ການເດີນທາງມາ ສປປ ລາວ ຂອງທ່ານນາງ ແຄັດເທີຣິນ ເວສທໃນຄັ້ງນີ້,ເປັນຂີດໝາຍອັນສຳຄັນໃນການເສີມຂະຫຍາຍສາຍພົວພັນແລະການຮ່ວມມືຂອງສອງປະເທດໃຫ້ມີບາດກ້າວໃໝ່.ໃນໂອກາດດັ່ງກ່າວ,ຄະນະຜູ້ແທນອັງກິດໄດ້ເຂົ້າພົບປະທ່ານນາງ ຟອງສະໝຸດ ອັ່ນລາວັນ ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ;ທັງສອງຝ່າຍໄດ້ຮ່ວມກັນປຶກສາຫາລືກ່ຽວກັບວິທີທາງຊຸກຍູ້ສົ່ງເສີມການພົວພັນຮ່ວມມືທີ່ດີໃນປັດຈຸບັນໃຫ້ເຂັ້ມແຂງແລະຂະຫຍາຍຕົວຍິ່ງໆຂຶ້ນໃນຕໍ່ໜ້າທັງໃນຂອບສອງຝ່າຍແລະຫຼາຍຝ່າຍ.ຄຽງຄູ່ກັນນັ້ນ,ກໍໄດ້ມີການແລກປ່ຽນທັດສະນະຕໍ່ສະພາບການພາກພື້ນແລະສາກົນທີ່ພົ້ນເດັ່ນທີ່ສອງຝ່າຍມີຄວາມສົນໃຈຮ່ວມກັນ. ໃນໂອກາດດຽວກັນນີ້,ຄະນະຜູ້ແທນອັງກິດໄດ້ເຂົ້າຮ່ວມພິທີລົງນາມບົດບັນທຶກຄວາມເຂົ້າໃຈ ວ່າດ້ວຍໂຄງການສ້າງຄວາມເຂັ້ມແຂງໃຫ້ແກ່ການບໍລິຫານການຂົນສົ່ງພາຍໃນຕົວເມືອງນະຄອນຫຼວງວຽງຈັນ.ຄະນະຜູ້ແທນດັ່ງກ່າວ,ຍັງໄດ້ມີໂອກາດໄປຢ້ຽມຢາມແລະ ພົບປະບັນດາອົງການທີ່ໄດ້ຮັບການສະໜັບສະໜູນຈາກລັດຖະບານອັງກິດ ເຊັ່ນ: ຄະນະກໍາມະການແມ່ນໍ້າຂອງ (MRC), ສູນເກັບກູ້ລະເບີດບໍ່ທັນແຕກ(UXO), ອົງການເກັບກູ້ລະເບີດ ແມັກ(MAG)ແລະອົງການເກັບກູ້ລະເບີດ ຮາໂລ ທຣັສ (HALO TRUST).
ໃນປີ2025ແມ່ນຄົບຮອບ 70 ປີ ແຫ່ງ ວັນສ້າງຕັ້ງສາຍພົວພັນການທູດ ລະຫວ່າງສປປລາວແລະສະຫະຣາຊະອານາຈັກອັງກິດແລະອຽກລັງເໜືອ,ສອງຝ່າຍໄດ້ມີການຈັດກິດຈະກໍາຮ່ວມກັນ ພ້ອມທັງມີແຜນການຈັດງານສະເຫຼີມສະຫຼອງວັນສໍາຄັນດັ່ງກ່າວໃນທ້າຍປີນີ້. ນັບຕັ້ງແຕ່ສອງປະເທດ ໄດ້ສ້າງຕັ້ງສາຍພົວພັນການທູດຮ່ວມກັນ ໃນວັນທີ 5ກັນຍາ1955ການພົວພັນຮ່ວມມືລະຫວ່າງ ສອງປະເທດແມ່ນມີທ່າກ້າວແລະຂະຫຍາຍຕົວດີຂຶ້ນໂດຍສະເພາະພາຍຫຼັງທີ່ຝ່າຍອັງກິດໄດ້ເປີດສະຖານທູດຂອງຕົນ ຢູ່ ນະຄອນຫຼວງວຽງຈັນ ຄືນໃໝ່ ໃນປີ 2012 ແລະ ຝ່າຍລາວ ກໍໄດ້ເປີດສະຖານທູດຄືນໃໝ່ ຢູ່ ລອນດອນ ໃນປີ 2014, ສປປ ລາວ ແລະອັງກິດໄດ້ມີການຮ່ວມມືທີ່ດີນໍາກັນທັງໃນຂອບສອງຝ່າຍແລະຫຼາຍຝ່າຍເຊັ່ນ: ວຽກງານສາທາລະນະສຸກ, ວຽກງານການສຶກສາ ແລະ ໂຄງການເກັບກູ້ລະເບີດ. ຄຽງຄູ່ກັນນັ້ນ, ກໍຍັງໃຫ້ການຊ່ວຍເຫຼືອໃນການຈັດຝຶກອົບຮົມສຳລັບຂະແໜງການຕ່າງໆ ຊຶ່ງເປັນການປະກອບສ່ວນທີ່ສຳຄັນເຂົ້າໃນການສ້າງສາພັດທະນາ ສປປລາວ. ນອກນັ້ນ, ມີການແລກປ່ຽນການຢ້ຽມຢາມຂອງຄະນະຜູ້ແທນລະຫວ່າງກະຊວງ-ຂະແໜງການຂອງສອງປະເທດຢ່າງເປັນປົກກະຕິ.
(ຂ່າວ-ພາບ: ກະຊວງການຕ່າງປະເທດ)
ຄໍາເຫັນ