ທ່ານ ນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ ໄດ້ຕ້ອນຮັບ ທ່ານ ຟີໂລເມໂນ ອາເລໂຊ ດາ ຄຣີວ (Filomeno Alexo Da Criuz) ເອກອັກຄະລັດຖະທູດ ແຫ່ງ ສາທາລະນະລັດ ປະຊາທິປະໄຕ ຕີມໍແລັດສະເຕ ປະຈຳລາວ ເຂົ້າຢ້ຽມຂໍ່ານັບອໍາລາ ໃນວັນທີ 24 ມິຖຸນານີ້ ທີ່ທຳນຽບປະທານປະເທດ, ເນື່ອງໃນໂອກາດທີ່ທ່ານທູດສຳເລັດການປະຕິບັດໜ້າທີ່ການທູດ ປະຈຳ ລາວ; ໃນໂອກາດດັ່ງກ່າວ ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມຕ້ອນຮັບເຊີຍ ແລະ ຕີລາຄາສູງ ຕໍ່ທ່ານ Filomeno Alexo Da Criuz ທີ່ສຳເລັດການປະຕິບັດໜ້າທີ່ການທູດ ປະຈຳລາວ ໃນຄັ້ງນີ້, ຕະຫຼອດໄລຍະການປະຕິບັດໜ້າທີ່ທ່ານທູດໄດ້ເອົາໃຈໃສ່ຢ່າງຕັ້ງໜ້າໃນການປະກອບສ່ວນເຂົ້າໃນການເສີມຂະຫຍາຍການພົວພັນຮ່ວມມື ແລະ ຊ່ວຍເຫຼືອຊຶ່ງກັນ ແລະ ກັນ ລະຫວ່າງ ສປປ ລາວ - ສາທາ ລະນະລັດ ປະຊາທິປະໄຕ ຕີມໍແລັດສະເຕ ທີ່ມີມູນເຊື້ອມາແຕ່ດົນນານແລ້ວນັ້ນໃຫ້ນັບມື້ແຕກດອກອອກຜົນຍິ່ງໆຂຶ້ນ, ທ່ານຮອງປະທານປະເທດ ຍັງໄດ້ອວຍພອນໃຫ້ທ່ານທູດຈົ່ງເດີນທາງກັບຄືນປະເທດ ດ້ວຍຄວາມສະຫວັດດີພາບ ແລະ ປະສົບຜົນສຳເລັດໃນໜ້າທີ່ໃໝ່ທີ່ມີກຽດຂອງທ່ານ.
ທ່ານ Filomeno Alexo Da Criuz ໄດ້ສະແດງຄວາມຂອບໃຈຕໍ່ ທ່ານຮອງປະທານປະເທດ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ສະແດງຄວາມຂອບໃຈ ຕໍ່ການຈັດຕັ້ງທຸກພາກສ່ວນ ຂອງ ສປປ ລາວ ທີ່ໄດ້ໃຫ້ການຮ່ວມມື ແລະ ອຳນວຍຄວາມສະດວກທຸກຢ່າງຕະຫຼອດໄລຍະການປະຕິບັດໜ້າທີ່ ຈົນໄດ້ຮັບຜົນສຳເລັດໃນການປະຕິບັດໜ້າທີ່ໃນຄັ້ງນີ້.
ລາວ - ຕີມໍແລັດສະເຕ ສ້າງຕັ້ງສາຍພົວພັນການທູດນຳກັນໃນວັນທີ 29 ກໍລະກົດ 2002 (ຄົບຮອບ 23 ປີ), ຕະຫຼອດໄລຍະ 23 ປີຜ່ານມາ ເຫັນວ່າສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ແມ່ນຢູ່ໃນລະດັບປົກກະຕິດີ. ເຖິງວ່າລະດັບການພົວພັນຂອງສອງປະເທດຍັງບໍ່ທັນສະໜິດແໜ້ນ ແລະ ກວ້າງຂວາງເທົ່າທີ່ຄວນ ເມື່ອທຽບໃສ່ການພົວພັນ ລະຫວ່າງ ສປປ ລາວ ກັບປະເທດອື່ນໆໃນອາຊຽນ, ແຕ່ກໍເຫັນວ່າມີຄວາມພະຍາຍາມໃນການປັບປຸງຮ່ວມກັນເພື່ອເສີມຂະຫຍາຍການພົວພັນສອງຝ່າຍໃຫ້ຂະຫຍາຍຕົວເປັນກ້າວໆ.
(ຂ່າວ-ພາບ: ສຳນານ)
ຄໍາເຫັນ