ຫົວໜ້າ ອອປສຕ້ອນຮັບ ທູດສະຫະລັດອາເມຣິກາ ປະຈໍາລາວ ຄົນໃໝ່

ທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ(ອອປສ) ແຫ່ງ ສປປ ລາວ ໄດ້ຕ້ອນຮັບ ທ່ານ ນາງ ຮິດເຕີ້ ໂລດສ ວາເລຍວາ ເອກອັກຄະລັດຖະທູດ ແຫ່ງ ສະຫະລັດອາເມຣິກາ ເຂົ້າຢ້ຽມພົບປະໃນວັນທີ 11 ມີນາ 2024 ທີ່ ອອປສເນື່ອງໃນໂອກາດທີ່ທ່ານນາງ ຮິດເຕີ້ ໂລດສ ວາເລຍວາ ໄດ້ດຳລົງຕຳແໜ່ງເປັນເອກອັກຄະລັດຖະທູດ ແຫ່ງສະຫະລັດອາເມຣິກາ ປະຈຳ ສປປ ລາວ ຄົນໃໝ່.
ໂອກາດດັ່ງກ່າວ, ທ່ານ ໄຊຊະນະ ໂຄດພູທອນ ກໍໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ທ່ານ ນາງ ຮິດເຕີ້ ໂລດສ ວາເລຍວາ ທີ່ຖືກແຕ່ງຕັ້ງມາດຳລົງຕຳແໜ່ງ ເປັນເອກອັກຄະລັດຖະທູດ ຄົນ ໃໝ່ ປະຈຳ ສປປ ລາວ  ຊຶ່ງເປັນການປະກອບສ່ວນສຳຄັນເຂົ້າໃນການເສີມຂະຫຍາຍການພົວພັນຮ່ວມມືລະຫວ່າງ ລາວ ກັບ ສະຫະລັດອາເມຣິກາ ໃຫ້ນັບມື້ແຕກດອກອອກຜົນຍິ່ງໆຂຶ້ນ. ພ້ອມທັງສະແດງຄວາມຫວັງວ່າ ຕະຫຼອດໄລຍະໃນການປະຕິບັດໜ້າທີ່ ເປັນເອກອັກຄະລັດຖະທູດປະຈຳລາວ ທ່ານທູດຈະສືບຕໍ່ຢ່າງຕັ້ງໜ້າເຂົ້າໃນການປະກອບສ່ວນເສີມສ້າງສາຍພົວພັນຮ່ວມມື ແລະ ຊ່ວຍເຫຼືອຊຶ່ງກັນ ແລະ ກັນ ໃນການປົກປັກຮັກສາຄວາມໝັ້ນຄົງ, ຄວາມສະຫງົບ ໃຫ້ໄດ້ຮັບຜົນເປັນຈິງ ແລະ ພ້ອມທີ່ຈະໃຫ້ການຮ່ວມມື, ສະໜັບສະໜູນ ແລະ ອຳນວຍຄວາມສະດວກ ເພື່ອໃຫ້ທ່ານທູດສາມາດເຮັດໜ້າທີ່ໆໄດ້ຮັບມອບໝາຍຢ່າງມີຜົນສຳເລັດ.
ທ່ານ ນາງ ຮິດເຕີ້ ໂລດສ ວາເລຍວາ ໄດ້ສະແດງຄວາມຂອບໃຈມາຍັງທ່ານຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມທັງຢືນຢັນວ່າຈະຕັ້ງໜ້າປະຕິບັດໜ້າທີ່ທີ່ໄດ້ຮັບມອບໝາຍໃນຄັ້ງນີ້ໃຫ້ປະສົບຜົນສຳເລັດ ແລະ ເກີດຜົນປະໂຫຍດສູງສຸດ ໂດຍຈະສືບຕໍ່ຊຸກຍູ້ສົ່ງເສີມສາຍພົວພັນມິດຕະພາບອັນດີງາມ ແລະ ການຮ່ວມມື, ການຊ່ວຍເຫຼືອຊຶ່ງກັນ ແລະ ກັນ ລະຫວ່າງ ສອງປະເທດໃຫ້ນັບມື້ມີບາດກ້າວດີຂຶ້ນເລື້ອຍໆ.
ຂ່າວ-ພາບ: ສຸກ ອອປສ