ຮອງລັດຖະມົນຕີກະຊວງປ້ອງກັນປະເທດ ລົງຢ້ຽມຢາມກອງບັນຊາການທະຫານແຂວງບໍ່ແກ້ວ

ສະຫາຍ ພົນຕີ ຈັນທອງ ສອນຕະອາດ ຮອງລັດຖະມົນຕີກະຊວງປ້ອງກັນປະເທດ ພ້ອມດ້ວຍຄະນະ ໄດ້ລົງຢ້ຽມຢາມ ແລະ ເຮັດວຽກ ຢູ່ກອງບັນຊາການທະຫານແຂວງບໍ່ແກ້ວ ເມື່ອບໍ່ດົນມານີ້, ໂດຍການຕ້ອນຮັບຂອງ ສະຫາຍ ພົນຈັດຕະວາ ບຸນມີ ພາມີໄຊ ຄະນະປະຈຳພັກແຂວງ ເລຂາຄະນະພັກ ຫົວ
ໜ້າການເມືອງກອງບັນຊາການທະຫານແຂວງບໍ່ແກ້ວ.
ສະຫາຍ ພົນຈັດຕະວາ ບຸນມີ ພາມີໄຊ ໄດ້ລາຍງານໂດຍຫຍໍ້ໃນການປະຕິບັດໜ້າທີ່ວຽກງານທີ່ພົ້ນເດັ່ນຢ່າງຮອບດ້ານ ແລະ ເປັນຮູບປະທໍາຕົວຈິງ ຕາມທິດຊີ້ນໍາຂອງພັກ-ລັດ ໂດຍໄດ້ຖືເອົາວຽກງານສຶກສາ ອົບຮົມການເມືອງ-ນໍາພາແນວຄິດ, ໂດຍສະເພາະແມ່ນໄດ້ນໍາເອົາບັນດາມະຕິຄໍາສັ່ງ, ຂໍ້ກໍານົດລະບຽບ, ກົດໝາຍຂອງພັກ-ລັດ, ຂອງກອງທັບ, ຂອງກົມກອງມາຈັດຕັ້ງໂຄສະນາເຜີຍແຜ່ໃຫ້ບັນດາພະນັກງານ-ສະມາຊິກພັກ, ນັກຮົບໄດ້ຮັບຮູ້ເຂົ້າໃຈແຈ້ງ, ກໍາແໜ້ນຕໍ່ແນວທາງນະໂຍບາຍຂອງພັກ-ລັດ ເພື່ອໃຫ້ມີແນວຄິດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີສະຕິຕໍ່ການຈັດຕັ້ງສູງ ແລະ ມີແບບແຜນວິທີເຮັດວຽກທີ່ທັນສະໄໝ ພ້ອມກັນນັ້ນກໍໄດ້ເອົາໃຈໃສ່ຫັນລົງກໍ່ສ້າງຖານການເມືອງແບບມູນເຊື້ອ ຕາມ 4 ເນື້ອໃນ 4 ຄາດໝາຍ ແລະ ພັດທະນາຊົນນະບົດຮອບດ້ານຕາມທິດຊີ້ນໍາຂອງຂັ້ນເທີງ ເຮັດໃຫ້ຂອບເຂດຂອງກົມກອງຕັ້ງທັບຢູ່ມີຄວາມສະຫງົບປອດໄພໂດຍພື້ນຖານ.    ການລົງຢ້ຽມຢາມ ແລະ ເຮັດວຽກໃນຄັ້ງນີ້ ສະຫາຍ ພົນຕີ ຈັນທອງ ສອນຕະອາດ  ພ້ອມດ້ວຍຄະນະ ຍັງໄດ້ລົງກວດກາ, ຢ້ຽມຢາມເບິ່ງການຈັດຕັ້ງປະຕິບັດໂຄງການກໍ່ສ້າງສໍານັກງານກອງບັນຊາການທະຫານແຂວງບໍ່ແກ້ວຫຼັງໃໝ່ (ຄ້າຍປ່າໄລ່), ຕັ້ງຢູ່ບ້ານປ່າອ້ອຍ ເມືອງຫ້ວຍຊາຍ ແຂວງບໍ່ແກ້ວ ມີເນື້ອທີ່ທັງໝົດ (350x450 ແມັດ) ເທົ່າກັບ 15 ເຮັກຕາ ປະກອບມີ 10 ແຜນວຽກ. ໂຄງການດັ່ງກ່າວໄດ້ຮັບອະນຸມັດເຂົ້າໃນແຜນການລົງທຶນຂອງລັດ ສົກປີ 2013-2014, ເປັນໂຄງການ ປະເພດ I, ລວມມູນຄ່າໂຄງການ 66.606 ລ້ານກີບ ໃນສົກປີ 2018-2022 ໂຄງການປະຕິບັດໄດ້ 65,83%, ຈົນມາເຖິງປັດຈຸບັນບໍລິສັດໄດ້ສືບຕໍ່ສຸມໃສ່ກໍ່ສ້າງບັນດາໜ້າວຽກທີ່ຍັງຄົງຄ້າງຢູ່ໃນຕຶກໃຫຍ່ຫ້ອງການ ສາມາດປະຕິບັດໜ້າວຽກໄດ້ 11,68% ຊຶ່ງມີບັນດາໜ້າວຽກທີ່ປະຕິບັດໄດ້ຄື: ອະນາໄມສະຖານທີ່, ເດີນລະບົບນໍ້າ-ລະບົບໄຟພາຍໃນອາຄານ, ວຽກຕິດຕັ້ງເພດານ, ທາສີຮອງພືນ, ປັບປຸງແປງຮອງລະບາຍນໍ້າອ້ອມອາຄານ ແລະ ເທກັນເປື້ອນອ້ອມອາຄານ.
ສະຫາຍ ພົນຕີ ຈັນທອງ ສອນຕະອາດ  ໄດ້ມອບເຄື່ອງກິລາຈຳນວນໜຶ່ງ ແລະ ທ່ານ ອຸທິດ ນັນທະວົງ ປະທານບໍລິສັດ ເອັນທີວີ ( NTV) ໄດ້ມອບເງິນຈຳນວນ 150.000.000 ກີບ ໃຫ້ກອງບັນຊາການທະຫານເມືອງເມິງ ແຂວງບໍ່ແກ້ວ ເພື່ອເປັນການປະກອບສ່ວນສຸກຍູ້ເຂົ້າໃນວຽກງານການເຄື່ອນໄຫວຕ່າງໆ ແລະ ກິດຈະກຳກິລາຂອງກອງບັນຊາການທະຫານແຂວງບໍ່ແກ້ວຕື່ມອີກ.
ໃນໂອກາດນີ້, ສະຫາຍ ພົນຕີ ຈັນທອງ ສອນຕະອາດ ໄດ້ຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາ ພ້ອມຮຽກຮ້ອງໃຫ້ ຄະນະພັກ - ຄະນະບັນຊາ ສືບຕໍ່ເອົາໃຈໃສ່ສຶກສາອົມຮົມ ການເມືອງ - ນໍາພາແນວຄິດໃຫ້ ພະນັກງານ - ນັກຮົບ ແລະ ຫັນລົງກໍ່ສ້າງຮາກຖານການເມືອງແບບມູນເຊື້ອ ເພີ່ມທະວີຄວາມສາມັກຄີພາຍໃນໃຫ້ໜັກແໜ້ນ ຕິດພັນກັບປັບປຸງເຮັດໜ້າທີ່ວຽກງານວິຊາສະເພາະ ກໍຄືໜ້າທີ່ການເມືອງຂອງກົມກອງໃຫ້ໄດ້ຮັບຜົນສໍາເລັດສູງ ເພື່ອພັດທະນາກົມກອງໃຫ້ມີຄວາມເຂັ້ມແຂງ ແລະ ມີແບບແຜນທັນສະໄໝ.
ຂ່າວ: ຮ້ອຍຕີ ວໍລະສິດ ພິດສະຫາຍ, ພາບ: ຮ້ອຍເອກ ນາງ ສົມສະນິດ ໄຊຍະລາດ.