ຫົວໜ້າ ຄອສພ ເຄື່ອນໄຫວຊຸກຍູ້ການປັບປຸງກົງຈັກການຈັດຕັ້ງຢູ່ແຂວງສາລະວັນ

ພາຍຫຼັງທ່ານນາງ ບຸນທະວີ ດວງລາສີ ໄດ້ມີຄຳເຫັນກ່າວຕ້ອນຮັບ ແລະ ລາຍງານສະພາບການຈັດຕັ້ງປະຕິບັດພາລະບົດບາດ, ສິດ, ໜ້າທີ່ຂອງຄະນະປັບປຸງກົງຈັກການຈັດຕັ້ງຂັ້ນແຂວງໂດຍຫຍໍ້. ຈາກນັ້ນ, ທ່ານ ຈັນສະໝອນ ພົມມະແສງ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງໄດ້ລາຍງານການເຄື່ອນໄຫວ ວຽກງານໂຄສະນາອົບຮົມແຂວງ ແລະ ການໂອນວຽກຖະແຫຼງຂ່າວ-ສື່ມວນຊົນຈາກພະແນກຖະແຫຼງຂ່າວ, ວັດທະ ນະທຳ ແລະ ທ່ອງທ່ຽວແຂວງ ມາຂຶ້ນກັບຄະນະໂຄສະນາອົບຮົມແຂວງ, ດ້ານກົງຈັດການຈັດຕັ້ງ, ພາລະບົດບາດ ແລະ ສະພາບແນວຄິດຂອງພະນັກງານ-ລັດຖະກອນພາຍຫຼັງມອບໂອນ. ຕໍ່ກັບການມອບໂອນວຽກງານດັ່ງກ່າວ ພາຍຫຼັງມີມະຕິຂອງຄະນະບໍລິຫານງານສູນກາງພັກ ສະບັບເລກທີ 03/ຄບສພ, ລົງວັນທີ 12 ມີນາ 2025 ວ່າດ້ວຍການປັບປຸງກົງຈັກການຈັດຕັ້ງ, ມະຕິສະພາແຫ່ງຊາດ ສະບັບເລກທີ 05/ສພຊ, ລົງວັນທີ 20 ມີນາ 2025 ວ່າດ້ວຍການຮັບຮອງເອົາການປັບປຸງກົງຈັກການຈັດຕັ້ງຂອງລັດຖະບານ ແລະ ຄຳແນະນຳຂອງຄະນະເລຂາທິການສູນກາງພັກສະບັບເລກທີ 483/ຄລສພ, ລົງວັນທີ 27 ມີນາ 2025 ກ່ຽວກັບການປັບປຸງກົງຈັກການຈັດຕັ້ງ. ຄະນະໂຄສະ ນາອົບຮົມແຂວງໄດ້ຈັດຕັ້ງເຜີຍແຜ່, ເຊື່ອມຊຶມບັນດານິຕິກຳຕ່າງໆຂອງສູນກາງ ແລະ ຂອງແຂວງກ່ຽວກັບການປັບ ປຸງກົງຈັກການຈັດຕັ້ງໃຫ້ສະມາຊິກພັກ, ພະນັກງານ-ລັດຖະກອນພາຍໃນພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ ແລະ ຄະນະໂຄສະນາອົບຮົມແຂວງ ພ້ອມທັງສຶກສາອົບຮົມການເມືອງ-ແນວຄິດໃຫ້ພະນັກງານ, ສະມາຊິກພັກມີຄວາມຮັບຮູ້ ເຂົ້າໃຈເຫດຜົນ ແລະ ຄວາມຈຳເປັນຂອງການປັບປຸງກົງຈັກການຈັດຕັ້ງໃນຄັ້ງນີ້ ພ້ອມນັ້ນ, ໄດ້ເກັບກຳຂໍ້ມູນກ່ຽວກັບບຸກຄະລາກອນ ລວມທັງກົງຈັກການຈັດຕັ້ງພັກ-ລັດ, ອົງການຈັດຕັ້ງມະຫາຊົນ ແລະ ຂໍ້ມູນຕຶກ-ອາຄານ, ທີ່ດິນ, ອຸປະກອນ, ພາຫະນະ, ງົບປະມານຂອງລັດຂອງພະແນກຖະແຫຼງຂ່າວ, ວັດທະ ນະທຳ ແລະ ທ່ອງທ່ຽວແຂວງ ແລະ ຄະນະໂຄສະນາອົບຮົມແຂວງເພື່ອສຳເລັດຕາມຄາດໝາຍທີ່ວາງໄວ້.

ໂອກາດນີ້, ທ່ານ ຄໍາພັນ ເຜີຍຍະວົງ ໄດ້ຕີລາຄາສູງ ແລະ ສະແດງຄວາມຊົມເຊີຍຕໍ່ການຈັດຕັ້ງປະຕິ ບັດວຽກງານການມອບໂອນໃນຄັ້ງນີ້ ເພື່ອໃຫ້ເປັນອັນໜຶ່ງອັນດຽວກັນໃນການຈັດຕັ້ງປະຕິບັດໜ້າທີ່ການເມືອງ ເຮັດໃຫ້ການຈັດຕັ້ງມີຄວາມໂປ່ງໃສ ໂລ່ງລ່ຽນ ເຮັດໃຫ້ກົງຈັກຄືຮູບທາດ ຈຶ່ງຈະມີຄວາມໜັກແໜ້ນເຂັ້ມແຂງ.

ຊຶ່ງໃນໄລຍະຜ່ານມາເຫັນວ່າ: ການປະຕິບັດຕາມພາລະບົດບາດມີຜົນສໍາເລັດຫຼາຍດ້ານ ແລະ ການກະ ກຽມມອບ-ໂອນວຽກງານໃນຄັ້ງນີ້ ແມ່ນການປະຕິບັດຕາມແນວທາງຂອງພັກ-ລັດ ເພື່ອສ້າງຄວາມເຂົ້າໃຈເປັນເອກະພາບ ແລະ ຄວາມພ້ອມຮອບດ້ານ ເພື່ອຮັບປະກັນເຮັດໃຫ້ການໂຮມວຽກງານບັນລຸຕາມຈຸດປະສົງ ແລະ ລະດັບຄາດໝາຍ. ຮຽກຮ້ອງໃຫ້ຄະນະນໍາເຮັດໜ້າທີ່ສຶກສາອົບຮົມການເມືອງ-ແນວຄິດ ສ້າງຄວາມເຂົ້າໃຈທີ່ຖືກຕ້ອງເປັນເອກະພາບໃຫ້ພະນັກງານ-ສະມາຊິກພັກ ແລະ ບັນດາຫ້ອງການຂັ້ນເມືອງ; ພ້ອມນີ້, ສະມາຊິກພັກ-ພະນັກງານທຸກຄົນຂໍໃຫ້ມີຄວາມອຸ່ນອ່ຽງທຸ່ນທ່ຽງ ເຊື່ອໝັ້ນຕໍ່ການນໍາພາຂອງພັກ ແລະ ໃຫ້ການຮ່ວມມືເພື່ອເຮັດໃຫ້ການປັບປຸງສໍາເລັດຕາມແຜນການວາງໄວ້ ຊຶ່ງການສັບຊ້ອນຈັດວາງແມ່ນໃຫ້ເອົາໃຈໃສ່ປະຕິບັດຕາມລະບຽບ, ຫຼັກການ ແລະ ທິດຊີ້ນຳຂອງຂັ້ນເທິງ; ໃຫ້ສືບຕໍ່ປັບປຸງແບບແຜນວິທີເຮັດວຽກ ຖອດຖອນເອົາບົດຮຽນອັນດີຂອງກັນ ແລະ ກັນ ສືບຕໍ່ປະຕິບັດໃຫ້ດີຂຶ້ນ, ມີປະສິດທິພາບສູງ ຮັບປະກັນຄວາມວ່ອງໄວທັນການ. ພາຍຫຼັງໂຮມເຂົ້າກັນແລ້ວແມ່ນໃຫ້ຄົ້ນຄວ້າຈັດສັນຄືນໃໝ່ດ້ານບຸກຄະລາກອນ, ອຸປະກອນໃຫ້ສົມຄູ່ກັບໜ້າທີ່ ແລະ ຄວາມຕ້ອງການນໍາໃຊ້ຕົວຈິງຂອງວຽກງານ. ໃນພິທີຫົວໜ້າ ຄອສພ ໄດ້ມອບເງິນຈຳນວນໜຶ່ງໃຫ້ໂຄສະນາອົບຮົມແຂວງເພື່ອຊຸກຍູ້ວຽກງານວິຊາສະເພາະໃຫ້ມີຄວາມເຂັ້ມແຂງ.

(ຂ່າວ: ພູວັນ)