ໂຮງຮຽນປະຖົມ 16 ແຫ່ງ ຢູ່ເມືອງນາກາຍ ໄດ້ຮັບການສົ່ງເສີມອາຫານທ່ຽງ ໃນໄລຍະ 3 ປີ

ບໍລິສັດ ໄຟຟ້າ ນໍ້າເທີນ 2 ໄດ້ໃຫ້ທຶນສະໜັບສະໜູນ ໂຄງການສົ່ງເສີມອາຫານທ່ຽງ ໃນໂຮງຮຽນປະຖົມ 16 ແຫ່ງ ທີ່ເມືອງນາກາຍ ແຂວງຄໍາມ່ວນ ໂດຍຜ່ານມູນນິທິການສຶກສາເພື່ອການພັດທະນາ ດ້ວຍມູນຄ່າ 3,2 ຕື້ກີບ ໃນໄລຍະ 3 ປີ ເລີ່ມແຕ່ວັນທີ 29 ພຶດສະພາ 2023 ເຖິງ 31 ທັນວາ 2025 ຊຶ້ງນີ້ຈະເປັນການຊ່ວຍປັບປຸງແກ້ໄຂບັນຫາການສຶກສາ, ສະພາວະໂພຊະນາການຂອງນັກຮຽນ ໃຫ້ບັນລຸຄາດໝາຍໃນແຕ່ລະໄລຍະ.
    ພິທີເຊັນບົດບັນທຶກຄວາມເຂົ້າໃຈ “ໂຄງການສົ່ງເສີມອາຫານທ່ຽງໃນໂຮງຮຽນ ທີ່ເມືອງນາກາຍ ແຂວງຄໍາມ່ວນ” ໄດ້ມີຂຶ້ນໃນວັນທີ 11 ເມສາ ຜ່ານມາ ທີ່ນະຄອນຫຼວງວຽງຈັນ ໂດຍການເຂົ້າຮ່ວມເປັນສັກຂີພິຍານຂອງ ທ່ານ ສຸລິອຸດົງ ສູນດາລາ ຮອງລັດຖະມົນຕີ ກະຊວງສຶກສາທິການ ແລະກິລາ ແລະ ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ ຊຶ່ງການເຊັນບົດບັນທຶກນີ້ເປັນການລົງນາມລະຫວ່າງ ທ່ານ ມາກອອງຕວນ ຣຸບຜູ້ອຳນວຍການໃຫຍ່ ບໍລິສັດ ໄຟຟ້າ ນໍ້າເທີນ 2, ທ່ານ ວົງສອນ ພູມະນີວົງຮອງຜູ້ອຳນວຍການສູນສົ່ງເສີມການສຶກສາຮຽນຮ່ວມ ແລະ ທ່ານ ຄໍາຮຽນ ອິນທະຫວາ ປະທານມູນນິທິການສຶກສາເພື່ອການພັດທະນາ, ພ້ອມດຽວກັນນີ້, ກໍມີທຸກພາກສ່ວນກ່ຽວຂ້ອງເຂົ້າຮ່ວມ.
    ທ່ານ ສຸລິອຸດົງ ສູນດາລາ ກ່າວວ່າ: ການສະໜັບສະໜູນຊ່ວຍເຫຼືອທຶນຮອນຈາກ ບໍລິສັດ ໄຟຟ້າ ນໍ້າເທີນ 2 ຄັ້ງນີ້ຖືໄດ້ວ່າ ເປັນການສ້າງກໍາລັງແຮງອັນສໍາຄັນໜຶ່ງ ໃນການຊ່ວຍເຫຼືອລັດຖະບານ ກໍຄື ຂະແໜງການສຶກສາ ແລະ ກິລາ ໃນການສົ່ງເສີມວຽກງານອາຫານທ່ຽງໃນໂຮງຮຽນ ນັ້ນໄດ້ສະແດງເຖິງຄວາມເປັນຫວ່ງເປັນໃຍ ຂອງຄະນະນໍາບໍລິສັດດັ່ງກ່າວ ຕໍ່ລັດຖະບານລາວ ກໍຄືຕໍ່ການພັດທະນາແຜນເສດຖະກິດ-ສັງຄົມແຫ່ງຊາດ ໂດຍສະເພາະແມ່ນຕໍ່ວຽກງານການສຶກສາ ແລະ ກິລາ, ເວົ້າສະເພາະແມ່ນຕໍ່ນັກຮຽນອະນຸບານ ແລະ ປະຖົມສຶກສາ ທີ່ດ້ອຍໂອກາດໃນ 16 ໂຮງຮຽນ ໃນເມືອງນາກາຍ ແຂວງຄໍາມ່ວນ ເພື່ອໃຫ້ນັກຮຽນເຫຼົ່ານັ້ນ ໄດ້ຮັບການພັດການດ້ານຮ່າງກາຍ, ຈິດໃຈ, ມີຄວາມຮັກແພງກັນຂອງບັນດາເຜົ່າ ເພື່ອກ້າວເຂົ້າສູ່ການຮຽນຮູ້ທີ່ດີທີ່, ມີຄຸນນະພາບ, ໄດ້ຮັບການພັດທະນາຄຸນນະພາບຊີວິດທີ່ດີ ເພື່ອກ້າວໄປສູ່ການເປັນບຸກຄະລາກອນທີ່ມີຄຸນນະພາບ ຮັບໃຊ້ປະເທດຊາດ ໃນອະນາຄົດ, ການສະໜັບສະໜູນຊ່ວຍເຫຼືອທຶນຮອນຄັ້ງນີ້ ຍັງເປັນການປະກອບສ່ວນຕໍ່ຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (SDG) ແລະ ແຜນພັດທະນາຂະແໜງການສຶກສາ ແລະ ກິລາ ໃຫ້ບັນລຸຄາດໝາຍທີ່ໄດ້ວາງໄວ້.
    ທ່ານ ມາກອອງຕວນ ຣຸບ ໄດ້ກ່າວເນັ້ນໜັກເຖິງຄວາມສໍາຄັນຂອງໂຄງການສະໜອງອາຫານນີ້ວ່າ: ໂຄງການດັ່ງກ່າວຈະເປັນການສະໜັບສະໜູນ ລັດຖະບານ ແລະ ປະຊາຊົນໃນເມືອງນາກາຍ ໃນການສືບຕໍ່ສະໜອງອາຫານທ່ຽງໃຫ້ແກ່ເດັກນ້ອຍໃນໂຮງຮຽນພາຍໃຕ້ ແຜນງານອາຫານເພື່ອການສຶກສາ (NSMP), ເພື່ອປັບປຸງຄວາມຍືນຍົງຂອງໂຄງການສະໜອງອາຫານໃນໂຮງຮຽນ ໂດຍຜ່ານການສ້າງໂຮງຮຽນຕົວແບບຢູ່ເມືອງນາກາຍແລະສົ່ງເສີມໂຄງການການສະໜອງອາຫານໃນໂຮງຮຽນແບບຍືນຍົງ ໂດຍຜ່ານການແລກປ່ຽນລະຫວ່າງໂຮງຮຽນຕົວແບບ ແລະໂຄງການສະໜອງອາຫານໃນໂຮງຮຽນອື່ນໆ.
    ກິດຈະກຳຫຼັກຂອງໂຄງການສົ່ງເສີມອາຫານທ່ຽງ ໃນໂຮງຮຽນປະຖົມ 16 ແຫ່ງ ທີ່ເມືອງນາກາຍ ປະກອບມີຄື: ການສ້າງຄວາມເຂັ້ມແຂງໃຫ້ກັບບ້ານ ແລະ ໂຮງຮຽນ ໃນການບໍລິຫານຄຸ້ມຄອງວຽກງານສົ່ງເສີມອາຫານໃນໂຮງຮຽນ ໃຫ້ມີຄວາມຍືນຍົງ, ສ້າງໂຮງຮຽນຕົວແບບວຽກງານສົ່ງເສີມອາຫານທ່ຽງໃນໂຮງຮຽນ ແລະ ເສີມສ້າງວຽກງານສົ່ງເສີມອາຫານທ່ຽງໃຫ້ມີຄວາມຍືນຍົງ.
(ຂ່າວ-ພາບ: ສຸກສະຫວັນ)