ຮ່ວມພັດທະນາ ເພື່ອສະໜອງອາຫານແຊ່ແຂງ, ອາຫານສົດ ແລະ ສິນຄ້າທີ່ມີຄຸນນະພາບ

ພິທີເຊັນສັນຍາການຮ່ວມມືລະຫວ່າງບໍລິສັດຕະຫຼາດລາວຂາຍຍົກ - ຂາຍຍ່ອຍ ຈຳກັດ (ກຸ່ມບໍລິສັດໂຄລາວ) ກັບ ບໍລິສັດ ວຽງຈັນສາງເຢັນ ຈຳກັດ ໄດ້ຈັດຂຶ້ນຫວ່າງບໍ່ດົນມານີ້ ທີ່ສຳນັກງານໃຫຍ່ ກຸ່ມບໍລິສັດ ໂຄລາວ ໂດຍການລົງນາມຂອງທ່ານນາງ ຖາວອນ ວົງສົມບັດ ປະທານກຸ່ມບໍລິສັດ ໂຄລາວ ຈຳກັດ ກັບທ່ານ ສົມຈິດ ຈັນປະດິດ ປະທານບໍລິສັດ ວຽງຈັນສາງເຢັນ ຈຳກັດ; ເຂົ້າຮ່ວມເປັນສັກຂີພິຍານໂດຍທ່ານ ຄຳຂັນ ນະພາວົງ ຮອງປະທານໃຫຍ່ກຸ່ມບໍລິສັດໂຄລາວ, ທ່ານນາງ ລາລີວອນ ສີພັນດອນ ຜູ້ອຳນວຍການບໍລິສັດ ສາງເຢັນ ຈຳກັດ ພ້ອມດ້ວຍບັນດາຜູ້ບໍລິຫານທັງ 2 ພາກສ່ວນເຂົ້າຮ່ວມ.

ການຮ່ວມມືຄັ້ງນີ້ຖືເປັນອີກບາດກ້າວສຳຄັນທີ່ຊ່ວຍເສີມຄວາມແຂງແກ່ງຂອງທັງສອງຝ່າຍໃນດ້ານດຳເນີນກິດຈະການສາງເຢັນ ແລະ ໂຮງງານປຸງແຕ່ງອາຫານສົດທີ່ມີມາດຕະຖານສາກົນ ເພື່ອສະໜອງອາຫານແຊ່ແຂງ, ອາຫານສົດ, ອາຫານປຸງແຕ່ງທັງພາຍໃນ ແລະ ສົ່ງອອກຕ່າງປະເທດ ໂດຍຜ່ານລະບົບຕ່ອງໂສ້ການສະໜອງແບບປະສົມປະສານມີປະສິດທິພາບໂດຍມີເປົ້າໝາຍເພື່ອສົ່ງມອບສິ່ງທີ່ດີທີ່ສຸດໃຫ້ກັບລູກຄ້າ ແລະ ພັນທະມິດທຸກພາກສ່ວນ ຊຶ່ງຖືເປັນການປະກອບສ່ວນສຳຄັນໃນການຊຸກຍູ້ການຜະລິດພາຍໃນເພື່ອທົດແທນການນຳເຂົ້າ ແລະ ສົ່ງອອກເປັນສິນຄ້າໃຫ້ຫຼາຍຂຶ້ນຕາມນະໂຍບາຍຂອງພັກ ແລະ ລັດຖະບານ.

ບໍລິສັດ ວຽງຈັນສາງເຢັນ ຈຳກັດ ແມ່ນຜູ້ນຳດ້ານການບໍລິການຄັງສິນຄ້າ ແລະ ໂລຈິສຕິກ ຄວບຄຸມອຸນຫະພູມ ຊຶ່ງມຸ່ງໝັ້ນສົ່ງມອບບໍລິການທີ່ດີທີ່ສຸດສຳລັບສິນຄ້າທີ່ຕ້ອງການຄວາມສົດໃໝ່ ແລະ ປອດໄພບໍ່ວ່າຈະເປັນສິນຄ້າກະສິກຳ, ອາຫານປຸງແຕ່ງລວມເຖິງບໍລິການສຳລັບກຸ່ມໂຮງແຮມ, ຮ້ານອາຫານ. ບໍລິສັດ ໄດ້ມີວິໄສທັດໃນການເປັນຜູ້ນຳດ້ານ (Cold Chain Logistics) ຂອງ ສປປ ລາວ. ດັ່ງນັ້ນ ບໍລິສັດ ວຽງຈັນສາງເຢັນ ຈຶ່ງເປັນອີກໜຶ່ງແຮງຂັບເຄື່ອນສຳຄັນທີ່ຊ່ວຍໃຫ້ພາກທຸລະກິດສາມາດສົ່ງມອບສິນຄ້າທີ່ມີຄຸນນະພາບເຖິງມືຜູ້ບໍລິໂພກໄດ້ຢ່າງໝັ້ນໃຈ.

ບໍລິສັດຕະຫຼາດລາວຂາຍຍົກ-ຂາຍຍ່ອຍ ຕັ້ງຢູ່ບ້ານສະພັງເມິກ ເມືອງໄຊທານີ ນະຄອນຫຼວງວຽງຈັນ ເປັນຕະຫຼາດຂາຍຍົກ-ຂາຍຍ່ອຍໃຫຍ່ທີ່ສຸດແຫ່ງໜຶ່ງໃນນະຄອນຫຼວງວຽງຈັນ ຊຶ່ງມີສິນຄ້າຫຼາກຫຼາຍຈາກຜູ້ຜະລິດທົ່ວທຸກພາກຂອງປະເທດ ແລະ ສິນຄ້ານຳເຂົ້າໃຫ້ລູກຄ້າເລືອກຊື້ເລືອກໃຊ້ຕາມໃຈມັກມາບ່ອນດຽວໄດ້ຄົບຈົບທຸກຢ່າງ.