ຮອງຫົວໜ້າ ຄອສພ ຕ້ອນຮັບຄະນະຜູ້ແທນພັກກອມມູນິດຈີນ

ໂອກາດນີ້, ສະຫາຍ ຄໍາມອນ ຈັນທະຈິດ ໄດ້ໃຫ້ກຽດຕ້ອນຮັບຢ່າງອົບອຸ່ນ ແລະ ຕີລາຄາສູງພ້ອມລາຍງານກ່ຽວກັບວຽກສຳມະນາທິດສະດີສອງພັກວ່າ: ປີນີ້ເປັນປີທີ່ ພັກ ປປ ລາວ ຈະໄດ້ເປັນເຈົ້າພາບ ໃນກອງປະຊຸມສຳມະນາທິດສະດີສອງພັກ; ໄດ້ເອກະພາບກັນສຳມະນາພາຍໃຕ້ຫົວຂໍ້: “ພັກນຳພາໃນການນຳໃຊ້ແຜນໄລຍະກາງ ແລະ ໄລຍະຍາວ ໃນການພັດທະນາເສດຖະກິດ-ສັງຄົມ, ບົດຮຽນລາວ ແລະ ຈີນ”. ສຳລັບສະຖານທີ່ ຈະຈັດສຳມະນາໃນປີນີ້ ຈະຈັດຂຶ້ນຢູ່ແຂວງຈຳປາສັກ ໃນຕົ້ນເດືອນພະຈິກ ປີ 2025. ໃນໄລຍະຜ່ານມາ ການຈັດຕັ້ງສຳມະນາແຕ່ລະຄັ້ງຈັດຢູ່ນະຄອນຫຼວງວຽງຈັນ. ພ້ອມນີ້, ຍັງແຈ້ງໃຫ້ຊາບກ່ຽວກັບວຽກໂຄສະນາເປັນຕົ້ນໃນໄລຍະນີ້ ແມ່ນໄລຍະທີ່ ພັກປປ ລາວ ໄດ້ຊີ້ນຳໃນການປັບປຸງກົງຈັກໃນທົ່ວລະບົບການເມືອງ. ສຳລັບ ຄອສພ ກໍໄດ້ມີການປັບປຸງ, ໄດ້ໂຮມເອົາວຽກງານສື່ມວນຊົນ ເຂົ້າກັບຄະນະໂຄສະນາອົບຮົມສູນກາງພັກ ເພື່ອປະຕິບັດບົດບາດເປັນກະບອກສຽງໃຫ້ແກ່ພັກ. ປັດຈຸບັນ ຄອສພ ມີ 14 ໜ່ວຍງານຂັ້ນກົມ ແລະ ມີພະນັກງານທັງໝົດ 600 ກວ່າຄົນ ແລະ ຍັງໄດ້ແລກປ່ຽນບາງຄໍາເຫັນຕື່ມວ່າ: 1). ການສຳມະນາສອງພັກລາວ-ຈີນ ຄັ້ງນີ້, ພາຍຫຼັງສຳເລັດແມ່ນຈະໄດ້ຈັດພິມ ເພື່ອເຜີຍແຜ່. ໃນການຈັດພິມຢາກປຶກສາກັບສະຫາຍຝ່າຍຈີນວ່າບົດສຳມະນາ ສະເໜີໃຫ້ຈັດເປັນສອງພາສາ ຄື: ພາສາຈີນ ແລະ ພາສາລາວ; 2). ວຽກໂຄສະນາ: ເນື່ອງຈາກກົງຈັກນັບມື້ເຕີບໃຫຍ່, ຫຼາຍພາກສ່ວນໄດ້ໂຮມເຂົ້າກັບໂຄສະນາອົບຮົມ, ບົດຮຽນໃນການຄຸ້ມຄອງວຽກສື່ມວນຊົນ ກໍຍັງບໍ່ທັນຫຼາຍ ຈຶ່ງຢາກສະເໜີໄປຂໍແລກປ່ຽນບົດຮຽນນຳຄະນະໂຄສະນາອົບຮົມຂອງ ສປ ຈີນ ຕື່ມ; 3). ສ້າງເງື່ອນໄຂໃຫ້ສອງຄະນະໂຄສະນາອົບຮົມ ໄດ້ຄົ້ນຄວ້າຫົວຂໍ້ວິທະຍາສາດຮ່ວມກັນ ເປັນຕົ້ນແມ່ນປະຫວັດສາຍພົວພັນລາວ-ຈີນ, ຈີນ-ລາວ; 4). ສະເໜີຄະນະພົວພັນຕ່າງປະເທດຊຸກຍູ້ໃນການສ້າງຖັນແຖວພະນັກງານ, ໂຄສະນາ ແລະ ພະນັກງານສື່ມວນຊົນ ເພື່ອເຮັດໃຫ້ພະນັກງານນັບມື້ເຂັ້ມແຂງຂຶ້ນ.

ໂອກາດນີ້, ສະຫາຍ ເສີນໂຈ ໄດ້ສະແດງຄວາມຂອບໃຈ ຕໍ່ ສະຫາຍ ຄໍາມອນ ຈັນທະຈິດ ພ້ອມຄະນະ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມລາຍງານໃຫ້ຊາບກ່ຽວກັບການເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້ ແລະ ຢືນຢັນຮັບເອົາຄໍາເຫັນສະເໜີແລກປ່ຽນດັ່ງກ່າວ.

ສະຫາຍ ຄໍາມອນ ຈັນທະຈິດ ຍັງຕາງໜ້າ ຄອສພ ສະແດງຄວາມຂອບໃຈ ຕໍ່ຄະນະຜູ້ແທນພັກກອມມູນິດຈີນ ທີ່ມາຢ້ຽມຢາມ ແລະ ແລກປ່ຽນບົດຮຽນໃນຄັ້ງນີ້, ຂໍອວຍພອນໃຫ້ຄະນະຜູ້ແທນພັກກອມມູນິດຈີນ ຈົ່ງປະສົບຄວາມສຳເລັດໃນການຢ້ຽມຢາມລາວໃນຄັ້ງນີ້ ແລະ ອວຍພອນໃຫ້ສາຍພົວພັນມິດຕະພາບ ຄູ່ຮ່ວມຊາຕາກຳສັງຄົມນິຍົມ ຈົ່ງໝັ້ນຄົງຂະໜົງແກ່ນ ແລະ ແຕກດອກອອກຜົນຍິ່ງໆຂຶ້ນ.

ຂ່າວ-ພາບ: ວັນເພັງ