ຫ້ອງການອອປສ ລາວ-ຫວຽດນາມຮ່ວມມືແລກປ່ຽນບົດຮຽນນໍາກັນ

ໃນວັນທີ 21 ພຶດສະພານີ້, ຢູ່ອົງການໄອຍະການປະຊາຊົນສູງສຸດ ທີ່ນະຄອນຫຼວງຮ່າໂນ້ຍ ແຫ່ງ ສສ ຫວຽດນາມ, ຄະນະຜູ້ແທນອົງການໄອຍະການປະຊາຊົນສູງສຸດ(ອອປສ) ແຫ່ງ ສປປ ລາວ ແລະ ຄະນະຜູ້ແທນອົງການໄອຍະການປະຊາຊົນສູງສຸດ ແຫ່ງ ສສ ຫວຽດນາມ ໄດ້ຈັດໃຫ້ມີການພົບປະແລກປ່ຽນ ບົດຮຽນວຽກງານຫ້ອງການ, ວຽກງານ ຂ່າວທາງເວັບໄຊ, ວາລະສານ ແລະ ຂ່າວໜັງສືພິມ ຂອງອົງການໄອຍະການປະຊາຊົນຂອງສອງປະເທດຮ່ວມກັນ. ຕາງໜ້າຄະນະຜູ້ແທນຝ່າຍລາວນໍາໂດຍ ທ່ານ ບຸນທ່ຽງ ວິໄລວົງ ຮັກສາການຫົວໜ້າຫ້ອງການອົງການໄອຍະການປະຊາຊົນສູງສຸດ (ອອປສ) ແຫ່ງ ສປປ ລາວ  ແລະ ຝ່າຍ ສສ ຫວຽດນາມ ໂດຍທ່ານ  ຟ້າມແທງ ຕຶ່ງ ຫົວໜ້າຫ້ອງການອອປສ ແຫ່ງ ສສ ຫວຽດນາມ ພ້ອມດ້ວຍຄະນະທັງສອງຝ່າຍເຂົ້າຮ່ວມ.
      ໃນການພົບປະຄັ້ງນີ້, ສອງສະຫາຍຫົວໜ້າຫ້ອງການ ລາວ-ຫວຽດນາມ ຫວຽດນາມ-ລາວ ໄດ້ສະແດງຄວາມຊົມເຊີຍ ຍິນດີຕ້ອນຮັບ ແລະ ອວຍພອນຊຶ່ງກັນ ແລະ ກັນ ດ້ວຍໄມຕີຈິດມິດຕະພາບ ສະໜິດສະໜົມ. ສປປ ລາວ ແລະ ສສ ຫວຽດນາມ ເວົ້າລວມ ເວົ້າສະເພາະ ກໍຄືສອງອອປສ ແມ່ນມີມູນເຊື້ອ ສາຍພົວພັນ ຮ່ວມມືຮອບດ້ານນໍາກັນມາແຕ່ດົນນານ ແລະໄດ້ໃຫ້ການຊ່ວຍເຫຼືອຊຶ່ງກັນ ແລະ ກັນໂດຍດີຕະຫຼອດມາ. ພ້ອມທັງລາຍງານຂອບເຂດສິດ, ໜ້າທີ່, ພາລະບົດບາດວຽກງານຂອງຫ້ອງການໂດຍສັງເຂບໃຫ້ກັນຊາບ. ຕອນບ່າຍຂອງວັນດຽວກັນຄະນະຜູ້ແທນ ຫ້ອງການອອປສ ຂອງລາວ ກໍໄດ້ເຂົ້າພົບປະກັບຄະນະບັນນາທິການຂ່າວສານປົກປ້ອງກົດໜາຍ ຂອງອອປສ  ຫວຽດນາມ ຊຶ່ງນໍາໂດຍສະຫາຍ ຫງວຽນ ວັນຖັ້ງ ຫົວໜ້າບັນນາທິການຂ່າວສານປົກປ້ອງກົດໜາຍ,ຂະນະດຽວກັນຕ່າງຝ່າຍຕ່າງໄດ້ແນະນໍາ ປະຫວັດຄວາມເປັນມາຂອງການສ້າງຕັ້ງ ວາລະສານ, ຂ່າວໜັງສືພິມ, ຂ່າວທາງເອເລັກໂຕຣນິກ ແລະ ຂ່າວທາງໂທລະພາບ ລວມມີທັງຂໍ້ສະດວກ ແລະ ຂໍ້ຫຍຸ້ງຍາກໃຫ້ກັນ ແລະກັນຊາບ ຊຶ່ງສອງຄະນະວາລະສານພວກເຮົາຈະໄດ້ມີການແລກປ່ຽຮ່ວມມືນໍາກັນໄລຍະຕໍ່ໄປ ເປັນຕົ້ນແມ່ນການສ້າງພະນັກງານເຮັດວຽກງານນີ້ໂດຍສະເພາະ ພ້ອມທັງຈັດຝຶກອົບຮົມໃຫ້ແກ່ພະນັກງານ, ການສະໜອງເຄື່ອງມືທີ່ເປັນທັນສະໄໝ ໃນການພັດທະນາໃຫ້ສອງອົງການໄອຍະການ ລາວ-ຫວຽດນາມ ໃຫ້ມີຄວາມກ້າວຂຶ້ນ. ຄະນະຜູ້ແທນອອປສ ລາວ ຍັງໄດ້ເຂົ້າຢ້ຽມຊົມຫໍມູນເຊື້ອວັດຖຸພັນ ຊົມຮູບພາບການເຕີບໃຫຍ່ຂະຫຍາຍຕົວ ນັບແຕ່ມື້ສ້າງຕັ້ງ ແລະ ຜົນງານທີ່ໂດດເດັ່ນຂອງອອປສ ຫວຽດນາມ ມາຮອດປັດຈຸບັນ.
(ຂາວ: ວົງເດືອນ ສຸພັນທອງ-ພາບ: ແສງພະຈັນ ຄຳມະນີ)