ໃນນັ້ນ, ຢາງພາລາເປັນຕົ້ນໄມ້ ອຸດສາຫະກຳຊະນິດໜຶ່ງ ທີ່່ປະຊາຊົນນິຍົມກັນປູກຫຼາຍ ເພື່ອນຳເອົານ້ຳຢາງພາລາ ໄປແປຮູບເປັນຜະລິດຕະພັນ, ສ່ວນລຳຕົ້ນເມື່ອໝົດອາຍຸ 30-40 ປີ ກໍນຳໄປເຂົ້າເຟີນິເຈິ ເພື່ອແປຮູບເປັນຜະລິດຕະພັນອື່ນໆ. ການປູກຢາງພາລາ ໃນປັດຈຸບັນ ໄດ້ມີການຂະຫຍາຍຕົວຢ່າງກວ້າງຂວາງ ເນື່ອງຈາກຄວາມຕ້ອງການ ຂອງຕະຫຼາດຢາງພາລາ ຢູ່ໃນໂລກ ທີ່ສົ່ງຜົນໃຫ້ມີຄວາມຕ້ອງການຢາງພາລາເພີ້ມຂຶ້ນ ແລະ ລາຄາກໍສູງຂຶ້ນພ້ອມໆກັນ. ຕົ້ນຢາງພາລາ ຍັງຊ່ວຍຮັກສາລະບົບນິເວດ ຂອງທຳມະຊາດ ດ້ວຍການປົກຫຸ້ມເນື້ອທີ່ຂອງປ່າ. ການປູກຢາງພາລາ ຢູ່ແຂວງ ອຸດົມໄຊປັດຈຸບັນມີເນື້ອທີ່ 29 ພັນກວ່າເຮັກຕາ ໄດ້ກາຍເປັນທ່າແຮງ ທີ່ສຳຄັນໃນການພັດທະນາເສດຖະກິດ-ສັງຄົມຂອງແຂວງເວົ້າລວມ ເວົ້າສະເພາະການພັດທະນາ ຊີວິດການເປັນຢູ່ຂອງປະຊາຊົນ ນັບມື້ດີຂຶ້ນເປັນກ້າວໆ. ພາຍໃຕ້ການຊີ້ນຳ-ນຳພາ ຂອງອົງຄະນະພັກແຂວງ, ກໍຄືຄວາມເອົາໃຈໃສ່ໃກ້ຊິດຕິດແທດ ຂອງບັນດາຂະແໜງການທີ່ກ່ຽວຂ້ອງ ໃນການຊຸກຍູ້ ສົ່ງເສີມການປູກຢາງພາລາ ຕົ້ນໄມ້ອຸດສາຫະກຳມາທົດແທນການຖ່າງປ່າເຮັດໄຮ່ ໃນໄລຍະຜ່ານມາ ແລະ ຫັນມາປູກຢາງພາລາ ໃຫ້ກາຍເປັນສິນຄ້າ ທີ່ສາມາດສ້າງລາຍໄດ້ຫຼັກໃຫ້ພໍ່ແມ່ປະຊາຊົນ.
ບໍລິສັດ ຈົງອູຢາງພາລາຈຳກັດ ເປັນບໍລິສັດໜຶ່ງທີ່ລົງທຶນປູກຢາງພາລາ ໂດຍການສົ່ງເສີມປະຊາຊົນປູກ ໃນເນື້ອທີ່ 5 ພັນກວ່າເຮັກຕາ ພ້ອມທັງສ້າງຕັ້ງໂຮງງານປຸງແຕ່ງນ້ຳຢາງພາລາ ຈົງອູອຸດົມໄຊ ຈຳກັດ ຜູ້ດຽວ ເພື່ອຜະລິດຢ່າງພາລາເຄິ່ງສຳເລັດຮູບສົ່ງອອກ. ໂຮງງານຕັ້ງຢູ່ບ້ານກໍນ້ອຍ ເມືອງໄຊ ແຂວງອຸດົມໄຊ.
ທ່ານ ເຊີງຢົງຟູ ອຳນວຍການໂຮງງານປຸງແຕ່ງນໍ້າຢາງພາລາຈົງອູ ອຸດົມໄຊ ຈໍາກັດ ຜູ້ດຽວ ໄດ້ໃຫ້ສຳພາດວ່າ: ເລີ່ມແຕ່ປີ 2004 ບໍລິສັດຈົງອຸຢາງພາລາໄດ້ມາລົງທຶນໃນການປູກຢາງພາລາຢູ່ແຂວງອຸດົມໄຊ ໂດຍເປັນໂຄງການປູກພືດເພື່ອທົດແທນການປູກຝິ່ນ, ບໍລິສັດຈົງອູຢາງພາລາ ແມ່ນບໍລິສັດທີ່ລັດຖະບານ ສປປ ລາວ ແລະ ສປ ຈີນ ໄດ້ຮ່ວມມື ແລະ ສົ່ງເສີມການລົງທຶນ, ບໍລິສັດ ຈົງອູຢາງພາລາ ໄດ້ປູກຢາງພາລະ ແລະ ສົ່ງເສີມປະຊາຊົນປູກ ໃນເນື່ອທີ່ 5 ພັນກວ່າເຮັກຕາ. ໃນນີ້, ສະເພາະບໍລິສັດປູກເອງມີເນື້ອທີ່ 2 ພັນກວ່າເຮັກຕາ. ຜ່ານການລົງທຶນ ແລະ ຈັດຕັ້ງປະຕິບັດຜ່ານມາ ປະຊາຊົນໄດ້ໃຫ້ຄວາມຮ່ວມມືກັບບໍລິສັດເປັນຢ່າງດີໃນການປູກຢາງພາລາ ແລະ ນຳເອົານ້ຳຢາງພາລາມາຂາຍໃຫ້ບໍລິສັດ ສະເລຍແຕ່ລະຄອບຄົວ ມີລາຍຮັບ 20ລ້ານກີບຂຶ້ນໄປ ຕໍ່ຄອບຄົວ. ຊຶ່ງໄດ້ເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນ ສາມາດສ້າງພື້ນຖານໂຄ່ງລ່າງ, ເຮືອນຢູ່ອາໃສ ແລະ ສົງລູກຫຼານເຂົ້າໂຮງຮຽນໄດ້ຫຼາຍຂຶ້ນ,
ບໍລິສັດ ຈົງອູຢາງພາລາ ໄດ້ສົ່ງເສີມການປູກຢາງພາລາ ໃນຂອບເຂດເມືອງໄຊ ພ້ອມທັງເກັບຊື້ນ້ຳຢາງພາລາ ເພື່ອປ້ອນໂຮງງານ ຜະລິດເປັນຢາງພາລາເຄິ່ງສຳເລັດຮູບເພື່ອສົ່ງອອກ ໃນປີ 2023 ໂຮງງານໄດ້ເກັບຊື້ຢາງພາລາດິບທັງໝົດ 27 ພັນກວ່າໂຕນ ແລະ ສາມາດຜະລິດເປັນຢາງພາລາເຄິ່ງສຳເລັດຮູບໄດ້ທັງໝົດ 13,500 ໂຕນ ແລະ ໄດ້ສົ່ງອອກໄປ ສປ ຈີນ 13,000 ໂຕນ, ຂະບວນການສົ່ງອອກແມ່ນບັນຈຸໃສ່ຕູ້ຄອນເທັນເນີ ຂົນສົ່ງຜ່ານທາງລົດໄຟ.
ຄຽງຄູ່ກັບການສົ່ງເສີມປະຊາຊົນປຸກຢາງພາລາ, ເກັບຊື້ນ້ຳຢາງພາລາ ແລະ ຜະລິດຢາງພາລາເຄິ່ງສຳເລັດຮູບເພື່ອສົ່ງອອກ ບໍລິສັດຈົງອູຢ່າງພາລາ ກໍໄດ້ສ້າງສູນເຝິກອົບຮົມເພື່ອຝຶກອົບຮົມເຕັກນິກ ແລະ ທັກສະດ້ານຕ່າງໆໃຫ້ຊາວສວນຢາງພາລາ ແລະ ໄດ້ເອົາໃຈໃສ່ໃນການປະກອບສ່ວນຊ່ວຍເຫຼືອສັງຄົມຂອງແຂວງອຸດົມໄຊ ໄດ້ຢ່າງຫຼວງຫຼາຍບໍ່ວ່າຈະເປັນໄພພິບັດນ້ຳຖ້ວມ, ການສຶກສາ, ການແກ້ໄຂບັນຫາຢາເສບຕິດ ແລະກິດຈະກຳສຳຄັນຕ່າງໆຂອງແຂວງອຸດົມໄຊຈັດຂື້ນ. ຕະຫຼອດໄລຍະຜ່ານມາກໍໄດ້ມີການນໍາລະດັບຕ່າງໆໄດ້ເດີນທາງທ່ຽວຊົມ ແລະ ຢ້ຽມຢາມໂຮງງານປຸງແຕ່ງນ້ຳຢາງພາລາ ຈົງອູ ອຸດົມໄຊ ເປັນປະຈຳ.
ການປູກຢາງພາລາ ກໍ່ແມ່ນໂຄງການໜຶ່ງ ໃນການສົ່ງເສີີມ ການປູກຕົ້ນໄມ້ ອຸດສະຫະກຳ ທີ່ສາມາດຜະລິດ ເປັນສິນຄ້າ ສ້າງລາຍຮັບໃຫ້ປະຊາຊົນ ຈຳນວນຫຼວງຫຼາຍ ພ້ອມທັງຊ່ວຍປັບປຸງ ຊີວິດການເປັນຢູ່, ແກ້ໄຂຄວາມທຸກຍາກ ແລະ ພັດທະນາເສດຖະກິດຄອບຄົວຂອງປະຊາຊົນໃຫ້ນັບມື້ດີຂຶ້ນ.
(ໂດຍ: ຄຳພູສະຫວັນ ເພັນສະຫວັດ)
ຄໍາເຫັນ