກະພາບ ເປັນເວລາ 50 ປີ ແລະ ເກືອບ 40 ປີແຫ່ງການປະຕິບັດພາລະກິດປ່ຽນແປງໃໝ່, ປະເທດຫວຽດນາມໄດ້ຜ່ານຜ່າຄວາມຫຍຸ້ງຍາກ, ສິ່ງທົດສອບນາໆປະການ, ສ້າງບັນດາຜົນງານທີ່ຍິ່ງໃຫຍ່ມີຄວາມໝາຍປະຫວັດສາດ, ສ້າງສາພາລະກິດອັນໃຫຍ່ຫຼວງ, ກຳລັງບົ່ມຊ້ອນ, ທີ່ຕັ້ງ ແລະ ອິດທິພົນທີ່ມີຊື່ສຽງ, ຄວາມເອກອ້າງທະນົງໃຈດ້ວຍຄວາມຮູ້ບຸນຄຸນຢ່າງລົ້ນເຫຼືອ ຕໍ່ບັນດາການເສຍສະຫຼະຊີວິດຂອງນັກຮົບ, ຂອງປະຊາຊົນໃນທົ່ວປະເທດໄດ້ເປັນກຳລັງແຮງອັນຍິ່ງໃຫຍ່, ຫວຽດນາມໄດ້ມີການເຊື່ອມຊຶມ ແລະ ປະຕິບັດທັດສະນະປະຊາຊົນເປັນກົກ, ເປັນເປົ້າໝາຍພາລະກິດແຫ່ງການສ້າງສາພັດທະນາ ແລະ ປົກປັກຮັກສາປະເທດຊາດຢ່າງສະເໝີຕົ້ນສະເໝີປາຍ; ຜັນຂະຫຍາຍນະໂຍບາຍຢ່າງກົມກຽວ, ປອງດອງຊາດຢ່າງເຂັ້ມແຂງດ້ວຍຈິດໃຈ, ສາຍ ເລືອດລູກຫຼານຫວຽດນາມ ລ້ວນແຕ່ແມ່ນອ້າຍນ້ອງໃນຄອບຄົວດຽວກັນ. ຊາດຫວຽດນາມແມ່ນຊົນຊາດທີ່ຜ່ານຜ່າຄວາມເຈັບປວດ ແລະ ຄວາມເສຍຫາຍນາໆປະການຂອງສົງຄາມໃນອະດີດ, ແມ່ນຊົນຊາດທີ່ໄດ້ຮັບຜົນອັນຍິ່ງໃຫຍ່ ຈາກສັນຕິພາບ, ການຮ່ວມມືມິດຕະພາບໃນຊຸມທົດສະວັດທີ່ຜ່ານມາ. ຫວຽດນາມມີຄວາມປາຖະໜາກັບປະຊາຄົມສາກົນສ້າງອະນາຄົດແຫ່ງສັນຕິພາບ, ວັດທະນາຖາວອນ ແລະ ສືບຕໍ່ເຮັດໃຫ້ການພົວພັນມິດຕະພາບ ແລະ ການຮ່ວມມືກັບບັນດາປະເທດໃນໂລກເລິກເຊິ່ງ, ຍູ້ແຮງການປະຕິບັດທິດນຳທີ່ວ່າ: “ຫວຽດນາມແມ່ນເພື່ອນມິດ, ແມ່ນຄູ່ຮ່ວມມືທີ່ມີຄວາມໄວ້ເນື້ອເຊື່ອໃຈ ແລະ ເປັນສະມາຊິກທີ່ຕັ້ງໜ້າ, ມີຄວາມຮັບຜິດຊອບຕໍ່ປະຊາຄົມສາກົນ, ປ່ຽນແປງໃໝ່, ກົນໄກ, ນະໂຍບາຍ, ສ້າງທຸກເງື່ອນໄຂສະດວກເພື່ອໃຫ້ເພື່ອນມິດສາກົນ ແລະ ປະຊາຄົມຊາວຫວຽດນາມອາໄສຢູ່ຕ່າງປະເທດ, ຜູ້ທີ່ຖືວັດທະນະທຳຫວຽດນາມໃນຕົວ, ເຕີບໃຫຍ່ຢູ່ບັນດາປະເທດພັດທະນາ, ມີຄວາມຮູ້ຄວາມເຂົ້າໃຈກ່ຽວກັບວິຊາການ ແລະ ການຄຸ້ມຄອງ, ມີການເຊື່ອມໂຍງກັບສາກົນຢ່າງເລິກເຊິ່ງ ໄດ້ເຂົ້າຮ່ວມບັນດາການເຄື່ອນໄຫວຊຸກຍູ້ການພັດທະນາເສດຖະກິດ-ສັງຄົມຢູ່ຫວຽດນາມ.
ທ່ານ ທອງລອຍ ສີລິວົງ ໄດ້ກ່າວວ່າ: ກອງທັບປະຊາຊົນລາວ ແລະ ກອງທັບປະຊາຊົນຫວຽດນາມອ້າຍນ້ອງ ໃນໄລຍະແຫ່ງການຕໍ່ສູ້ທີ່ດຸເດືອດຂ້ຽວຂາດ ແລະ ທໍລະຫົດທີ່ສຸດ, ແຕ່ດ້ວຍມານະຈິດປະຕິວັດ, ຄວາມພິລະອາດຫານ ແລະ ຄວາມເສຍສະຫຼະອັນສູງສົ່ງຂອງພະນັກງານ-ນັກຮົບອາສາສະໝັກຫວຽດນາມກັບພະນັກງານ-ນັກຮົບກອງທັບປົດປ່ອຍປະຊາຊົນລາວ ແລະ ປະຊາຊົນລາວບັນດາເຜົ່າ ໄດ້ຄຽງບ່າຄຽງໄຫຼ່ດໍາເນີນການຕໍ່ສູ້ຢ່າງເດັດດ່ຽວໜຽວແໜ້ນບົນຈິດໃຈຮ່ວມທຸກ-ຮ່ວມສຸກ, ຮ່ວມເປັນ-ຮ່ວມຕາຍນໍາກັນ, ໄດ້ເປີດບັ້ນຮົບທັງນ້ອຍ ແລະ ໃຫຍ່ບໍ່ຈັກວ່າເທົ່າໃດເທື່ອເພື່ອທັບມ້າງກົນອຸບາຍ ແລະ ຍຸດທະສາດຂອງພວກຈັກກະພັດ ແລະ ລູກແຫຼ່ງຕີນມື. ໃນນັ້ນ, ມີຫຼາຍສະໜາມຮົບສະພາບການແມ່ນຫຼໍ່ແຫຼມ, ຂັບຂັນ ແລະ ອັດຕະຂັດທີ່ສຸດ, ແຕ່ດ້ວຍມານະຈິດ ແລະ ອຸດົມການປະຕິວັດອັນສູງສົ່ງ, ຄວາມເດັດດ່ຽວໜຽວແໜ້ນດ້ວຍພະລັງອັນແຮງກ້າຂອງຄວາມສາມັກຄີຮ່ວມສໍາພັນສູ້ຮົບຢ່າງແໜ້ນແຟ້ນນັ້ນ, ການປະຕິວັດຂອງສອງປະ ເທດ ກໍສາມາດຜ່ານຜ່າອຸປະສັກ, ສິ່ງທ້າທາຍທົດສອບ ແລະ ຍາດເອົາໄຊຊະນະໄດ້ຈາກບັ້ນຮົບນີ້ໄປສູ່ບັ້ນຮົບໃໝ່ຢ່າງເນື່ອງນິດລຽນຕິດຈົນສ້າງວິລະກຳອັນຍິ່ງໃຫຍ່ຂຶ້ນດ້ວຍບັ້ນຮົບ “ໂຮ່ຈິມິນ” ອັນເປັນປະຫວັດການໃນລະດູບານໃໝ່ ສາ ມາດປົດປ່ອຍພາກໃຕ້ຫວຽດນາມ ແລະ ທ້ອນໂຮມປະເທດຫວຽດນາມເປັນອັນໜຶ່ງອັນດຽວກັນ. ພັກ-ລັດ, ກອງທັບ ແລະ ປະຊາຊົນລາວໄດ້ຈົດຈໍາລໍ້າລຶກຢູ່ສະເໝີ ແລະ ຮັບຮູ້ຢ່າງເລິກເຊິ່ງວ່າ: ທຸກໄຊຊະນະໃນພາລະກິດປະຕິວັດເພື່ອປົດປ່ອຍຊາດລາວໃນເມື່ອກ່ອນ ກໍຄືພາລະກິດປົກປັກຮັກສາ ແລະ ສ້າງສາປະເທດຊາດໃນປັດຈຸບັນ ລ້ວນແຕ່ຕິດພັນກັບຄວາມສາມັກຄີ ແລະ ການຊ່ວຍເຫຼືອລໍ້າຄ່າຂອງພັກ-ລັດ, ຂອງກອງທັບ ແລະ ປະຊາຊົນຫວຽດນາມອ້າຍນ້ອງ. ພວກເຮົາຍິ່ງຈົດຈໍາລໍ້າລຶກ, ຮູ້ບຸນຄຸນຢ່າງເລິກເຊິ່ງປະທານໂຮ່ຈິມິນຜູ້ຍິ່ງໃຫຍ່, ປະທານ ໄກສອນ ພົມວິຫານ ທີ່ແສນເຄົາລົບຮັກ ເປັນຜູ້ກໍ່ຕັ້ງສ້າງສາຍສໍາພັນຮ່ວມມືແບບພິເສດ, ກໍ່ສ້າງຮາກຖານ ແລະ ເປັນແວ່ນແຍງໃສແຈ້ງ ຊຶ່ງໄດ້ຮັບການເພີ່ມພູນຄູນສ້າງຈາກຮຸ່ນການນໍາປະຕິວັດຂອງສອງພັກ, ສອງລັດ, ສອງກອງທັບ ແລະ ປະຊາຊົນສອງຊາດ ໄດ້ກາຍເປັນມໍລະດົກອັນລໍ້າຄ່າໃຫ້ແກ່ສອງຊາດລາວ-ຫວຽດນາມ, ຫວຽດນາມ-ລາວຕະຫຼອດມາ.
ຂ່າວ-ພາບ: ບຸນອູ້ມ
ຄໍາເຫັນ