ທ່ານ ນາງ ສົມພອນ ບູ່ພະລາ ຮອງຫົວໜ້າຫ້ອງວ່າການແຂວງໄດ້ຜ່ານບົດສະຫຼຸບແຂ່ງຂັນຍ້ອງຍໍຮັກຊາດ ແລະ ພັດທະນາ 2024 ແລະ ທິດທາງແຜນ 2025 ຊຶ່ງໄດ້ຍົກໃຫ້ເຫັນວ່າ: ພະນັກງານ-ລັດຖະກອນໄດ້ປະຕິບັດເນື້ອໃນຄຳຂວັນເປັນເສນາທິການທີ່ດີມີຄວາມຮັບຜິດຊອບສູງ ບໍລິການວ່ອງໄວທັນສະໄໝ ແລະ ຕອບສະໜອງຂໍ້ມູນທັນເວລາໂດຍຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາຂອງແຂວງ. ການຜັນຂະຫຍາຍວຽກງານສາມສ້າງເຂົ້າສູ່ລວງເລິກໃນຂອບເຂດທົ່ວແຂວງ, ຕະຫຼອດ 1 ປີຜ່ານມາ ແຕ່ລະສະຫາຍມີຄຸນທາດການເມືອງໜັກແໜ້ນ ມີຄຸນສົມບັດສິນທຳປະຕິວັດ ແລະ ມີທັດສະນະມະຫາຊົນກ້ວງຂວາງ, ບໍ່ສ້າງກຸ່ມກ້ອນ, ພັກພວກ, ແຕ່ລະສະຫາຍມີສະຕິເຄົາລົບ, ນັບຖືການຈັດຕັ້ງ ແລະ ປະຕິບັດລະບຽບກົດໝາຍລັດຖະກອນໄດ້ດີ, ມີຜົນສຳເລັດເປັນກ້າວໆ. ຈາກນັ້ນ, ທ່ານ ບົວເງິນ ຫຸມໄຊຍະພົມ ໄດ້ໃຫ້ກຽດປະດັບຫຼຽນກາລະນຶກ 70 ປີ ໃຫ້ 3 ທ່ານ, ໃບຍ້ອງຍໍຂັ້ນແຂວງ 63 ທ່ານ, ໃບຍ້ອງຍໍຫ້ອງວ່າການແຂວງ 2 ທ່ານ. ໂອກາດນີ້, ທ່ານ ຍັງໄດ້ເນັ້ນໃຫ້ເອົາໃຈໃສ່ກໍ່ສ້າງພະນັກງານໃຫ້ມີສະຕິຕໍ່ກົດລະບຽບກົດໝາຍຂອງພັກ-ລັດ, ສ້າງເສດຖະກິດຄອບຄົວ, ຜັນຂະຫຍາຍວຽກງານແຂ່ງຂັນເຂົ້າໃນການຈັດຕັ້ງປະຕິບັດໜ້າທີ່ວຽກງານວິຊາສະເພາະ, ມີສະຕິທາງດ້ານການເມືອງຢ່າງໜັກແໜ້ນ, ເປັນແບບຢ່າງນຳໜ້າ, ກວດກາຕິດຕາມຊຸກຍູ້ເປັນປົກກະຕິ, ສ້າງຂະບວນການຢູ່ບັນດາອົງການຈັດຕັ້ງມະຫາຊົນໃຫ້ເຂັ້ມແຂງ, ຍົກສູງວຽກງານການລົງກໍ່ສ້າງຮາກຖານການເມືອງແນວຄິດ, ການແກ້ໄຂຄວາມທຸກຍາກ, ປະຕິບັດໜ້າທີ່ການເມືອງໜັກແໜ້ນ, ສືບຕໍ່ຮັກສາມູນເຊື້ອ ແລະ ເສີມຂະຫຍາຍວຽກງານແຂ່ງຂັນຍ້ອງຍໍໃຫ້ມີຜົນສຳເລັດຢ່າງໃຫຍ່ຫຼວງ.
(ຂ່າວ: ບຸນມີແສງທຸມມີ)
ຄໍາເຫັນ