 |
ໃນພິທີ, ທ່ານ ສັນຕິສຸກ ສິມມາລາວົງ ກ່າວວ່າ: ມື້ນີ້, ພວກເຮົາມີຄວາມປິຕິຊົມເຊີຍເປັນຢ່າງຍິ່ງທີ່ໄດ້ພ້ອມກັນຈັດພິທີໂຮມຊຸມນຸມສະເຫຼີມສະຫຼອງ “ວັນດີຈີຕອນແຫ່ງຊາດ” ວັນທີ10 ມັງກອນ, ພາຍໃຕ້ຄຳຂວັນ: “ພັດທະນາໂຄງລ່າງພື້ນຖານດີຈີຕອນ ແລະ ສ້າງແຮງງານດີຈີຕອນຂອງ ສປປ ລາວ ໃຫ້ເຂັ້ມແຂງ ແລະ ຢືນຍົງ”. ປີ 2026 ຍັງຖືເປັນປີເລີ່ມຕົ້ນຂອງແຜນພັດທະນາ 5 ປີ ຄັ້ງທີ IV (2026-2030) ຂອງຂະແໜງການເຕັກໂນໂລຊີ ແລະ ການສື່ສານ. ນີ້ຄືຈຸດເລີ່ມຕົ້ນຂອງຍຸກສະໄໝໃໝ່ທີ່ຈະນຳພາປະເທດຂອງເຮົາກ້າວໄປສູ່ການເປັນ “ລັດຖະບານດີຈີຕອນ, ເສດຖະກິດດີຈີຕອນ ແລະ ສັງຄົມດີຈີຕອນ” ຢ່າງເຕັມຮູບແບບ. ພວກເຮົາຈະຫັນເອົານະວັດຕະກຳ ແລະ ເຕັກໂນໂລຊີອັດສະລິຍະມາເປັນກຳລັງການຜະລິດໃໝ່ເພື່ອຍົກສູງບົດບາດຂອງຊາດລາວໃນເວທີພາກພື້ນ ແລະ ສາກົນໃຫ້ນັບມື້ນັບພົ້ນເດັ່ນຂຶ້ນ.
ພາຍໃຕ້ແນວທາງປ່ຽນແປງໃໝ່ຮອບດ້ານ ແລະ ມີຫຼັກການຂອງພັກ, ການຫັນເປັນດີຈີຕອນໄດ້ກາຍເປັນ“ພາລະກິດປະຕິວັດ” ທີ່ສຳຄັນຍິ່ງໃນໄລຍະໃໝ່. ພັກເຮົາໄດ້ກຳນົດຢ່າງຊັດເຈນວ່າວິທະຍາສາດ ແລະ ເຕັກໂນໂລຊີແມ່ນກຳລັງຂັບເຄື່ອນຕົ້ນຕໍເພື່ອຫັນເປັນອຸດສາຫະກຳ ແລະ ທັນສະໄໝ. ການຫັນເປັນດີຈີຕອນບໍ່ແມ່ນພຽງແຕ່ເລື່ອງຂອງຂະແໜງການເຕັກນິກເທົ່ານັ້ນ, ແຕ່ແມ່ນ “ພາລະກິດບຸກທະລຸ” ທີ່ຈະຊ່ວຍຍູ້ແຮງການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່.
ພັກເຮົາໄດ້ຊີ້ໃຫ້ເຫັນວ່າ: ເພື່ອເອົາຊະນະຄວາມຫຍຸ້ງຍາກດ້ານເສດຖະກິດ-ການເງິນ, ພວກເຮົາຕ້ອງຫັນປ່ຽນຈາກການພັດທະນາແບບກວ້າງຂວາງໄປສູ່ການພັດທະນາແບບຄຸນນະພາບໂດຍນຳໃຊ້ວິທະຍາສາດ-ເຕັກໂນໂລຊີເປັນກຳລັງການຜະລິດທີ່ທັນສະໄໝ. ການປະຕິວັດ AI, ການພັດທະນາຮຸ່ນຍົນ (Robotics), ພາຫະນະບໍ່ມີຄົນຂັບ (Autonomous Vehicles), ການເຮັດທຸລະກຳດີຈີຕອນ (Digital Transactions), ເຕັກໂນໂລຊີການຂົນສົ່ງພວມປ່ຽນໂສມໜ້າໃໝ່. ຂະບວນການຫັນເປັນດີຈີຕອນນີ້ຕ້ອງດຳເນີນຢ່າງສະໜິດແໜ້ນກັບການຜັນຂະຫຍາຍແນວທາງຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດໂດຍເນັ້ນໃສ່ 3 ເສົາຄ້ຳທີ່ກ່ຽວພັນກັນແບບກາຍອິນຊີຄື: ການສ້າງເສດຖະກິດດີຈີຕອນ, ສັງຄົມດີຈີຕອນ ແລະ ການບໍລິຫານລັດດີຈີຕອນບົນຈິດໃຈແຫ່ງການຫັນປ່ຽນຈິນຕະນາການຢ່າງເລິກເຊິ່ງ. ຊຸມປີຜ່ານມາ, ພາຍໃຕ້ການນຳພາ-ຊີ້ນຳຂອງພັກ ແລະ ລັດຖະບານ, ຂະ ແໜງການເຕັກໂນໂລຊີ ແລະ ການສື່ສານສາມາດຍາດໄດ້ຜົນງານອັນພົ້ນເດັ່ນ ຊຶ່ງເປັນຮາກຖານອັນແໜ້ນແກ່ນໃຫ້ແກ່ການພັດທະນາປະເທດຊາດ. ໃນນັ້ນ, ດ້ານໂຄງລ່າງພື້ນຖານ: ໄດ້ຂະຫຍາຍຕາໜ່າງສາຍກາບໄຍແສງ (Fiber Optic) ໄດ້ຫຼາຍກວ່າ 36,000 ກິໂລແມັດ, ສັນຍານ 4G ຄອບຄຸມ 76% ຂອງຈຳນວນບ້ານທົ່ວປະເທດ ແລະ 5G ໄດ້ເປີດໃຫ້ບໍລິການແລ້ວໃນ 59 ເມືອງສຳຄັນ, ສົ່ງຜົນໃຫ້ອັດຕາການນຳໃຊ້ອິນເຕີເນັດເພີ່ມຂຶ້ນເປັນ 63% ຂອງປະຊາກອນ, ດ້ານການຫັນເປັນລັດຖະບານດີຈີຕອນ ໄດ້ສຳເລັດການເຊື່ອມໂຍງເຄືອຂ່າຍອິນຕຣາເນັດພາກລັດ (G-Net) ຄອບຄຸມທຸກກະຊວງ ແລະ ແຂວງ, ພ້ອມທັງຜັນຂະຫຍາຍລະບົບຫ້ອງການທັນສະໄໝ (e-Office) ຢ່າງກວ້າງຂວາງ. ອັນພົ້ນເດັ່ນແມ່ນການສ້າງຕັ້ງຄະນະຫັນເປັນດີຈີຕອນລະດັບຊາດໂດຍມີທ່ານນາຍົກລັດຖະມົນຕີເປັນປະທານ ຊຶ່ງໄດ້ກາຍເປັນກົນໄກນຳພາ - ຊີ້ນຳທີ່ເຂັ້ມແຂງ ແລະ ເປັນເອກະພາບຕັ້ງແຕ່ສູນກາງລົງຮອດທ້ອງຖິ່ນ, ດ້ານການສົ່ງເສີມທຸລະກິດ ພວກເຮົາໄດ້ສ້າງສະພາບແວດລ້ອມທີ່ເອື້ອອຳນວຍໃຫ້ແກ່ການຫັນເປັນດີຈີຕອນໂດຍການສ້າງ ແລະ ປັບປຸງນິຕິກຳ, ແຜນຍຸດທະສາດດ້ານຕ່າງໆເຊັ່ນ: ດ້ານການບໍລິຫານລັດດີຈີຕອນ, ຄວາມປອດໄພໄຊເບີ, ການສົ່ງເສີມທຸລະກິດສະຕາດອັບ, ພວມຮ່າງແຜນຍຸດທະສາດປັນຍາປະດິດ (AI) ແລະອື່ນໆ. ພ້ອມທັງໄດ້ສ້າງຕັ້ງ “ອຸທິຍານດີຈີຕອນ” (Lao Digital Park) ເພື່ອເປັນສູນກາງບົ່ມເພາະທຸລະກິດສະຕາດອັບ (Startup), ດຶງດູດການລົງທຶນ ແລະ ສ້າງບຸກຄະລາກອນທີ່ມີທັກສະສູງ ໂດຍເນັ້ນໃສ່ນະວັດຕະກຳທີ່ເປັນມິດກັບສິ່ງແວດລ້ອມ.
ສຳລັບປີ 2026 ຈະສຸມທຸກສະຕິປັນຍາ ແລະ ກຳລັງແຮງເຂົ້າໃນການສືບຕໍ່ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີX ຂອງລັດຖະບານໃຫ້ປະກົດຜົນເປັນຈິງ, ຈະສຸມໃສ່ການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ດ້ວຍການນຳໃຊ້ເຕັກໂນໂລຊີ ແລະ ນະວັດຕະກຳທັນສະໄໝໂດຍສະເພາະປັນຍາປະດິດ (AI) ເຂົ້າໃນທຸກຂົງເຂດວຽກງານ. ໂອກາດດັ່ງກ່າວ ທ່ານ ສັນຕິສຸກ ສິມມາລາວົງ ຮຽກຮ້ອງມາຍັງທຸກພາກສ່ວນຈົ່ງຍົກສູງບົດບາດການນຳໃຊ້ເຕັກໂນໂລຊີດີຈີຕອນ ແລະ ນະວັດຕະກຳໃໝ່ໃຫ້ເກີດຜົນປະໂຫຍດສູງສຸດໃນທຸກໆຂົງເຂດວຽກງານທັງພາກລັດ ແລະ ພາກທຸລະກິດ, ຍົກສູງສະຕິປັນຍາ ແລະ ຫັນປ່ຽນຈິນຕະນາການສູ່ການເປັນ “ຜູ້ສ້າງ” ເຕັກໂນໂລຊີຫຼາຍກວ່າການເປັນພຽງ “ຜູ້ຊົມໃຊ້” ພ້ອມທັງມີສະຕິລະວັງຕົວສູງ ແລະ ສ້າງຄວາມສະດຸ້ງໄວໃຫ້ຮູ້ເທົ່າທັນດີຈີຕອນເພື່ອປ້ອງກັນຕົນເອງຈາກອາຊະຍາກຳທາງໄຊເບີ, ພວກເຮົາພ້ອມຈິດພ້ອມໃຈກັນຫັນເປັນທັນສະໄໝຢ່າງຮອບດ້ານເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ X ຂອງລັດໃຫ້ບັນລຸຜົນສຳເລັດຕາມຄາດໝາຍ, ສ້າງເສດຖະກິດເອກະລາດເປັນເຈົ້າຕົນເອງ ແລະ ນຳພາປະເທດຊາດກ້າວໄປສູ່ຍຸກດີຈີຕອນທີ່ຮຸ່ງເຮືອງ, ປອດໄພ ແລະ ຍືນຍົງ.
ໃນພິທີ, ຍັງໄດ້ຈັດເວທີສົນທະນາ ໃນຫົວຂໍ້: “ການມີສ່ວນຮ່ວມໃນການຂັບເຄື່ອນການຫັນເປັນດີຈີຕອນ ໃນ3 ເສົາຄໍ້າແບບຍືນຍົງ”, ການນໍາສະເໜີບົດ: ແນວໂນ້ມການພັດທະນາ AI ໃນຍຸກດີຈີຕອນ, ແຜນການກໍ່ສ້າງພັດທະນາບຸກຄະລາກອນຮອງຮັບການຫັນເປັນດີຈີຕອນຂອງກະຊວງເຕັກໂນໂລຊີ ແລະ ການສື່ສານ.
(ຂ່າວ: ແສງຈັນ)
ຄໍາເຫັນ