 |
ໃນໂອກາດດັ່ງກ່າວ, ທ່ານຮອງລັດຖະມົນຕີກະຊວງການຕ່າງປະເທດ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງ ທ່ານ Crispi MBANDU PHANZU ພ້ອມດ້ວຍຄະນະໃນຄັ້ງນີ້ ພ້ອມທັງໄດ້ປຶກສາຫາລືກ່ຽວກັບຄວາມເປັນໄປໄດ້ໃນການສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສປ ກົງໂກ ໃນຕໍ່ໜ້າ. ພ້ອມດຽວກັນນີ້, ທ່ານຮອງລັດຖະມົນຕີກະຊວງການຕ່າງປະເທດ ຍັງໄດ້ແຈ້ງໃຫ້ທາງຝ່າຍ ສປ ກົງໂກ ຊາບກ່ຽວກັບ ຜົນສໍາເລັດຂອງການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ ຊຶ່ງລັດຖະບານ ສປປ ລາວ ໃຫ້ບຸລິມະສິດແກ່ການພັດທະນາພື້ນຖານໂຄງລ່າງເພື່ອການເຊື່ອມໂຍງ-ເຊື່ອມຈອດ, ການພັດທະນາຊົນນະບົດເພື່ອຫຼຸດຜ່ອນຄວາມທຸກຍາກຂອງປະຊາຊົນ, ການເຕີບໂຕສີຂຽວ ແລະ ເປັນມິດຕໍ່ສິ່ງແວດລ້ອມ, ການຫັນເປັນດີຈີຕອນ ເພື່ອສ້າງການຫັນປ່ຽນດ້ານການພັດທະນາເສດຖະກິດ-ສັງຄົມຮອບດ້ານ ໄປສູ່ຄຸນນະພາບໃໝ່, ຄວາມໝາຍໝັ້ນເພື່ອນໍາພາປະເທດອອກຈາກສະຖານະພາບດ້ອຍພັດທະນາ ອີງຕາມການແນະນໍາຂອງອົງການ ສປຊ. ນອກຈາກນີ້, ທ່ານຮອງລັດຖະມົນຕີ ຍັງໄດ້ຕີລາຄາສູງຕໍ່ການພົບປະ ແລະ ປຶກການສາຫາລື ລະຫວ່າງສອງຝ່າຍໃນຄັ້ງນີ້ເພື່ອສ້າງຂອບການພົວພັນຮ່ວມມືລະຫວ່າງສອງປະເທດໃນຕໍ່ໜ້າລວມທັງການຮ່ວມມືໃນຂອບວຽກງານ ຝຣັງໂກໂຟນີ.
 |
ໃນໂອກາດດຽວກັນນີ້, ທ່ານ Crispi MBANDU PHANZU ໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການປຶກສາຫາລື ເພື່ອສ້າງຂອບການຮ່ວມມື ລະຫວ່າງ ສປປ ລາວ ແລະ ສປກົງໂກພ້ອມທັງໃຫ້ຄວາມໝາຍໝັ້ນວ່າຈະຊຸກຍູ້ໃຫ້ມີການສ້າງຕັ້ງສາຍພົວພັນການທູດ ລະຫວ່າງສອງປະເທດ ໃນຕໍ່ໜ້າ, ລວມທັງ ການຮ່ວມມືໃນຂອບວຽກງານຝຣັງໂກໂຟນີ.
(ຂ່າວ: ກຕທ)
ຄໍາເຫັນ