ຮອງຫົວໜ້າ ຄອສພພົບປະພະນັກງານສື່ມວນຊົນແຂວງຄໍາມ່ວນ

ໃນວັນທີ 29 ພະຈິກ ນີ້ທີ່ພະແນກຖະແຫຼງຂ່າວ, ວັດທະນະທໍາແລະທ່ອງທ່ຽວແຂວງຄໍາມ່ວນ,ທ່ານວັນໄຊຕະວິນຍານຮອງຫົວໜ້າຄະນະໂຄສະນາອົບຮົມສູນກາງພັກ(ຄອສພ)ຫົວໜ້າບັນນາທິການໃຫຍ່ໜັງສືພິມປະຊາຊົນໄດ້ພົບປະໃຫ້ທິດຊີ້ນໍາພະນັກງານສື່ມວນຊົນຂອງແຂວງ, ໂດຍມີທ່ານມະໂນທອງພົງສະຫວັດຮອງຫົວໜ້າພະແນກຖວທແຂວງຜູ້ຊີ້ນໍາວຽກງານສື່ມວນຊົນພ້ອມດ້ວຍບັນດາຂະແໜງການກ່ຽວຂ້ອງແລະສື່ມວນຊົນຂອງແຂວງເຂົ້າຮ່ວມ.
ເພື່ອເຮັດແນວໃດໃຫ້ການໂຄສະນາໄປສູ່ຮູບແບບໃໝ່, ແບບທັນສະໄໝແລະດຶງດູດຜູ້ອ່ານ, ຜູ້ຊົມໂອກາດດັ່ງກ່າວທ່ານ ວັນໄຊ ຕະວິນຍານໄດ້ມີຄໍາເຫັນເນັ້ນມາຍັງຄະນະພະແນກກໍຄືຜູ້ຊີ້ນໍາວຽກງານຂ່າວຕ້ອງຕິດຕາມສະພາບການຢ່າງຮອບດ້ານໂດຍສະເພາະທິດຊີ້ນໍາ, ມະຕິຕ່າງໆຂອງຂັ້ນເທິງເພື່ອນໍາມາຜັນຂະຫຍາຍປຶກສາຫາລືພາຍໃນຄະນະ, ມີການປະຊຸມສ່ອງແສງຂ່າວປະຈໍາອາທິດພ້ອມນີ້ໃຫ້ມອບຄວາມຮັບຜິດຊອບໃຫ້ບຸກຄົນ, ຂະແໜງການກ່ຽວຂ້ອງຈັດຕັ້ງປະຕິບັດແລວດຽວ, ໃຫ້ຕິດຕາມຫາງສຽງສັງຄົມເພື່ອຊອກຫາວິທີແກ້ໄຂໃຫ້ທັນເວລາ; ໃຫ້ເອົາໃຈໃສ່ໂຄສະນາເຮັດແນວໃດຕອບໂຕ້ຫາງສຽງສັງຄົມຊຶ່ງປັດຈຸບັນປະເທດຊາດພົບຄວາມຫຍຸ້ງຍາກດ້ານເສດຖະກິດ-ການເງິນໃຫ້ເຄື່ອນໄຫວສໍາພາດໜ່ວຍງານທີ່ກ່ຽວຂ້ອງເພື່ອໂຄສະນາຜ່ານສື່ທາງໂທລະພາບ,ວິທະຍຸແລະໜັງສືພິມເພື່ອຊີ້ແຈງໃຫ້ປະຊາຊົນຮັບຮູ້, ເຂົ້າໃຈໂດຍຕິດພັນກັບວຽກງານ 3 ສ້າງ, ການໂຄສະນາກອງປະຊຸມໃຫຍ່ 3 ຂັ້ນ; ໃຫ້ແຕ່ງໜ່ວຍງານການຕະຫຼາດເຄື່ອນໄຫວຊອກຫາໂຄສະນາເພື່ອຊອກແຫຼ່ງລາຍຮັບເຂົ້າກົມກອງ, ຄຽງຄູ່ກັນນັ້ນໃຫ້ມີການປະສານງານຢ່າງກວ້າງຂວາງ, ກົມກຽວແລະເອົາໃຈໃສ່ຮີບຮ້ອນປັບປຸງກົງຈັກການຈັດຕັ້ງໂດຍໄວ, ທັງນີ້ເພື່ອແນໃສ່ປັບປຸງວຽກງານຂ່າວໃຫ້ມີຄວາມວ່ອງໄວແລະທັນກັບສະພາບການ.
ຂ່າວ-ພາບ: ມະນີວັນ