ຫົວໜ້າ ອອປສເຄື່ອນໄຫວຊຸກຍູ້ວຽກງານອົງການໄອຍະການປະຊາຊົນແຂວງອັດຕະປື

ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ (ອອປສ)ໄດ້ເຄື່ອນໄຫວຊຸກຍູ້ວຽກງານໄອຍະການປະຊາຊົນຢູ່ 4 ແຂວງພາກໃຕ້ໃນລະຫ່ວາງວັນທີ 24-29 ມີນາຜ່ານມາ ໂດຍມີຫົວໜ້າກົມ, ຫົວໜ້າ-ຮອງຫົວໜ້າພະແນກ, ຫົວໜ້າຫ້ອງການພ້ອມດ້ວຍພະນັກງານກ່ຽວຂ້ອງເຂົ້າຮ່ວມ.
    ທ່ານ ສຸພາສິດ ລໍວັນໄຊ ຫົວໜ້າອົງການໄອຍະການປະຊາຊົນແຂວງອັດຕະປື ໄດ້ລາຍງານການຈັດຕັ້ງປະຕິບັດວຽກງານໄລຍະ 3 ເດືອນຜ່ານມາເປັນຕົ້ນໄດ້ເອົາໃຈໃສ່ບູລະນະການຈັດຕັ້ງຕາມແຜນກໍານົດພະນັກງານນໍາພາ-ຄຸ້ມຄອງ ພັດທະນາບຸກຄະລາກອນຢ່າງເປັນລະບົບຕໍ່ເນື່ອງ, ໄດ້ມອບໃບຍ້ອງຍໍປະຈໍາປີໃຫ້ກົມກອງ ແລະ ພະນັກງານທີ່ໄດ້ຮັບຈາກ ອອປສ, ໄດ້ສະເໜີສ້າງຕັ້ງໄອຍະການປະຊາຊົນເຂດ II ຢູ່ເມືອງສະໜາມໄຊ ແລະ ແຜນສ້າງໄອຍະການປະຊາຊົນເຂດ I ປະຈໍາເມືອງຊານໄຊ, ໄດ້ແຕ່ງຕັ້ງພະນັກງານໄອຍະການລົງປະຈໍາຢູ່ຄ້າຍຄຸມຂັງ-ດັດສ້າງ. ສຳລັບວຽກງານຕິດຕາມກວດກາທົ່ວໄປໄດ້ຮັບຄໍາຮ້ອງ 3 ສະບັບ, ແກ້ໄຂສໍາເລັດ 2 ສະບັບ, ຕິດຕາມການກໍ່ອາຊະຍາກໍາ 34 ເລື່ອງ. ໃນນັ້ນກະທໍາຜິດຕໍ່ຄວາມສະຫົງບຂອງຊາດ 1 ເລື່ອງ, ຕໍ່ຄວາມປອດໄພ ແລະ ຄວາມເປັນລະບຽບຮຽບຮ້ອຍຂອງສັງຄົມ 1ເລື່ອງ, ຕໍ່ຊີວິດ,ສຸຂະພາບ ແລະກຽດສັກສີຂອງຄົນອື່ນ 2 ເລື່ອງ, ຕໍ່ກໍາມະສິດ 8 ເລື່ອງ, ຢາເສບຕິດ 21 ເລື່ອງ, ຕໍ່ລະບຽບບໍລິຫານ ແລະ ການຍຸຕິທໍາ 1 ເລື່ອງ, ຕິດຕາມກວດກາລະບຽບບ້ານ, ການປະຕິບັດຄໍາຕັດສິນຂອງສານ, ກະກຽມຄວາມພ້ອມໃນການກວດກາການເຂົ້າມາພັກເຊົາຂອງກໍາມະກອນຈໍານວນຫຼາຍພັນຄົນ. ນອກນັ້ນຍັງໄດ້ກະກຽມສໍາພາດເພື່ອວິເຄາະບັນຫາອາຊະຍາກໍາໃນທົ່ວແຂວງ. ການຕິດຕາມກວດກາການປະຕິບັດຄໍາຕັດສິນຂອງສານໃນນັ້ນ ຄະດີອາຍາຄ້າງມາແຕ່ປີກ່ອນ 902 ເລື່ອງ, ເຂົ້າໃໜ່ 143 ເລື່ອງລວມ 1.045 ເລື່ອງ, ປະຕິບັດສໍາເລັດ 18 ເລື່ອງ, ຄະດີພວມປະຕິບັດ 929 ເລື່ອງ, ບໍ່ສາມາດປະຕິບັດໄດ້ 98 ເລື່ອງ, ຄະດີແພ່ງຄ້າງມາແຕ່ປີກ່ອນ 159 ເລື່ອງ, ເຂົ້າໃໜ່ 11 ເລື່ອງລວມ 147 ເລື່ອງ, ປະຕິບັດສໍາເລັດ 4 ເລື່ອງ, ພວມປະຕິບັດ 147 ເລື່ອງ, ປະຕິບັດບໍ່ໄດ້ 16 ເລື່ອງ.
    ໂອກາດນີ້, ທ່ານ ໄຊຊະນະ ໂຄດພູທອນ ໄດ້ໃຫ້ກຽດໂອ້ລົມ ພ້ອມທັງເນັ້ນໜັກໃຫ້ເອົາໃຈໃສ່ຕໍ່ວຽກງານສຶກສາອົບຮົມການເມືອງແນວຄິດ, ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງສູນກາງພັກ, ແຜນພັດທະນາເສດຖະກິດ-ສັງຄົມແຫ່ງຊາດເຂົ້າສູ່ວຽກງານໄອຍະການປະຊາຊົນ, ການຜັນຂະຫຍາຍວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ, ການຜັນຂະຫຍາຍມະຕິກອງປະຊຸມໃຫຍ່ຂອງອົງຄະນະພັກອົງການໄອຍະການປະຊາຊົນສູງສຸດ ຄັ້ງທີ V ແລະ ວຽກງານກວດກາສະມາຊິກພັກ-ພະນັກງານ ພ້ອມກັນສືບຕໍ່ປະຕິບັດສິດ ແລະ ໜ້າທີ່ຂອງພະນັກງານໄອຍະການປະຊາຊົນໃນການເຄົາລົບປະຕິບັດຕາມກົດໜາຍ ແລະ ການສັ່ງຟ້ອງຜູ້ຖືກຫາຂຶ້ນສານຕາມກົດໜາຍ, ສ້າງກົນໄກການປະສານງານລະຫວ່າງອົງການໄອຍະການປະຊາຊົນແຂວງກັບອົງການທີ່ກ່ຽວຂ້ອງຂອງແຂວງຢ່າງກົມກຽວເພື່ອຮັບປະກັນໃຫ້ສັງຄົມມີຄວາມສະຫງົບ.
    ຂະນະດຽວກັນ,ທ່ານ ບຸນທ່ຽງ ວິໄລວົງ ຮັກສາການຫົວໜ້າຫ້ອງການ ອອປສ ໄດ້ມອບຄອມພິວເຕີຈໍານວນ 2 ຊຸດໃຫ້ອົງການໄອຍະການປະຊາຊົນແຂວງອັດຕະປື ແລະ ປິ່ນເຕີ 1 ໜ່ວຍໃຫ້ອົງການໄອຍະການທະຫານແຂວງ.ຈາກນັ້ນ, ທ່ານຫົວໜ້າ ອອປສ ພ້ອມຄະນະໄດ້ສືບຕໍ່ເຄື່ອນໄຫວຊຸກຍູ້ວຽກງານໄອຍະການປະຊາຊົນຢູ່ແຂວງເຊກອງຕື່ມອີກ.
ຂ່າວ-ພາບ: ວົງເດືອນ