ໂຮງແຮມວຽງຈັນແມ່ຂອງບໍລິການດີ ມີຄວາມທັນສະໄໝ

ໂດຍ: ສຳນານ ພົມພັກດີ
ໂຮງແຮມວຽງຈັນແມ່ຂອງຕັ້ງຢູ່ໃກ້ກັບ ສູນການຄ້າລາວ-ໄອເຕັກ, ນະຄອນຫຼວງວຽງຈັນ ເປັນໂຮງແຮມລະດັບ 4 ດາວ ມີການບໍລິການດີ ແລະ ມີຄວາມທັນສະໄໝ ເພື່ອຮອງຮັບໃຫ້ແກ່ກັບບັນດາລູກຄ້າ, ນັກທ່ອງທ່ຽວທົ່ວໄປທີ່ມາທ່ຽວລາວສົນໃຈເຂົ້າພັກ, ພິເສດທາງໂຮງແຮມໄດ້ເອົາໃຈໃສ່ເບິ່ງແຍງພະນັກງານກຳມະກອນທີ່ເປັນຄົນລາວເປັນຢ່າງດີ ໂດຍສະ ເພາະແມ່ນເພີ່ມບໍາເນັດໃຫ້ພະນັກງານທີ່ມີຄວາມຫ້າວຫັນ ແລະ ຊ່ວຍຄອບຄົວພະນັກງານໃນແຕ່ລະເດືອນນໍາອີກ; ທ່ານ ອາຫຼີ ຜູ້ຈັດການ ກຸ່ມບໍລິສັດໃຫຍ່ວຽງຈັນແມ່ຂອງ ໄດ້ໃຫ້ສໍາພາດຕໍ່ນັກຂ່າວໜັງສືພິມປະຊາຊົນເມື່ອວັນທີ 17 ມັງກອນນີ້ວ່າ: ໂຮງແຮມວຽງຈັນແມ່ຂອງ ເປັນໂຮງແຮມລະດັບ 4 ດາວ,ໃນເນື້ອທີ່ທັງໝົດ 7000 ຕາແມັດ, ມີ 13 ຊັ້ນ  ປະກອບມີຫ້ອງນອນ ແລະ ຫ້ອງພັກທັງໝົດ 78 ຫ້ອງ ໃນນັ້ນ ຊັ້ນ 1 ເປັນຫ້ອງເຄົາເຕີ ແລະ ຫ້ອງຄົວ, ຊັ້ນ2 ເປັນຫ້ອງອາຫານ, ຊັ້ນ 3-8 ແມ່ນເປັນຫ້ອງນອນ ແລະ ຫ້ອງພັກ, ຊັ້ນ9 ເປັນຫ້ອງອອກກຳລັງກາຍ, ຊັ້ນ 10 ເປັນສະລອຍນໍ້າ ແລະ ຊັ້ນ 13 ເປັນຫ້ອງອາຫານວີໄອພີ ແລະ ຫ້ອງປະຊຸມ-ສຳມະນາຕ່າງໆ, ສຳລັບລາຄາໃນການພັກເຊົາຕໍ່ຫ້ອງ ແມ່ນອີງຕາມລະດັບຂອງຫ້ອງຄືເລີ່ມຕົ້ນ 60-90ໂດລາ; ທ່ານ ກ່າວຕື່ມວ່າ: ນັບແຕ່ມື້ເປີດບໍລິການຈົນມາເຖິງປັດຈຸບັນ, ມີລູກຄ້າເຂົ້າມາໃຊ້ບໍລິການໂຮງແຮມເປັນຈຳນວນຫຼາຍ. ສ່ວນຫຼາຍຈະແມ່ນເປັນຄົນຈີນ, ເກົາຫຼີ ແລະ ສັນຊາດອື່ນໆຈໍານວນໜຶ່ງ. ສໍາລັບຮ້ານອາຫານພາຍໃນໂຮງແຮມແມ່ນຈະເນັ້ນປະເພດອາຫານລາວ ແລະ ອາຫານຈີນ. ສ່ວນເລື່ອງການບໍລິການ ທາງໂຮງແຮມໄດ້ເອົາໃຈໃສ່ເປັນພິເສດ, ນັບແຕ່ການຕ້ອນຮັບແຂກດ້ວຍຄວາມພໍໃຈ, ຄວາມສະອາດ, ການຮັກສາຄວາມປອດໄພ 24 ຊົວໂມງ, ປຸງແຕ່ງອາຫານໃຫ້ມີລົດຊາດແຊບຖືກໃຈລູກຄ້າ. ແນໃສ່ສ້າງຄວາມພໍໃຈໃຫ້ແກ່ລູກຄ້າທີ່ໄດ້ມາພັກແລ້ວຍາກມາອີກ.
ປັດຈຸບັນ, ໂຮງແຮມວຽງຈັນແມ່ຂອງ ມີຄົນລາວປະກອບອາຊີບ 100 ກວ່າຄົນ ທີ່ສັງກັດຢູ່ໃນຫຼາຍຕຳແໜ່ງານ, ທາງໂຮງແຮມໄດ້ເອົາໃຈໃສ່ເບິ່ງແຍງຊີວິການເປັນຢູ່ຂອງພະນັກງານ ແລະ ກຳມະກອນ ບໍໍ່ວ່າຈະເປັນການໃຫ້ເງິນເດືອນກໍສູງ, ລ້ຽງເຂົ້າສອງຄາບ, ຖ້າຫາກພະນັກງານຜູ້ໃດບໍ່ສະດວກໃນການທຽວມາເຮັດວຽກ ທາງໂຮງແຮມກໍມີຫໍພັກໃຫ້ຢູ່.ຖ້າພະນັກງານ ຜູ້ໃດຫາກເຮັດວຽກຄົບ 1 ປີ ຄອບຄົວພະນັກງານຜູ້ນັ້ນຄື: ພໍ່ ແລະ ແມ່ ຈະໄດ້ຮັບເງິນຈາກກອງທຶນຂອງໂຮງແຮມມອບໃຫ້ເດືອນລະ 5 ແສນກີບຕໍ່ຄົນ. ໃນກໍລະນີ ພະນັກງານເຈັບເປັນ ກໍມີນະໂຍບາຍຊ່ວຍເຫຼືອ. ພະນັກງານໄດ້ໝູນວຽນກັນພັກ 4 ມື້ຕໍ່ເດືອນ; ທ່ານໃຫ້ຮູ້ຕື່ມວ່າ: ສໍາລັບແຜນການໃນຕໍ່ໜ້າ ທາງໂຮມແຮມຈະພັດທະນາປັບປຸງພື້ນທີ່ຢູ່ເບື້ອງຫຼັງຂອງໂຮງແຮມເປັນຮ້ານອາຫານ, ຮ້ານວາງສະແດງສິນຄ້າຜະລິດຕະພັນຂອງລາວ, ບ່ອນພັກຜ່ອນ. ປັດຈຸບັນໄດ້ປະດັບປະດາຕົບແຕ່ງ, ປູກຕົ້ນໄມ້ໃນຂອບເຂດສວນດ້ານຫຼັງໂຮງແຮມ, ຂະນະດຽວກັນຈະຈັດໃຫ້ມີການສະແດງດົນຕີໃນຕອນຄໍ່າໃນຂອບເຂດສະລອຍນໍ້າຊັ້ນເທິງ ເພື່ອບໍລິການແຂກ.
ກຸ່ມບໍລິສັດໃຫຍ່ວຽງຈັນແມ່ຂອງ ແມ່ນນັກລົງທຶນ ສປ ຈີນ ທີ່ເຂົ້າມາດຳເນີນທຸລະກິດຢູ່ລາວ, ຜ່ານມາທາງກຸ່ມບໍລິສັດດັ່ງກ່າວໄດ້ປະຕິບັດຕາມກົດໝາຍຂອງ ສປປ ລາວ ຢ່າງເຂັ້ມງວດ. ນັບແຕ່ການມອບພັນທະໃຫ້ລັດຖະບານໄດ້ເປັນປົກກະຕິ, ເອົາໃຈໃສ່ດ້ານສະຫວັດດີການ-ສັງຄົມຕໍ່ພະນັກງານ ແລະ ກຳມະກອນ, ການປົກປັຮັກຮັກສາສິ່ງແວ້ດລ້ອມ ສ້າງເປັນບ່ອນພັກຜ່ອນຍ່ອນອາລົມ, ໃຫ້ຕົວເມືອງນະຄອນຫຼວງວຽງຈັນມີສີສັນ, ດຶງດູດໃຫ້ນັກທ່ອງທ່ຽວ ເຂົ້າມາທ່ຽວ ສປປ ລາວ ນັບມື້ນັບເພີ່ມຂຶ້ນ ແນໃສ່ເພື່ອສ້າງຖານລາຍຮັບໃຫ້ແກ່ວຽກງານທ່ອງທ່ຽວມີຄວາມເຂັ້ມແຂງຂຶ້ນເລື້ອຍໆ.