ຮອງເຈົ້າແຂວງຫຼວງນໍ້າທາ ພົບປະປະຊາຊົນ ບ້ານນໍ້າຂອງນ້ອຍ

ຫວ່າງນີ້, ທ່ານ ອ່ອນຈັນ ຄຳພາວົງ ຮອງເຈົ້າແຂວງຫຼວງນໍ້າທາ ພ້ອມດ້ວຍຄະນະ ຈາກແຂວງ ແລະ ເມືອງ ໄດ້ລົງຢ້ຽມຢາມ - ພົບປະ ປະຊາຊົນບ້ານນໍ້າຂອງນ້ອຍ ເມືອງວຽງພູຄາ ແຂວງຫຼວງນໍ້າທາ. 
    ການພົບປະຄັ້ງນີ້, ທ່ານ ສຸພັນ ສົມວຽງສີ ພະນັກງານລົງກໍ່ສ້າງຮາກຖານບ້ານນໍ້າຂອງນ້ອຍ ໄດ້ລາຍງານສະພາບລວມການຈັດຕັ້ງປະຕິບັດວຽກງານໃນໄລຍະຜ່ານມາວ່າ: ບ້ານ ນໍ້າຂອງນ້ອຍ ຂຶ້ນກັບກຸ່ມບ້ານນໍ້າແພ ເມືອງວຽງພູຄາ ຫ່າງຈາກເທດສະບານເມືອງ 36 ກິໂລແມັດ, ມີພູດອຍກວມ 95%, ມີ 66 ຫຼັງຄາເຮືອນມີ 84 ຄອບຄົວ, ມີ 387 ຄົນ ຍິງ 198 ຄົນ, ມີຄອບຄົວພົ້ນທຸກ 43 ຄອບຄົວ, ຄອບຄົວທຸກຍາກ 15 ຄອບຄົວ, ເສັ້ນທາງການຄົມມະນະຄົມສາມາດທຽວໄດ້ 1 ລະດູ, ຄອບຄົວພາຍໃນບ້ານ ມີໄຟຟ້າໃຊ້ 62%, ຍັງມີ 27 ຫຼັງຄ່າເຮືອນຍັງບໍ່ທັນໄດ້ຊົມໃຊ້ໄຟຟ້າ. ເອົາໃຈໃສ່ໃນການສ້າງສາພັດທະນາເສດຖະກິດຄອບຄົວ ຊຶ່ງຫັນເອົາການປູກ, ການລ້ຽງ ເພື່ອກາຍເປັນສິນຄ້າ.
      ທິດທາງແຜນການໃນຕໍ່ໜ້າທາງອົງການຈັດຕັ້ງບ້ານຈະໄດ້ສົ່ງເສີມ ແລະ ຊຸກຍູ້ປະຊາຊົນປູກຝັງ ແລະ ລ້ຽງສັດໃຫ້ຫຼາຍກາຍເປັນສິນຄ້າເປັນຕົ້ນແມ່ນ ປູກສາລີແຂງ, ພຶດຕະກຸນຖົ່ວ, ພືດຜັກ, ໄມ້ໃຫ້ໝາກ,ໝາກນໍ້າມັນ, ເອົາໃຈໃສ່ສົ່ງເສີມການປູກການລ້ຽງໃຫ້ຫຼາຍກາຍເປັນສີນຄ້າ.
    ໃນໂອກາດນີ້, ທ່ານ ຮອງເຈົ້າແຂວງຫຼວງນໍ້າທາ ໄດ້ເນັ້ນໜັກໃຫ້ຄະນະພັກ, ອົງການຈັດຕັ້ງບ້ານຈົ່ງເອົາໃຈໃສ່ໃນການພັດທະນາບ້ານຂອງຕົນ, ເປັນຕົ້ນເອົາໃຈໃສ່ຜູກແໜ້ນຄວາມສາມັກຄີພາຍໃນບ້ານໃຫ້  ແໜ້ນແຟ້ນ, ປຸກລະດົມສົ່ງເສີມປະຊາຊົນທໍາການຜະລິດປູກຝັງລ້ຽງສັດໃຫ້ຫຼາຍກ່າຍເປັນສີນຄ້າ ແລະ ເອົາໃຈໃສ່ວຽກງານປ້ອງຊາດ - ປ້ອງກັນຄວາມສະຫງົບ. ໃນໂອກາດນີ້, ທ່ານ ຮອງເຈົ້າແຂວງ ໄດ້ມອບ ຜ້າຫົ່ມໂຕໂຕ ກັນໜາວ 20 ຜືນ, ອຸປະກອນການຮຽນ ບິກຂຽນ, ສໍດໍາ ລວມ 40 ກັບ  ແລະ ປື້ມຂຽນ  20 ຕັບ ໃຫ້ປະຊາຊົນ ລວມມູນຄ່າທັງໝົດ 6 ລ້ານກວ່າກີບ.
 (ຂ່າວ: ມຸນຕີ)